Painia Urana Hahedinaraia
1 Herevana hari Basileia pablisa taudia ese painia gaukara idia karaia diba eiava lasi, to ibounai ese painia urana idia hahedinaraia diba. Idia be haroro bona hahediba taudia halaoa gaukarana ena hahegani idia laloa bada. (Mat. 28:19, 20; Kara 18:5) Idia ese taunimanima idia laloa bona edia ura gaudia idia dadaraia edia haroro gaukara idia hagugurua totona. (Mat. 9:36; Kara 20:24) Iehova ena hesiai taudia be mai edia ura ida dala idia tahua ma haida idia durua hereva momokani idia diba totona. (1 Kor. 9:19-23) Mani unai bamona ura ia hahedinaraia tauna ta ita laloa, ia be evanelia gaukara ia karaia tauna Filipo.
2 Haroro Bona Hadibaia: Aposetolo edia negai ia noho kongrigeisen lalonai, Filipo be maduna badadia ia huaia. (Kara 6:1-6) To, iena maduna badana be sivarai namona ia harorolaia goadagoada. (Kara 8:40) Unai dainai, hari elda bona hesiai taudia be edia maduna idia huaia lalonai haroro gaukara idia goadalaia, unai amo painia urana idia hahedinaraia diba. Unai ese kongrigeisen ena ura do ia hagoadaia!—Roma 12:11.
3 Stefano ia mase murinai, dagedage bada ese hahediba taudia edia mauri dalana namona ia hadikaia. To, Filipo ia haroro noho bona Samaria taudia huanai haroro gaukara ia hamatamaia. (Kara 8:1, 4-6, 12, 14-17) Iena haheitalai ita tohotohoa diba bema hahetoho negadiai sivarai namona ita harorolaia noho bona ita davaria taudia ibounai dekenai ita haroro.—Ioa. 4:9.
4 Filipo ena diba Dirava ena Hereva ia hadibaia dalana dekenai, be Etiopia eunuko tauna ena kara ia haidaua sivaraina amo ita itaia diba. (Kara 8:26-38) Baibel gaukaralaia namonamo karana bona ‘Buka Helaga be idia danu ita herevalaia’ karana be painia urana ita hahedinaraia dalana ma ta. (Kara 17:2, 3) Filipo bamona, ita ura taunimanima idia noho gabudia bona nega namodia ibounai ai sivarai namona ita harorolaia.
5 Ruma Bese Bona Kongrigeisen: Ita daradara lasi, Filipo ena kara bona haheitalai ese ena natudia kekeni ia hagoadaia. (Kara 21:9) Unai hegeregerena, Basileia ena ura idia atoa guna Keristani tama sina ese edia natudia idia hagoadaia unai bamona idia karaia totona. Ena be tama eiava sina ta be pura lalonai ia bisi dainai ia hesiku, to ma haida dekenai ia haroro goadagoada dainai ena natuna ese unai do ia laloatao hanaihanai.—Aon. 22:6.
6 Filipo ese ena ruma dekenai Paulo bona Luka, Iehova ena hesiai gaukara idia karaia goadagoada taudia, ia abia dae. (Kara 21:8, 10) Hari inai negai, edena bamona ita hahedinaraia diba idia haroro goadagoada taudia ita lalodia bada bona ita ura durudia? Reana painia taudia ita noia diba, momo idia haroro lasi dinana ena daba eiava adorahi ta ai idia ida ita gaukara hebou totona. (Fili. 2:4) Danu hagoadaia hebamo karadia totona eda ruma dekenai idia ita boiria diba. Herevana iseda noho dalana be edena bamona, namona be ita ibounai ita hekwarahi painia urana ita hahedinaraia totona.
[Study Questions]
1. Painia urana be edena bamona do oi gwauraia?
2. Edena dala ai elda bona hesiai taudia ese Filipo ena ura bada haroro gaukara dekenai idia tohotohoa diba?
3. Hahetoho ita davaria neganai, edena dala ai painia urana ita hahedinaraia diba?
4. Filipo be hadibaia tauna dainai dahaka haheitalai namona ia hahedinaraia?
5. Dahaka ese Keristani tama sina ia durua diba edia natudia edia lalona dekenai painia urana idia habadaia totona?
6. Edena bamona ita hahedinaraia diba iseda kongrigeisen lalonai idia noho painia taudia ita laloa bada?