Dika Badana Totona Oi Hegaegae Vadaeni, A?
1 Lagani ta ta ai, tanobada hegegemadai taunimanima milioni momo, iseda Keristani tadikaka bona taihu danu, be tano marere, sunami, medu mai lai bada, volkeino ia pou bona abata badana dainai dika bada idia davaria. Unai bamona dika badadia be idia vara kava bona taunimanima ibounai dekenai ia vara diba dainai, aonega karana be ita hegaegae.—Aon. 21:5, NW.
2 Hegaegae Guna: Nega haida dika badana ia mai gwauraia neganai, gabu idia naria taudia ese hadibaia hereva idia henia guna. Unai bamona hadibaia hereva ita badinaia be mai anina bada. (Aon. 22:3) Unai bamona ia vara neganai, elda taudia be kongrigeisen taudia ibounai do idia haboua, unai dala amo heduru idia henia diba idia hegaegae totona. (Bema kongrigeisen eiava grup be elda lasi, sekit naria tauna eiava maduna ia abia tadikaka ta ese tadikaka bona taihu idia durua be namo idia hegaegae totona.) Dika badana ia vara murinai, elda taudia be kongrigeisen taudia ibounai do idia tahua bema ibounai be idia namo. Bema elda taudia be tadikaka edia noho gabu idia diba lasi, nega bada idia halusia kava diba idia tahudia totona. Unai dainai pablisa ibounai be kongrigeisen ena seketere bona edia buka stadi naria tauna dekenai edia adres bona telefon namba idia henia be namo.
3 Bema kongrigeisen be dika ia vara gabuna ai ia noho, elda taudia be pablisa taudia idia noia diba, edia varavara eiava turadia edia ladana bona telefon namba idia henia totona, unai amo dika ia vara neganai, unai taudia idia hadibaia diba. Unai amo gabu idia rakatania taudia idia davaridia haraga diba. Elda taudia be kongrigeisen totona palani ta idia karaia diba, hegeregere dika ia vara neganai, do idia gaukaralaia gaudia edia lista, gabu rakatania daladia, bona gorere bona buruka taudia be edena bamona do idia durudia idia palanilaia. Unai dala ita badinaia totona, ita gaukara hebou be mai anina bada.—Heb. 13:17.
4 Dika Badana Ia Vara Murinai: Emu noho gabuna dekenai dika badana ta ia vara neganai, dahaka oi karaia be namo? Namona be oi itaia emu ruma bese be tauanina dalanai heduru idia abia. Bema oi hegeregere, dika idia davaria taudia haida oi durua diba. Karaharaga emu buka stadi naria tauna eiava elda tauna ta oi hadibaia be namo. Ena be oi be dika ta oi davaria lasi, to namona be emu buka stadi naria tauna oi hadibaia. Bema heduru oi ura, emui tadikaka be dala do idia karaia oi idia durua totona. (1 Kor. 13:4, 7) Laloaboio lasi, Iehova be emu dabu gauna ia diba, unai dainai ia dekenai oi tabekau bona oi do ia durua. (Sal. 37:39; 62:8) Namona be dala ia kehoa neganai, Dirava ena Hereva amo taunimanima oi durua. (2 Kor. 1:3, 4) Namona be oiemu tiokratik daladia oi badinaia lou.—Mat. 6:33.
5 Ena be tanobada taudia be idia vara kava dika badadia dainai idia lalohekwarahi, to ita be mai abidadama ida iseda vaira negana ita naria diba. Daudau lasi, idia vara kava dika badadia be do idia ore momokani. (Apok. 21:4) To hari, hekwakwanai bona nega aukadia be idia vara kava dainai, ita noho hegaegae be namo, bona mai goada ida ma haida dekenai sivarai namona ita harorolaia.
[Study Questions]
1. Dahaka dainai dika badadia totona ita hegaegae be namo?
2. Dahaka dainai iseda telefon namba bona adres be elda taudia dekenai ita henia be gau badana?
3. Bema ita be dika ia vara gabuna dekenai ita noho, elda taudia ida edena bamona do ita gaukara hebou?
4. Iseda noho gabuna dekenai dika badana ta ia vara neganai, dahaka ita karaia be namo?
5. Dika badadia be idia vara kava dainai, Keristani taudia be dahaka idia karaia noho be namo?