Haida Edia Kerere Sivaraidia ese Hari Inai Negai Ita Idia Durua be Namo
Ita ibounai ese eda abidadama ita dogoatao auka diba bema Warning Examples for Our Day vidio amo idia hahedinaraia Baibel drama ese ita ia hadibaia gaudia ita laloa bada. Ita do itaia lasi neganai, mani emu kara Numera karoa 25 bona sivarai ma haida Insight on the Scriptures bukana, Volium 2, rau 419, paragraf 3-5 dekenai umui duahia. Bena inai henanadai umui haerelaia: Moaba taudia be daidia, bona dahaka dainai Iehova ese Mose ia hamaoroa idia danu do idia tuari lasi? (Deu. 2:9) Balama ena palani lalonai Moaba taudia be edena bamona idia gaukaralaia Israela besena ia hadikaia totona? Dahaka dainai do ita laloaboio lasi, Israela taudia momo be gwauhamata tanona ai idia do vareai lasi neganai hahetoho badana ta dekenai idia moru?—1 Kor. 10:11, 12.
Warning Examples vidio oi itaia noho lalonai, henunai ai torea gaudia 4 oi laloa; namona be hari ita lalodia namonamo be namo bema ita ura hamomokania ita be Dirava ita badinaia noho bona iena lalo-namo ita abia. (1) Laloa Dalana: Iehova bona iena dala dekenai Israela taudia haida be edena bamona idia laloa kerere? To, edena bamona lalohadai ita hahedinaraia be namo? (2) Hebamo: Dahaka dainai Iehova ia ura lasi Israela taudia be Moaba taudia ida idia turana karaia? (Eso. 34:12; Aon. 13:20) Dahaka dainai mai aonega ida iseda turadia ita abia hidi? (3) Kara: Hebamo dikana ese Israela taudia 23,000 ia veria bena dahaka kara dika badana idia karaia? (1 Kor. 10:8) Hari inai negai, dahaka ese Dirava ena taunimanima ia veria kara dika badadia idia karaia totona, to edena dala ai ita sibona ita gimaia diba? (4) Tomadiho: Israela taudia edia tomadiho ia goeva karana dekenai edena bamona idia tohodia? Hari inai negai edena bamona kaivakuku tomadiho henia kara hehunidia be haida ese idia karaia diba, to edena bamona ita dadaraia diba?—Kol. 3:5.
Drama lalonai, Iamina ese kara maoromaoro ia badinaia dainai dahaka hahenamo ia abia? Unai vidio amo, Hakaua Oreana ese mai lalokau ida Keristani taudia ibounai dekenai dahaka hagoadaia hereva idia henia noho? Bema oi be ruma bese kwarana ta, dahaka dainai oi laloa oiemu ruma bese ese inai vidio idia itaia loulou be aonega karana?