“Anina Lasi Karadia” Oi Dadaraia
1 Hari inai negai, taunimanima idia ura henia hereva siaia dalana ta be E-mail. Ena be inai dala amo ruma bese taudia bona turadia dekenai ekspiriens bona lalohadai ita siaia be reana ia namo, to bema E-mail gaukaralaia dalana ita naria namonamo lasi dahaka “anina lasi karadia” be reana do ita karaia diba?—Aon. 12:11.
2 E-Mail Gaukaralaia Dalana Ita Naria Namonamo: Haida idia gwau, E-mail amo sivarai matamatadia idia davaria neganai, edia mamina be Iehova ena orea taudia kahirakahira idia noho. Reana unai sivaraidia be ekspiriens, iseda hedikwota dekenai idia vara gaudia, dika eiava dagedage sivaraidia, bona Basileia Hesiai Gaukara Sikuli dekenai idia halasia hehuni herevadia danu. Toana be ma haida idia ura dikadika unai bamona sivarai idia siaia, badina idia ura idia ese edia turadia dekenai unai sivarai idia gwauraia hedinarai guna.
3 Nega haida, sivarai bona ekspiriens idia mogea eiava edia anina idia habadaia kava. Eiava haida idia ura sibona edia ladana idia abia isi dainai, lalohadai kereredia idia havaraia. Nega momo unai bamona hereva idia gwauraia haraga taudia ese idia vara gaudia ibounai idia diba lasi. (Aon. 29:20) Nega haida, ena be hereva ta idia abidadama henia lasi, to ia be lalona veria gauna dainai idia siaia. Unai bamona maoro lasi bona ma haida idia hakaua kerere sivaraidia be “gori kavakavadia,” Dirava badinaia karana momokanina idia habadaia lasi.—1 Tim. 4:6, 7.
4 Bema oi ese hereva ta oi siaia bona gabeai ia hedinarai ia be maoro lasi, unai amo ia vara lalohisihisi eiava daradara be emu maduna danu. Davida be ena natuna ibounai idia alaia mase sivaraina, ia maoro lasi sivaraina, ia kamonai neganai, mai lalohisihisi ida “iena dabua ia darea.” To, ena natuna tamona sibona ia mase. Unai be lalohisihisi gauna, to unai maoro lasi sivaraina ese Davida ena lalohisihisi ia habadaia kava. (2 Sam. 13:30-33) Momokani, ita ura lasi iseda tadikaka ia hakaua kerere eiava ia hamanokaia karana ta ita karaia.
5 Dirava ese Ia Gaukaralaia Oreana: Namona be oi laloatao, iseda guba Tamana be mai ena hereva halasia oreana, “hesiai tauna mai ena kamonai, bona mai ena kara maoromaoro.” Unai “hesiai tauna” be mai ena maduna, abidadama taudia dekenai do ia halasia herevadia bona do ia halasia negana ia abia hidi totona. Unai lauma aniani be tiokratik oreana sibona amo idia halasia. Namona be ita abidadama henia herevadia be Dirava ese ia gaukaralaia oreana amo ita abia hanaihanai, Internet idia gaukaralaia taudia amo lasi.—Mat. 24:45.
6 Internet Web Sait: Ita be mai eda Internet Web sait: www.watchtower.org. Unai sait tamona ia hegeregere, taunimanima dekenai hereva halasia totona. Taunimanima ta, komiti ta, eiava kongregesen ta ese Iehova ena Witnes taudia ia herevalaia Web page ta idia karaia be anina lasi. Haida ese Web sait dekenai iseda buka, idia lalonai idia noho Baibel siri, bona idia gwauraia buka ma haida edia hereva iboudiai idia atoa, bona hebouhebou herevadia edia kopi idia hariharilaia danu to kontribusen idia noia. Herevana profit moni idia abia eiava lasi, to kompiuta amo Iehova ena Witnes taudia edia buka edia kopi idia karaia bona idia hariharilaia be copyright taravatuna ia utua. Ena be haida idia laloa unai be tadikaka durua gaukarana, to unai ai ura lasi bona unai gaukara idia hadokoa be gau badana.
7 Kompiuta amo hereva ita siaia eiava halasia neganai, namona be ita laloa namonamo bona maoromaoro, unai amo ita hamomokania iseda lalona be ‘gau namodia dekenai ia honu.’—Aon. 24:4.