Tanobada Hegegemadai “Keriso Badinaia!” Distrik Hebouhebou Ena Boiboi Pepana Hariharilaia
Pablisa Ibounai ese Boiboi Pepana Do Idia Hariharilaia Lou
1 Lagani gunanai, boiboi pepana ita hariharilaia dainai, kamonai taudia momo be “Hahemauri be Kahirakahira!” Distrik Hebouhebou dekenai idia mai. Unai boiboi pepapepa idia abia bona hebouhebou dekenai idia mai taudia be edia nega ginigunana Iehova ena Witnes taudia ida lauma ariana idia moalelaia. (Isa. 65:13) Idia be Keristani tadikaka oreana edia hebamo namona idia moalelaia. (Sal. 133:1) Tanobada hegegemadai, “Keriso Badinaia!” Distrik Hebouhebou dekenai taunimanima momo ita boiria totona, ita be boiboi pepana do ita hariharilaia lou.
2 Lagani 2006 Ena Ripoti: Tanobada hegegemadai ena ripoti ese ia hahedinaraia boiboi pepana hariharilaia gaukarana dainai hutuma be “Hahemauri be Kahirakahira!” Distrik Hebouhebou dekenai idia mai. Gabu ta dekenai, dubu gunalaia taudia foa, hanua taudia momo be unai taudia idia diba, be iseda distrik hebouhebou dekenai idia mai. Hebouhebou ena program ia heau namonamo dainai, idia ese iseda tadikaka idia hanamoa. Idia mamia hebouhebou ai idia dibaia gaudia be mai anina bada hari inai nega totona. Papua New Guinea ena gunika hanuana ta dekenai, tau ta be reidio dekenai iseda hebouhebou ena boiboi herevana ia kamonai. Unai dina murinai, ia be hora faiv ia raka ela bona PMV abia gabuna dekenai ia ginidae. Bena PMV dekenai ia guia bona hebouhebou idia abia gabuna dekenai ia lao. Idia halasia buka matamatana ta ia abia bona dala idia karaia tadikaka ta ese ia vadivadi henia totona.
3 Kamonai taudia momo be distrik hebouhebou dekenai idia lao neganai, edia boiboi pepana danu idia abia lao. Kamonai taudia haida be gabu daudau amo idia mai. Tanobada hegegemadai, Iehova ena Witnes taudia edia gaukara goadagoada karana dainai, kamonai taudia momo idia mai bona namba ia bada daekau. Ai moale, badina Papua New Guinea ai lagani 2006 ena “Hahemauri be Kahirakahira!” Distrik Hebouhebou iboudiai nain dekenai taunimanima ibounai 10,459 idia mai. Unai namba ese namba gunadia ia hanaia, bona ia be nega ginigunana 10,000 ia hanaia—lagani gunadia edia namba be 25 pesen amo ia hanaia.
4 Do Umui Karaia Teritori: Hebouhebou ia do matamaia lasi neganai, wiki toi lalonai boiboi pepadia do ita hariharilaia. Namona be umui hekwarahi kongrigeisen ena teritori ibounai umui karaia haorea totona. Bema kongrigeisen ena teritori be ia bada, namona be wiki ginigabena lalonai, pablisa ibounai ese boiboi pepadia be mai aonega ida taunimanima idia noho lasi rumadia dekenai idia rakatania. Namona be kongrigeisen ibounai idia hekwarahi boiboi pepadia ibounai be edia teritori dekenai idia henia haorea totona. Bema pepa oredia idia noho, kongrigeisen ena painia taudia ese idia abia diba.
5 Hamatamaia Herevana: Reana inai bamona oi hereva diba: “Tanobada hegegemadai taunimanima dekenai inai boiboi pepana ai henia, hebou badana ta dekenai idia mai totona. Inai be oiemu kopi. Hereva ma haida be inai boiboi pepana dekenai oi davaria diba.” Namona be hereva momo oi gwauraia lasi, unai amo boiboi pepadia momo oi hariharilaia diba. To danu, bema ruma tauna be mai ena henanadai, namona be ena henanadai oi haerelaia. Bema ruma tauna ia kamonai namonamo, ena adres oi torea diba, bona oi giroa lou haraga be namo.
6 Unai dainai, gau badana be ita hekwarahi Keriso ita badinaia totona! (Ioa. 3:36) Lagani 2007 ena distrik hebouhebou ese ita ibounai do ia durua Keriso ita badinaia totona. Ita diba “Keriso Badinaia!” Distrik Hebouhebou ena boiboi pepana hariharilaia gaukarana ese anina namona do ia havaraia. Unai dainai, namona be oi gaukara goada taunimanima momo oi boiria totona. Tanobada hegegemadai boiboi pepana hariharilaia gaukarana be mai goada ida oi karaia neganai, Iehova ese oi do ia hanamoa.