‘Sivarai Namona Do Ita Gwauraia Hedinarai’
1 Taunimanima haida be sivarai namona idia diba lasi dainai, iseda maduna be ‘Dirava ena hariharibada Sivarai Namona do ita gwauraia hedinarai.’ (Kara 20:24) Hegeregere, taunimanima do ita hadibaia kahirakahira “nega ena dokona” do ia ore bona Iehova ese kara maoromaoro tanobada matamatana do ia havaraia bona ‘gau gunadia be do idia ore.’ (2 Tim. 3:1-5; Apok. 21:4) Unai nega ai ta do ia gorere lasi. (Isa. 33:24) Mase taudia be do idia toreisi lou bona edia famili bona turadia ida do idia hedavari. (Ioa. 5:28, 29) Iehova ese tanobada ibounai be paradaiso ai do ia halaoa. (Isa. 65:21-23) Ita harorolaia sivarai namona ena kahana haida be unai!
2 March, April, bona May be hua namodia sivarai namona harorolaia gaukarana ita habadaia totona. Danu, tanobada hegegemadai, lagani ta ta ai ita karaia mai anina bada hebouna, Memorial unai, be Saturday, March 22 ai do ita karaia. Hari be nega namona ita hegaegae iseda haroro gaukara ita habadaia totona.
3 Heduru Painia: Emu sediual oi haidaua diba hua tamona, rua, eiava toi lalonai heduru painia oi karaia totona, a? Reana emu famili stadi umui karaia neganai, nega haida unai umui herevalaia hebou be namo. Unai amo idia ta o ibounai be heduru painia idia karaia diba. (Aon. 15:22) Namona be unai umui gurigurilaia, bona Iehova ese emui hekwarahi ia hanamoa dalana do oi itaia. (Aon. 16:3) Ena be famili lalonai ta do ia heduru painia lasi, to ibounai ese palani idia karaia edia haroro gaukara idia habadaia bona painia taudia ida idia gaukara hebou diba.
4 Ena be ful-taim moni gaukara oi karaia, to bema sediual namona oi karaia, oi heduru painia diba. Reana emu dina tubu horana oi gaukaralaia oi haroro totona. Eiava haroro naria tauna amo gwaumaoro oi abia emu ruma kahirakahira idia noho gabudia o gaukara gabuna be emu haroro teritori ai oi halaoa totona, bona dabai eiava gaukara murinai hora tamona lalonai oi haroro diba. Reana emu sediual dekenai anina maragi gaukaradia be hua ma ta ai oi atoa, unai amo wikeni ibounai lalonai oi haroro diba. Haida be edia gaukara amo dina ta eiava rua idia holide, unai amo unai dina lalonai idia haroro totona.
5 Ena be oi buruka o gorere, to heduru painia oi karaia diba bema dina ta ta ai miniti haida sibona oi haroro. Iehova oi guriguri henia, “siahu bada” ia henia totona. (2 Kor. 4:7) Taihu ta ena mauri lagani be 106, to ia be heduru painia gaukara ia karaia. Ena bese bona kongrigeisen tadikaka taihu ese ia idia durua ruma-ta-ruma-ta haroro gaukara ai, lou henia, Baibel stadi bona haroro gaukara ma haida ia karaia totona. Ia be taunimanima 10 dekenai Baibel stadi ia hamatamaia. Ia gwau, “heduru painia gaukara ena hahenamo lau laloa neganai, unai ese egu lalona ia hagoadaia Iehova, ena Natuna, bona Ena orea lau lalokau henia bona lau moalelaia totona. Unai dainai, lau ura Iehova lau tanikiu henia bada! ”
6 Bema oi do sikuli noho to oi bapatiso vadaeni, oi danu be heduru painia oi karaia diba. Ful-taim moni gaukara idia karaia taudia bamona, wikeni sibona oi gaukaralaia diba oi haroro totona. Reana sikuli murinai o dina ma haida ai hora ta eiava rua oi haroro diba. Emu sikuli holide ta ai haroro gaukara oi karaia diba, a? Bema oi ura oi heduru painia, namona be emu tama sina ida unai umui herevalaia.
7 Painia Urana Habadaia: Elda taudia edia kara amo kongrigeisen taudia idia hagoadaia painia urana idia habadaia totona. (1 Pet. 5:2, 3) Reana haroro ena hebou haida idia hegaegaelaia, unai amo daba ai, eiava sikuli bona gaukara murinai idia ura haroro taudia be unai grup idia bamoa diba. Haroro naria tauna ese ia itaia March, April, bona May totona haroro ena teritori, buka bona magasin idia hegeregere be namo, bona ia ese idia manada pablisa ia abia hidi haroro ena grup idia naria totona.
