Ma Haida Durua Mauri Davalaia Boubouna amo Namo Idia Abia April 12 ai Keriso Ena Mase Ena Memorial Do Ita Karaia
1 “Namona be Dirava ita hanamoa bada, iena hariharibada namo herea momokani dainai.” (2 Kor. 9:15) Unai siri hegeregerena, Dirava ese ena Natuna Iesu Keriso amo iena taunimanima dekenai kara namo bona hebogahisi-mai-lalokauna ia hahedinaraia dainai, ita ura Ia ita hanamoa eiava ia ita tanikiu henia. April 12 ai, Keriso ena mase ena Memorial totona ita hebou neganai, Dirava dekenai iseda tanikiu karana do ita hahedinaraia.
2 Lagani ta ta ai, taunimanima milioni ten bamona be Iehova ena hesiai taudia ida Memorial totona idia hebou. Unai amo Witnes lasi taudia ese Keriso ena boubou dainai edia tanikiu karana idia hahedinaraia. To namo idia abia totona, gau badana be unai boubou gauna idia abidadama henia. (Ioa. 3:16, 36) Edena bamona idia ita durua diba unai bamona abidadama idia hahedinaraia totona? Memorial ena hua lalonai, idia ita hagoadaia idia sibona edia Baibel stadi idia karaia bona pura ta ta ai kongrigeisen ena hebou dekenai idia mai. Henunai idia noho heduru herevadia mani ita laloa.
3 Baibel Stadi: Kamonai taudia be Memorial dekenai oi boiria mai neganai, namona be idia ida Baibel Hadibaia bukana amo stadi oi hamatamaia. Ia dekenai Memorial oi herevalaia totona, rau 206-8 oi kehoa bona inai hereva, “Lohiabada Ena Anibou—Dirava Ia Hanamoa Hebouna” oi herevalaia. Reana unai kahana be nega tamona eiava rua lalonai umui herevalaia diba, bona unai be iduara ai Baibel stadi dalana amo oi karaia diba. Unai kahana oi haorea murinai, reana unai tauna do ia ura karoa 5, “Mauri Davana—Dirava Ena Harihari Gauna Hereadaena,” umui herevalaia. Unai tauna ida Baibel stadi oi hamatamaia neganai, oi giroa lou bona unai buka ena karoa ginigunadia foa umui karaia.
4 Unai stadi dalana be daidia dekenai ita hahedinaraia diba? Reana emu gaukara turadia, sikuli turadia, eiava emu dekena taudia dekenai. Bema kongrigeisen taihu haida edia adavadia be Witnes lasi taudia, tadikaka be reana unai bamona taudia idia stadi henia diba. Bona emu Witnes lasi varavara oi laloaboio lasi. Bona guna kongrigeisen lalonai idia goada, to hari idia manoka taudia danu ita ura boiridia, Memorial hebouna dekenai idia mai totona. (Luka 15:3-7) Namona be unai bamona taudia ibounai ita durua mauri davalaia boubouna amo namo idia abia totona.
5 Kongrigeisen Heboudia: Baibel stiuden bona kamonai taudia idia lao henia hebou ginigunana be Memorial. To, edena dala ai idia ita durua iseda kongrigeisen ena hebou ma haida amo namo idia abia totona? April 2005 Iseda Basileia Gaukara, rau 8 ese inai heduru herevana ia gwauraia: “Pablik tok gabena ena sinado oi gwauraia. Gima Kohorona stadi bona Kongrigeisen Buka Stadi dekenai do ita stadilaia kahadia oi hahedinaraia. Tiokratik Haroro Sikuli bona Hesiai Hebou oi herevalaia. Sikuli ai oi be mai emu kahana neganai, reana ia ida oi hegaegaelaia hebou diba. Hebou ai idia gwauraia point namodia umui herevalaia hebou. Iseda buka lalodiai idia noho laulau amo idia oi durua, eda hebou gabunai idia karaia gaudia idia itaia totona. Nega ginigunana stadi umui hamatamaia neganai, idia umui boiria hebou dekenai idia mai totona.”
6 Kudou-maoro taudia ese Baibel stadi bona hebou idia reaia lasi neganai, nega momo idia be lauma dalanai idia goada idia lao haraga. Unai dainai, namona be ma haida ita hagoadaia Baibel stadi bona hebou idia laloa bada bona Dirava ena harihari gauna hereadaena—mauri davalaia boubouna—amo namo do idia abia.
[Study Questions]
1. Edena dala ta ai Dirava ena taunimanima be mauri davalaia boubou totona edia tanikiu karana idia hahedinaraia diba?
2. Daidia be Iehova ena hesiai taudia ida Memorial totona idia hebou, bona boubou gauna amo namo idia abia totona, dahaka idia karaia be namo?
3. Edena dala ai Memorial totona ita boiria taudia dekenai Baibel stadi ita hamatamaia diba?
4. Memorial ena hua lalonai, daidia dekenai Baibel stadi ita hahedinaraia diba?
5. Edena dala ai Baibel stiuden bona ma haida ita hagoadaia diba wiki ta ta ena kongrigeisen heboudia dekenai idia mai totona?
6. Edena dala rua amo kudou-maoro taudia ita durua mauri davalaia boubouna amo namo idia abia totona?