Palani Karaia Baibel Stadi ta Oi Karaia Totona
1 “Emui matana umui abia isi, uma gabu umui itaia, anina be idia auka bona mage vadaeni, utua nega danu ia hegeregere.” (Ioa. 4:35) Hari inai negai idia noho Keristani taudia idia itaia Iesu ena hereva be momokani.
2 Iehova ena dala idia ura diba kudou-maoro taudia be ita do davaridia noho. Lagani ta ta iboudiai, hahediba taudia matamatadia idia bapatiso ena namba ese unai ia hamomokania. Bema oi ura bada Baibel stadi ta oi karaia, dahaka oi karaia be namo?
3 Palani Karaia: Gau ginigunana be, palani oi karaia Baibel stadi ta oi hamatamaia bona karaia noho totona. Haroro gaukara negadiai, unai palani oi laloa noho be namo. Iseda Keristani maduna be haroro gaukara sibona lasi to hahediba gaukarana ita karaia dainai, namona be ita ibounai ita hekwarahi Baibel stadi ta ita karaia totona.—Mat. 24:14; 28:19, 20.
4 Heduru Daladia Haida: Basileia idia harorolaia taudia ibounai idia guriguri be mai anina bada. Nega haida ita davaria taudia haida idia gwau, idia be Dirava idia noia Baibel idia lalopararalaia totona. Iehova ese ita ia gaukaralaia unai bamona taudia ita tahua bona hadibaia be hahenamo badana!—Hag. 2:7; Kara 10:1, 2.
5 Taihu ta be ia ura Baibel stadi ta ia davaria dainai, Iehova dekenai ia gurigurilaia, bena Oi Ura Baibel Do Oi Diba Namonamo, A? pepapepana be taunimanima ese idia itaia diba gabuna ta ai ia atoa. Hahine ta be unai pepapepa ta ia abia bona ia duahia, bena rau 6 ai ena ladana bona adres ia torea lalonai taihu ese ia hereva henia, bona unai negana ai Baibel stadi ta ia hamatamaia.
6 Baibel stadi idia hamatamaia bona karaia hanaihanai pablisa be oi idia durua diba unai bamona oi karaia totona. To, namona be Iehova dekenai unai oi gurigurilaia, bona heduru daladia idauidau oi gaukaralaia. Reana daudau lasi oi be Baibel stadi ta oi karaia neganai, do oi moale bada.