Magasin Rut amo Ura Habadaia
1 Iseda haroro gaukara dekenai ita davaria taudia momo be ita idia abia dae bona mai moale ida iseda magasin bona buka idia abia, to idia ura lasi Baibel stadi idia abia dae. Dala ta be magasin rut amo edia ura ita habadaia. Magasin oi hariharilaia neganai, unai tauna ena ladana, adres, deit, ia abia magasin, umui herevalaia sirina, bona unai tauna ena ura ia hahedinaraia gauna ta oi torea diba. Magasin matamata idia ginidae neganai, emu magasin rut taudia do ia durua bada point namodia oi tahua, bona oi vadivadi lou neganai oi hahedinaraia. (1 Kor. 9:19-23) Gabeai, iseda magasin ai idia duahia gauna ese edia ura ia habadaia diba, unai amo do idia ura diba ma haida idia abia.
2 To ita laloparara taunimanima momo be magasin idia duahia sibona amo Iehova ena hesiai taudia ai do idia lao lasi. Hari inai negai taunimanima ese Iehova idia tahua be gau badana, unai dainai dahaka ita karaia diba idia ita durua totona? (Sep. 2:2, 3; Apok. 14:6, 7) Ita abia hidi siri namona ta be nega ta ta magasin ita henia neganai ita herevalaia, unai ese ena ura ia habadaia diba.
3 Siri Tamona Herevalaia: Oiemu magasin rut taudia oi laloa, bona ta ta ena dabu gauna hegeregerena siri ta ta oi hegaegaelaia oi herevalaia totona. (Fili. 2:4) Hegeregere, bema vanegai sibona edia lalokau tauna ia mase, reana oi lou henia loulou diba bona mase taudia dekenai ia vara gauna bona toreisi lou helarona dekenai Baibel be dahaka ia gwau oi herevalaia. Herevalaia bukana ai, inai hereva kwarana “Mase” bona “Toreisi-Lou” henunai idia noho herevadia ita gaukaralaia diba siri tamona herevalaia karana ita hegaegaelaia totona. Hereva ma haida, hegeregere gorere, buruka, bona mase be edena dala ai do idia ore momokani be gabeai oi herevalaia diba. Gau badana be unai tauna ia laloa bada gauna ita tahua bona Baibel ese unai ia herevalaia dalana ita hahedinaraia loulou.
4 Idia Laloparara: Ena be iseda hereva ita hakwadogia be namo, to siri tamona sibona ita duahia be hegeregere lasi. Satani be taunimanima edia lalona ia hadiburaia dainai sivarai namona idia lalopararalaia lasi. (2 Kor. 4:3, 4) Baibel idia diba namonamo taudia danu ese heduru idia abia be namo, unai amo Baibel idia lalopararalaia diba. (Kara 8:30, 31) Unai dainai, nega oi atoa siri oi herevalaia bona oi haheitalaia totona, Tiokratik Haroro Sikuli ai tok oi henia bamona. (Kara 17:3) Namona be unai tauna ia itaia ena mauri lalonai Dirava ena Hereva be mai anina bada.
5 Bema tau ta be ia dibaia gaudia ia moalelaia, emu vadivadi ta ta lalonai siri rua eiava toi oi gaukaralaia diba. Bona dala oi tahua Dahaka Ita Karaia? buklet eiava Diba bukana oi hahedinaraia totona. Unai dala ai, magasin rut ta be Baibel stadi ai oi halaoa diba.
[Study Questions]
1. Edena dala ai magasin rut ita gaukaralaia diba taunimanima edia ura ita habadaia totona?
2. Dahaka dainai hari inai negai taunimanima ese Iehova idia tahua be gau badana, bona dahaka ita karaia diba idia ita durua totona?
3. (a) Edena dala ai siri tamona herevalaia karana ita hegaegaelaia diba? (b) Emu teritori dekenai, taunimanima be dahaka idia laloa momo?
4. Dahaka dainai Baibel ita gaukaralaia neganai, ma haida ese idia lalopararalaia be gau badana, bona edena dala ai unai ita karaia diba?
5. Edena dala ai magasin rut be Baibel stadi ta ai oi halaoa diba?