Ita Ia Hagoadaia Gaukarana
1 Baibel ena hereva idia abia dae bona edia mauri lalonai idia badinaia taudia ibounai be ena hereva ese ia hagoadadia. (Sal. 19:7, 8) Idia ia durua hahediba hereva koikoidia bona hadikaia karadia idia rakatania totona, bona vaira negana totona helaro momokanina ia henia. To, sivarai namona idia kamonai taudia sibona ese namo idia abia lasi. Baibel ena hereva momokani idia harorolaia bena ma haida idia hagoadaia taudia danu be goada idia abia.—Aon. 11:25.
2 Haroro Gaukara amo Goada Abia: Iesu ia gwau Keristani hahediba tauna ena maduna, hegeregere haroro bona taunimanima be hahediba taudia ai halaoa gaukarana, idia abia dae taudia edia “laumana be do idia laga-ani.” (Mat. 11:29) Ia sibona ese ia davaria ma haida ia haroro henia neganai goada ia abia. Unai be ena aniani bamona. (Ioa. 4:34) Iesu ese hahediba taudia 70 be haroro gaukara totona ia siaia neganai, idia moale badina Iehova ese edia gaukara ia durua.—Luka 10:17.
3 Unai hegeregerena, hari Keristani taudia momo be haroro gaukara idia karaia neganai goada idia abia. Taihu ta ia gwau: “Haroro gaukara be lau ia hagoadaia badina egu mauri ia hakaua bona ia dekenai anina ia henia. Haroro gaukara lau karaia neganai, egu hekwakwanai bona dina ta ta ena lalo-hekwarahi lau laloa momo lasi.” Ia haroro goadagoada taihu ta ia gwau: “Haroro gaukara . . . dina ta ta ai, lau ia hadibaia Iehova be momokani ia noho bona lau dekenai maino ia henia bona gau ma haida amo do lau davaria diba lasi moalena ia henia.” ‘Dirava ena gaukara ita karaia hebou noho’ be hahenamo badana!—1 Kor. 3:9.
4 Keriso Ena Huaia Auna be Ia Metau Lasi: Iesu ese Keristani taudia ia hagoadaia idia “raka goada” be namo, to ita henia diba gaudia sibona ia noia. (Luka 13:24) Momokani, Iesu be mai ena lalokau ida ita ia boiria, ia ida ‘ena huaia auna’ ita huaia totona. (Mat. 11:29) Hekwakwanai aukadia idia haheaukalaia taudia idia diba momokani edia kudouna ibounai ida idia karaia hesiai gaukarana, herevana idia karaia badabada lasi, be Dirava ese ia moalelaia.—Mar. 14:6-8; Kol. 3:23.
5 Iena ladana dainai ita karaia gaukarana ia laloa bada Diravana ita hesiai henia be hagoadaia gauna! (Heb. 6:10) Namona be hanaihanai ita hekwarahi iseda gau namodia ia dekenai ita henia totona.