Dirava amo Dava Bada Gauna ta Ita Abia
1 Dirava ese aposetolo Paulo dekenai haroro gaukara ia henia, bona Paulo ese unai gaukara ia laloa bada, ia dekenai unai be “dava bada” gauna bamona. (2 Kor. 4:7, NW ) Unai gaukara ia karaia dainai metau bona dagedage ia davaria. To taunimanima ibounai dekenai sivarai namona ia harorolaia. Paulo be tano bona davara ai kilomita tausen momo ia loaloa, bona dika idauidau ia hanaia. Edena bamona ita hahedinaraia diba, Paulo bamona haroro gaukara ita laloa bada? (Roma 11:13) Dahaka dainai iseda haroro gaukara be dava bada gauna bamona?
2 Dava Bada Gauna: Tanobada ena kohu be nega momo lalohisihisi ia havaraia, bona ena namo be ia noho daudau lasi. To, haroro gaukara ese ita bona ma haida dekenai noho hanaihanai hahenamo ia mailaia. (1 Tim. 4:16) Kudou maoro taudia ia durua Iehova idia diba, edia mauri idia haidaua, bona mauri hanaihanai helarona idia abia totona. (Roma 10:13-15) Bema iseda haroro gaukara ita laloa bada, iseda mauri be mai anina, bona vaira nega totona helaro namona ita abia.—1 Kor. 15:58.
3 Dava Bada Gauna Oi Laloa Bada: Gau ta dekenai ita halusia moni ena bada ese ia hahedinaraia, unai be dava bada gauna eiava lasi. Iseda nega bona goada ita gaukaralaia Iehova ita hanamoa totona be hahenamo badana! (Efe. 5:16, 17) Iseda nega ita gaukaralaia karana amo ita hahedinaraia, namona be iseda hetura karana Iehova ida ita laloa bada, to tauanina gaudia ita laloa bada lasi. Ita harorolaia sivaraina be dava bada gauna dainai, mai eda ura bada ida ita haroro, bona dala ia kehoa negadia ibounai sivarai namona ita gwauraia.
4 Dava bada kohudia be idia hunia lasi, to idia hahedinaraia ma haida ese idia itaia totona. Bema iseda haroro gaukara be dava bada gauna ta bamona ita laloa, iseda mauri lalonai ia be mai anina bada. (Mat. 5:14-16) Namona be hanaihanai aposetolo Paulo ena kara ita tohotohoa, bona nega namodia ibounai ita gaukaralaia, ma haida ita haroro henia totona. Unai amo ita hahedinaraia eda haroro gaukara be dava bada gauna ta bamona.