Mai Anina Bada Gaudia Ita Karaia Totona Ita Ia Durua Sikulina
1 Taunimanima be sikuli dekenai diba idia abia, unai ese idia do ia durua edia mauri lalonai idia tahua gaudia idia abia totona. To, edena tahua gauna ese mauri ia Henia Diravana hanamoa karana bona ma haida ita durua iena ura bona dala idia diba karana ia hanaia diba? Ta lasi. Tiokratik Haroro Sikuli ita karaia ena badina be ita ia hegaegaelaia, ma haida dekenai iseda abidadama ita hadibaia totona. Unai dainai, pura ta ta ibounai sikuli dekenai ita mai neganai, diba ita abia mauri lalonai mai anina bada gaudia do ita karaia diba totona.
2 “Lagani 2003 Ena Tiokratik Haroro Sikuli Ena Sediual” be October ena Iseda Basileia Gaukara pepana lalonai idia udaia. Unai sediual ese sikuli do ita karaia dalana ia hahedinaraia. Reana unai sediual be Tiokratik Haroro Sikuli amo Heduru Oi Abia bukana lalonai oi udaia be namo, bona unai buka be pura ta ta ibounai Tiokratik Haroro Sikuli dekenai oi mailaia. Lagani 2003 ena Tiokratik Haroro Sikuli lalonai do ita karaia gaudia haida mani ita itaia.
3 Hereva Namonamo Karana: January amo, Tiokratik Haroro Sikuli ena program ta ta be miniti 5 herevana ta amo do idia hamatamaia, unai be hereva namonamo karana ta eiava duahiduahi, stadi, eiava hadibaia karana ta do idia herevalaia. Sikuli naria tauna ese unai hereva do ia henia, eiava ia manada vadaeni elda ta ia abia hidi diba unai hereva ia henia totona. Hereva henia tauna ese hereva namonamo karana ta ena anina bona ena namo ia herevalaia diba. Bena namona be Baibel ena haheitalai ia herevalaidia amo unai hereva ia habadaia, bona edena dala ai unai kara ita badinaia diba ia hahedinaraia neganai, gau badana be iseda haroro gaukara do ia hanamoa diba dalana ia herevalaia namonamo.
4 Hereva Namba 1: Instraksen tok do idia henia tadikaka idia hadibaia lou “unai kahana . . . ena namo ia gwauraia” totona. Anina be kongregesen dekenai ia hahedinaraia edena dala ai unai diba do idia gaukaralaia. Bema unai kahana oi abia, namona be Haroro Sikuli buka ena rau 48 ia lao 49 ai hegaegae dalana oi itaia, bona unai buka ena indeks ai “Badinaia dalana hahedinaraia” henunai idia torea rau edia hereva oi stadilaia.
5 Baibel Duahiduahi Sediual: Bema pura ta ta ena Baibel duahiduahi be guna oi karaia lasi, mani emu lalona oi hadaia inai lagani ena sediual oi badinaia totona. Unai bamona idia karaia taudia ese Keristani Greek Revarevadia be lagani ena dokonai do idia duahia ore. Baibel duahiduahi ena program ai, Keristani Greek Revarevadia duahia guna ena namo be Haroro Sikuli buka ena rau 10, paragraf 5 ese ia herevalaia.
6 Baibel Ena Hereva Badadia: Inai kahana idia halataia miniti 10, unai amo helai taudia ese pura ena Baibel duahiduahi amo hereva haida idia gwauraia diba. Inai kahana idia karaia taudia ese nega idia hanaia lasi be namo. Unai be pura ta ta ibounai, riviu purana ai danu, do idia henia kahana. Do idia herevalaia karoa ibounai oi duahia neganai, namona be emu ruma bese stadi, emu haroro gaukara, eiava emu mauri lalonai oi do idia durua hereva badadia oi tahua. Iehova ese taunimanima bona bese idauidau ia kara henia lalonai ia hahedinaraia karadia haida be dahaka? Dahaka oi dibaia, emu abidadama ia hagoadaia bona Iehova dekenai emu laloa bada karana ia habadaia totona? Namona be idia herevalaia karoa ibounai amo hereva badana ta oi gwauraia, Hereva Namba 2 ai tadikaka ta ese do ia duahia siridia amo danu, badina ia ese ia duahia siridia do ia herevalaia lasi.
