Baibel Stiuden Durua Pablisa ai Idia Lao Totona
1 Iesu ese ena hahediba taudia ia henia haheganina, Mataio 28:19, 20 dekenai be gaukara badana. Keriso ese ena hahediba taudia ia hamaoroa edia stiuden be hahediba taudia ai idia halaoa, unai amo edia stiuden ese unai gaukara do idia karaia danu. Unai dainai, hari inai nega dokona lalonai, tanobada hegegemadai, Dirava ena Basileia ena sivarai namona harorolaia taudia momo idia noho.—Mat. 24:14.
2 Ita stadi henia taudia haida be reana iseda natudia, eiava idia ura Baibel idia stadilaia taudia ma haida. Ita ura unai bamona taudia ita durua, unai amo do idia diba idia danu be mai edia maduna bona ma haida do idia durua Iesu ena hahediba taudia ai idia lao totona.—Luka 6:40.
3 Baibel Stiuden Durua Idia Haroro Totona: Namona be oi stadi henia taudia oi hagoadaia idia dibaia gaudia be ma haida dekenai idia herevalaia totona. Eiava haroro ena ekspiriens namodia be idia dekenai oi herevalaia. Emu natuna ia maragi neganai, ena diba hegeregerena haroro gaukara ai ruma tauna ia hereva henia dalana oi hadibaia. (Sal. 148:12, 13) Emu kara bona hereva amo oi hahedinaraia, emu mauri lalonai haroro gaukara be mai anina bada.—1 Tim. 1:12.
4 Iehova be ena taravatu maoromaorodia idia abia dae bona badinaia taudia sibona ia gaukaralaia. Ena be pablisa matamatadia be haroro gaukara dekenai idia manada momokani lasi, to namona be idia abia dae Baibel ena hahediba hereva badadia be ma haida dekenai idia herevalaia diba. (Orea bukana, rau 79-82 itaia.) Bema ta be tomadiho koikoi ia rakatania, politikol karadia ia durua lasi bona kongrigeisen hebou ibounai ia lao, ia be pablisa ai ia lao diba.—Apok. 18:2, 4; Ioa. 17:16; Heb. 10:24, 25.
5 Bema oi laloa emu Baibel stiuden ia hegeregere bapatiso lasi pablisa ai ia lao totona, vadaeni hakaua naria tauna oi hadibaia be namo. Ia ese elda rua do ia hadibaia oi bona emu Baibel stiuden ida umui herevahereva hebou totona, unai amo do idia itaia bema emu Baibel stiuden ia hegeregere bapatiso lasi pablisa ai ia lao diba eiava lasi. Bema ia be pablisa ai ia lao, vadaeni unai be nega namona haroro negadiai oi ia bamoa bona ena diba ia habadaia haroro gaukara ia manadalaia totona.