Iehova Kahirakahira Oi Lao Bukana Stadilaia Karana Ena Namo
1 “Basileia Harorolaia Goadagoada Taudia” edia Distrik Hebouhebou dekenai, Iehova Kahirakahira Oi Lao bukana be English gado dekenai ita abia dainai ita moale bada. April 2004 ai spesel pablik tok murinai, unai buka be New Guinea Pidgin gado dekenai idia halasia ena hadibaia hereva ita kamonai neganai, ita moale bada! Bona Iehova Kahirakahira Oi Lao bukana be daudau lasi Hiri Motu gado ai do idia halasia oi kamonai neganai, do oi moale bada. Momo be nega ginigunana unai buka idia abia neganai, maoromaoro idia duahia matamaia. Bema unai bamona umui do karaia lasi, umui ai hagoadaia unai umui karaia totona.
2 October ai, Kongrigeisen Buka Stadi dekenai Iehova Kahirakahira Oi Lao bukana do ita stadilaia matamaia. Iseda stadi dekenai edena bamona namo bada ita abia diba? Hegaegae be gau badana. Pura rua lalonai karoa ta do ita karaia, anina be paragraf haida sibona be pura ta ta lalonai do ita stadilaia. Unai dainai nega ia noho unai buka amo oi stadilaia bona oi laloa dobu gaudia amo haere namodia oi henia totona. Danu, pura lalonai paragraf haida sibona do ita herevalaia, unai amo karoa ena dokona kahanai ia noho mauana ita riviulaia diba.
3 Karoa 2 amo ia matamaia, maua ladana “Oi Laloa Dobu Gaudia” be karoa ta ta ena dokonai ia noho. Karoa ena paragraf dokona umui herevalaia murinai, buka stadi naria tauna ese grup taudia ida maua do ia herevalaia. Ia ese buka stadi taudia do ia hagoadaia edia lalohadai idia gwauraia totona, unai amo Baibel siri idia laloa dobu karana amo idia abia anina namona ia tahua. (Aon. 20:5) Maua lalonai idia noho henanadai sibona lasi, to nega haida ia ese inai henanadai haida danu ia henia diba: “Inai sivarai amo dahaka oi dibaia Iehova ena kara dekenai? Unai ese emu mauri be edena bamona ia durua? Edena bamona oi gaukaralaia diba ma haida oi durua totona?” Iena tahua gauna be ia ura ena grup taudia ese edia lalona amo haere idia henia, to anina lasi henanadai maragidia amo idia ia tohoa lasi.
4 Iehova Kahirakahira Oi Lao bukana be ita stadilaia buka haida amo ia idau. Ena be “hesiai tauna mai ena kamonai, bona mai ena kara maoromaoro” ena buka bona magasin ese Iehova idia hanamoa, to inai buka ibounai be Iehova ena kara idauidau ia herevalaia. (Mat. 24:45-47) Oibe, nega namo hereana do ita moalelaia! Iehova ena kara ita stadilaia namonamo dainai namo bada do ita abia. Unai stadi ese ita ia durua be namo iseda guba Tamana kahirakahira ita lao totona, bona ma haida ita durua diba unai bamona idia karaia totona.—Iam. 4:8.