7 Hereva Namba 2: Pura ta ta ibounai stiuden edia kahana ginigunana be taunimanima vairanai duahiduahi hanamoa karana. Hua ta ta ena duahiduahi kahirakahira iboudiai be pura ta ta ena Baibel duahiduahi amo do idia karaia. To hua ena duahiduahi ginigabena be Gima Kohorona amo do idia karaia. Namona be stiuden ese ia abia kahana ia duahia, hamatamaia herevana eiava dokona herevana ia gwauraia lasi. Unai dala amo, ia ese ena duahiduahi karana sibona do ia laloa bada.—1 Tim. 4:13.
8 Hereva Namba 3 bona Namba 4: Kahana haida edia hereva Herevalaia bukana lalonai be momo to kahana haida edia hereva be sisina sibona; kahana haida be sinado sibona idia torea. Bema ta ia abia kahana ena hereva be sisina sibona eiava sinado sibona idia torea, namona be iseda Keristani bukadia lalonai hereva haida do ia tahua bona ena kahana do ia hegaegaelaia. Unai ese taihu ia durudia diba edia kahana idia hegaegaelaia neganai, edia durua taihu idia laloa danu.
9 Karaia Dalana: Haroro Sikuli buka ena rau 45 ai ia hedinarai bamona, sikuli naria tauna ese karaia dalana ta ia abia hidi diba. Bema ia abia hidi lasi, vadaeni taihu ese rau 82 ena lista amo karaia dalana ta idia abia hidi diba. Bema taihu ta be hua rua rua murinai hereva ta ta ia henia, unai karaia daladia idauidau 30 be lagani 5 bamona lalonai ia karaia ore diba. Bema taihu ta ese ia abia hidi karaia dalana be Namba 30, “Emu gabu dekenai haroro dalana namona ma ta abia hidi,” namona be unai karaia dalana be Tiokratik Haroro Sikuli Ena Hereva pepana (S-89) ena henuna kahanai eiava murina kahanai idia torea hedinarai. Sikuli naria tauna ese taihu ena buka ena rau 82 ai, iena karaia dalana ena badinai, hereva ia henia ena deit do ia torea. Namona be stiuden ena sisiba pepana ia makaia neganai, unai ia torea diba nega tamona.
10 Sisiba Pepana: Emu sisiba pepana be emu buka dekenai idia hakapua tamona. Ia be rau 79 ia lao 81 ai ia hedinarai. Unai dainai, gau badana be hereva ta ta oi henia murinai, emui buka be sikuli naria tauna dekenai oi henia. Gau badana be sikuli naria tauna ese stiuden taudia idia gaukaralaia kahana ena sisiba ibounai ia torea namonamo.
11 Riviu: Tiokratik Haroro Sikuli ena riviu be herevahereva dalanai do idia hakaua. Ia be hua rua rua murinai do idia karaia bona ena lata be miniti 30. Riviu lalonai do ita herevalaia henanadaidia be Iseda Basileia Gaukara pepana lalonai do idia hedinarai. Bema riviu purana dekenai sekit hebouhebou do idia karaia eiava sekit tauna do ia vadivadi, vadaeni namona be pura vaira ena program be unai pura ai do idia karaia guna bona unai riviu karana be pura iharuana ai do idia karaia.
12 Klas Ma Haida: Kongregesen lalonai stiuden edia namba be 50 ia hanaia neganai, reana elda taudia do idia laloa klas ma haida do idia hamatamaia. “Stiuden edia kahana iboudiai eiava kahana ginigabedia rua sibona unuseniai idia karaia diba.” (Haroro Sikuli, rau 285) Unai hereva gabena ai gwauraia badina kongregesen haida dekenai taihu be momo, to Hereva Namba 2 do idia karaia tadikaka be momo lasi. Namona be elda taudia ese idia manada vadaeni tadikaka idia abia hidi unai klas idia hakaua totona.
