Lou Henia ese Baibel Stadi Ena Dala Ia Kehoa
1 Iesu ese iena murinai idia raka taudia ia hamaorodia do idia haroro sibona lasi, to ‘diba tahua taudia do idia halaoa . . . , bona do idia hadibaia.’ (Mat. 28:19, 20) Haroro tauna be ia haroro sibona, to hadibaia tauna be gau momo ia karaia. Ia hadibaia, gau ena anina ia herevalaia namonamo, bona hamomokania herevadia ia henia. Ma haida ita hadibaia dalana ta be kamonai taudia dekenai lou henia ita karaia, ita ura Baibel stadi ita hamatamaia.
2 Daika oi lou henia diba? Namona be buka bona magasin idia abia taudia eiava sivarai namona idia kamonai henia taudia iboudiai oi lou henidia. Bema taunimanima momo gabuna dekenai oi haroro bona kamonai tauna ta oi davaria, namona be ia oi davaria totona iena noho gabuna korikorina eiava telefon namba oi abia, unai amo ena ura do oi habadaia diba. Lalohadai namona oi abia Baibel stadi oi hamatamaia totona. Baibel stadi do idia abia dae taudia oi tahua noho, bona do oi davaria diba.—Mat. 10:11.
3 Oi Hahedinaraia Oi Ura Idia Oi Durua: Nega ginigunanai ruma tauna oi hereva henia neganai, unai nega ai namona be oi hegaegae lou henia namona oi karaia totona. Unai idia karaia namonamo evanelia taudia be ruma tauna ia laloa bada gaudia idia laloa, bona unai idia gaukaralaia gabeai idia herevalaia totona. Haida idia davaria ruma tauna idia hereva henia murinai henanadai ta idia rakatania be namo, unai amo gabeai do idia giroa lou neganai, ruma tauna ena ura do idia habadaia. Iseda ura taunimanima dekenai ese ita ia durua ruma tauna ita rakatania murinai ia do ita laloa noho, bona unai ese ita ia hagoadaia karaharaga ita giroa lou totona. Bema hegeregere, ena ura be ia do bada lalonai oi giroa lou be namo—reana dina ta eiava rua murinai.
4 Lou henia oi karaia neganai, guna oi herevalaia gauna oi habadaia. Oiemu lalona oi hadaia nega ta ta ai hagoadaia Baibel sirina ta oi gaukaralaia, bona mai ura ida oi kamonai henia. Ruma tauna oi dibaia namonamo. Bena nega ta ta oi vadivadi henia neganai, Dirava ena Hereva ena hereva momokani oi gaukaralaia ia laloa bada gauna oi herevalaia totona.
5 Baibel Stadi Hamatamaia Daladia Oi Diba: Lou henia namona karaia totona hegaegae negana be ruma tauna oi davaria negana ginigunana. Edena dala ai unai oi karaia diba? Oi hadibaia oi ura mai anina bada lalohadaina ta oi herevalaia, bona bema oi laloa unai kamonai tauna do ia durua herevana ta be Diba bukana eiava Dahaka Ita Karaia? buklet ena paragraf ta amo unai oi hahedinaraia. Paragraf oi duahia, henanadai umui itaia, bona idia gwauraia sirina ta eiava rua oi herevalaia. Iduara dekenai miniti 5 ia lao 10 lalonai unai oi karaia diba. Dokonai, henanadai ta oi henia bona dala oi karaia gabeai do oi lou henia totona.
6 Iseda hesiai gaukara ena kahana badana be kamonai taudia ibounai edia ura ita habadaia. Unai dainai, oiemu wiki ena sediual dekenai nega oi atoa lou henia oi karaia totona. Unai bamona oi karaia neganai, emu hesiai gaukara ese anina namona do ia havaraia bona moale do ia mailaia.
[Study Questions]
1. Dahaka dainai lou henia gaukarana be mai anina bada?
2. Daika ita lou henia diba?
3, 4. Dahaka oi karaia diba lou henia namodia oi karaia totona?
5. Edena auka lasi dalana oi gaukaralaia diba Baibel stadi hamatamaia totona?
6. Edena dala ai ita hahedinaraia diba, lou henia ena anina ita laloa bada?