Dirava ese Ia Durua Gaukarana
1 Hari Iehova ena hesiai taudia huanai, momo be inai tanobada ena edukeisen, kohu eiava ladana bada idia abia lasi. Unai dainai, taunimanima haida ese iseda haroro gaukara idia laloa maragi. (Isa. 53:3) To, iseda Baibel hadibaia gaukarana ese tanobada hegegemadai taunimanima milioni momo dekenai lalo-goada bona helaro ia henia. Ladana maragi taudia ese edena bamona unai anina namona idia havaraia diba? Dirava sibona ese unai gaukara ia durua. (Mat. 28:19, 20; Kara 1:8) Aposetolo Paulo ia gwau: “Tanobada ena manoka gaudia danu Dirava ese ia abia hidi, goada taudia do ia hahemaraia totona.”—1 Kor. 1:26-29.
2 Aposetolo bona Keristani taudia ginigunadia ma haida “be sikuli bada lasi bona aonega bada lasi taudia.” (Kara 4:13) To, sivarai namona harorolaia gaukarana idia karaia goadagoada, bona Iehova ese edia hekwarahi ia hanamoa. Ena be hekwakwanai bona dagedage idia vara, to “Lohiabada ena hereva ia bada daekau bona ia kwalimu.” Iehova ese haroro gaukara ia durua dainai gau ta ese ia koua diba lasi. (Kara 5:38, 39; 19:20) Hari inai negai be unai bamona danu. Siahu bada taudia edia dagedage karana danu ese sivarai namona ia bada daekau bona ia kwalimu karana idia koua diba lasi.—Isa. 54:17.
3 Dirava Ita Hanamoa: Ena be Dirava ena hesiai taudia ai ita lao be hahenamo ta ita dekenai, to ita hekokoroku be mai badina, a? Lasi vaitani. Paulo ese Keristani haroro gaukara be inai bamona ia gwauraia: “Ai, inai diari ai abia vadaeni taudia, be hodu, manoka gaudia sibona bamona do ai noho. Inai anina be taunimanima ibounai do idia diba inai siahu badana be Dirava sibona dekena amo, ai dekena amo ia mai lasi.” (2 Kor. 4:7) Paulo ia diba Dirava ese ia dekenai ia henia goadana sibona amo ena hesiai gaukara ia karaia diba.—Efe. 6:19, 20; Fili. 4:13.
4 Unai hegeregerena, ita diba ‘Dirava dekena amo durua ita davaria’ sibona dainai, haroro gaukara ita hagugurua diba. (Kara 26:22) Unai bamona tanobada hegegemadai haroro gaukarana amo, hoa dalanai Iehova ese ita ia gaukaralaia tanobada besedia ita hamarerea sisina totona—kahirakahira hahemaoro karana ese idia do ia hamarerea bada. (Hag. 2:7) Lauma dalanai anina haboua gaukarana badana lalonai, ‘Dirava ena gaukara ita karaia hebou’ be hahenamo badana ta.—1 Kor. 3:6-9.