13 Sisiba Henia Tauna Iharuana: Tiokratik Haroro Sikuli ena sediual ese ia gwauraia hegeregerena, namona be elda oreana ese sisiba henia tauna iharuana idia abia hidi, bona ia ese Baibel ena Hereva Badadia bona instraksen tok idia henia elda bona hesiai taudia sibodia ida edia sisiba do ia herevalaia. Namona be unai maduna idia huaia tadikaka be mai edia diba, bona edia sisiba be elda ma haida ese do idia matauraia. Namona be iena sisiba amo idia ia hagoadaia, edia hereva bona hadibaia namonamo daladia dainai ia hanamodia bona edia hereva hanamoa totona gau badadia ta eiava rua ia gwauraia. Hereva ia henia loulou tadikaka be ena hereva ta ta ibounai murinai sisiba ia abia be anina lasi. To, namona be sisiba tauna iharuana do ia laloa namonamo bona ia lalo-parara hari pablik tok idia henia taudia ese heduru idia abia danu be namo, edia hadibaia karana idia hanamoa noho totona.—1 Tim. 4:15.
14 Do Ia Laloa Namonamo Gaudia: Dahaka gaudia ese sisiba henia tauna idia durua diba hereva ta ena namo ia laloa namonamo totona? Haroro Sikuli buka ai, edia namba idia torea hedinarai karoa iboudiai 53 amo, momo edia maua ihatoina be do ia laloa namonamo gaudia ena sivarai kwadogina idia gwauraia. Namona be sikuli naria tauna ese buka ai idia torea hadibaia herevadia eiava heduru herevadia ma haida ia laloa namonamo danu, bena tadikaka ta ena hereva ta ta ia hakapua dalana bona ia henia herevana ese anina namona ia havaraia dalana do ia lalo-pararalaia haraga diba. Hegeregere, rau 55 ena ataiai ia noho paragraf lalonai idia torea henanadai bona rau 163 dokonai idia torea paragraf ena hereva oi itaia.
15 Toretore Lasi Gabudia Gaukaralaia: Haroro Sikuli bukana ena rau ta ta edia isena ai toretore be lasi kahana badadia idia noho sibona lasi, to rau haida idia hegaegaelaia oi sibona emu stadi oi karaia neganai bona Tiokratik Haroro Sikuli oi lao neganai hereva haida oi torea diba. (Rau 77, 92, 165, 243, 246, bona 250 itaia.) Laloaboio lasi, pura ta ta ibounai emu buka oi mailaia. Hereva ginigunana idia henia neganai, emu buka lalonai unai kahana oi badinaia. Sikuli ia heau noho lalonai, emu buka oi koua lasi. Sikuli naria tauna ese ia herevalaia gaudia oi laloa. Hereva henia taudia edia hadibaia daladia, henanadai, haheitalai, laulau herevadia, ita itaia gaudia idia gaukaralaia dalana, bona hahegeregerea gaudia edia idau idia gaukaralaia dalana oi laloa namonamo. Mai anina bada herevadia oi torea neganai, sikuli amo oi kamonai gaudia namodia momo herea be do oi laloa lou bona gaukaralaia diba.
16 Iesu Keriso ia diba Dirava ena Basileia harorolaia gaukarana be hahenamo hereana taunimanima ibounai dekenai. Unai be iena gaukara badana. (Mar. 1:38) Ia gwau: “Lau be Dirava ena Basileia ena Sivarai Namona hanua idauidau dekenai do lau harorolaia, Dirava ese lau ia siaia ena badina be unai.” (Luka 4:43) Ita be Iesu ena boiboi ita kamonai henia bena iena murinai ita raka taudia dainai, ita danu be sivarai namona ita harorolaia goadagoada, bona nega ibounai ita gaukara goada iseda “hahenamo herevadia boubouna” ita hanamoa totona. (Heb. 13:15, NW ) Unai ita karaia totona, namona be iseda lalona ita hadaia hanaihanai Tiokratik Haroro Sikuli dekenai ita noho, unai sikuli ese ita do ia durua iseda mauri lalonai mai anina bada gaudia ita karaia totona.