Basileia ese Do Ia Havaraia Gaudia Ita Harorolaia
1 Inai nega dikana lalonai, taunimanima momo be Dirava ena Basileia idia abidadama henia lasi. (Efe. 2:12) Ma haida be idia laloa namonamo lasi dainai taga, tanobada lohia taudia, saiens, bona gau ma haida idia abidadama henia. To, ita be mai eda moale ida Dirava ena Basileia ese do ia havaraia gaudia ita naria noho, unai be “iseda mauri ena dogo gauna, ia be goada bona momokani”!—Heb. 6:19.
2 Dirava ena Basileia ia lohia neganai, tanobada be paradaiso ai do ia halaoa. Mase taudia do idia toreisi lou. (Kara 24:15) Ogogami, kara gageva, gorere, buruka, bona mase be do idia ore. (Sal. 9:18; Mat. 12:20, 21; Apok. 21:3, 4) Iehova ese unai gaudia ia gwauhamatalaia bona kahirakahira do ia hagugurudia. Edena gwauhamata oi ura itaia?
3 Sivarai Namona Harorolaia: Namona be Basileia ena sivarai namona be ma haida dekenai ita hadibaia noho. Dirava bona iseda dekena taudia ita lalokau henia dainai ita ura Iesu ita tohotohoa ‘ogogami taudia’ ita haroro henia totona, ‘idia guia taudia ita ruhaia totona, bona matakepulu taudia edia matana kehoa hereva do ita gwauraia, bona mai edia bero taudia dekenai mauri ita henia’ totona. (Luka 4:18) Aposetolo Paulo be maketi gabunai bona taunimanima ia davaria diba gabudia ai sivarai namona ia harorolaia. Ia be haroro gaukara ia laloa bada. (Kara 18:5) Paulo bamona, mai lalogoada ida haroro gaukara ita karaia neganai, lalohekwarahi bona kohu o moni ese iseda helaro do idia hadikaia lasi.—Mar. 4:19.
4 Ena be taunimanima dekenai Basileia sivaraina ita harorolaia neganai idia kamonai lasi eiava ita idia dagedage henia, to namona be idia dekenai Basileia ese do ia havaraia gaudia ita kikilaia. “Iseda helaro herevadia ita dogoatao auka, ita hesiku lasi.” (Heb. 10:23, BHğ) ‘Sivarai Namona dekenai ita hemarai lasi.’ (Roma 1:16) Ma haida ese iseda haheauka karana idia itaia neganai, unai ese idia ia durua diba sivarai namona idia abia dae totona.
5 Ena be taunimanima ita hamaoroa Baibel ena peroveta herevadia—tanobada ena toana ia dika ia lao herevadia—be idia guguru noho, to ita be unai gaudia sibona ita harorolaia lasi. To eda haroro hereva badana be Dirava ena Basileia ese do ia havaraia gaudia—o Basileia ena sivarai namona. Unai dainai, namona be unai sivarai namona ita harorolaia goadagoada, unai amo ‘ita naria noho davana namona, mauri hanaihanai, do ita abia momokani.’—Heb. 6:11.