8 Kongrigeisen ta dekenai, hua haida do vaira ai, elda taudia be kongrigeisen taudia idia hagoadaia heduru painia idia karaia totona. Wiki ta ta ai kongrigeisen idia hadibaia pablisa hida be heduru painia gaukara do idia karaia. Haida be idia ura heduru painia idia karaia dainai, unai hadibaia hereva ese idia ia hagoadaia, badina idia diba kongrigeisen ai ma haida ida do idia gaukara hebou. Daba bona adorahi ena haroro hebou idia hegaegaelaia danu. Unai dainai, pablisa ibounai 53 be April ai heduru painia idia karaia, kahirakahira kongrigeisen taudia ibounai be heduru painia idia karaia!
9 Ma Haida Durua Idia Haroro Totona: Pablisa matamatadia bona memero kekeni be haroro gaukara ai idia manada pablisa ida idia gaukara hebou diba. Memorial negana ai unai bamona umui karaia be namo, badina kongrigeisen taudia momo be edia haroro gaukara do idia habadaia. Emu Baibel stiuden be ia goada ia lao bona ena mauri lalonai Dirava ena taravatu ia badinaia, a? Ena be emu natuna be ia do pablisa lasi to ia be haheitalai namona ia hahedinaraia bona orea lalonai ia goada ia lao, a? Bema idia ta be idia ura bapatiso lasi pablisa ai idia lao, bona oi laloa idia hegeregere, vadaeni namona be elda ta oi hadibaia. Hakaua naria tauna ese elda rua do ia abia hidi oi bona emu natuna o emu Baibel stiuden ida umui herevahereva totona.
10 March, April bona May be nega namona idia haroro lasi pablisa be kongrigeisen idia bamoa lou totona. Kongrigeisen Buka Stadi idia naria tadikaka bona elda ma haida ese idia haroro lasi pablisa taudia idia vadivadi henia be namo, bona idia boiridia haroro gaukara ai idia gaukara hebou totona. To bema nega daudau lalonai idia haroro lasi, elda rua ese idia hereva henidia guna be namo, unai amo do idia itaia, idia hegeregere idia haroro lou totona eiava lasi.—km 11/00 rau 3.
11 Memorial Totona Hegaegae: Iesu ena mauri davalaia boubouna be “Dirava ena hariharibada” karana. (Kara 20:24) Tanobada hegegemadai, taunimanima milioni momo be Saturday, March 22, dina ia diho murinai Keriso ena mase ena Memorial totona do idia hebou. Ita ura kudou-maoro taudia ita boiria bona durua, unai mai anina bada hebouna dekenai idia mai totona, badina unai hebou dekenai Iehova ena lalokau bona hariharibada karana do idia herevalaia.
12 Do oi boiria taudia edia ladana be lista ta ai oi torea. Bona unai lista dekenai emu varavara, dekena taudia, sikuli bona gaukara turadia, Baibel stadi gunadia bona matamatadia, bona oi lou henia taudia ibounai edia ladana oi torea. Bema oi boiria taudia be mai edia henanadai Memorial totona, Baibel Hadibaia bukana ena apendiks rau 206-8 ai ia noho hereva kwarana ‘Lohiabada Ena Anibou’ oi gaukaralaia be namo. Unai be Baibel stadi lalonai ita gaukaralaia bukana dainai, unai ese dala do ia kehoa Baibel stadi ta oi hamatamaia totona.
13 Taihu ta be ena lista dekenai taunimanima 48 edia ladana ia torea. Ia hereva henia tauna ena ladana ia makaia bona deit ia torea. Ia moale bada badina ia boiridia taudia 26 be Memorial totona idia mai! Sitoa ta ia biagua tadikaka ta be ena gaukara tauna ta ia boiria, bona unai tau be guna pris ta. Unai tau be Memorial dekenai ia lao bona hebou murinai ia gwau, “Inai hora tamona lalonai Baibel amo gau momo lau dibaia—Katolik dubu dekenai be lagani 30 lau noho to gau ta lau diba lasi.” Memorial ena hebou ia ore neganai, ia ura ta ese Baibel Hadibaia bukana amo ia stadi henia.
14 Memorial Ena Boiboi Pepadia Hariharilaia: Tanobada hegegemadai, Saturday, March 1 ia lao March 22 ai, ita be Memorial ena boiboi pepadia do ita hariharilaia. Pablisa ibounai be unai gaukara badana lalonai idia vareai be namo. Namona be ruma tauna dekenai boiboi pepana ita henia, to ena iduara dekenai ita rakatania lasi. To, bema emui haroro teritori be bada, elda taudia ese umui do idia hadibaia unai boiboi pepadia be taunimanima idia noho lasi rumadia dekenai umui rakatania totona. Wikeni ai magasin matamatadia do ita hariharilaia danu.
15 Memorial ena boiboi pepadia hariharilaia dinadia be momo lasi dainai, namona be hamatamaia hereva kwadogidia oi gaukaralaia. Mai moale ida ruma tauna oi hereva henia. Reana inai bamona oi hereva: “Inai pepa ai henia badina ai ura oi, emu famili, bona emu turadia be March 22 ai do ai karaia hebou badana ta dekenai umui mai. Inai be oi ai boiria pepana. Hereva ma haida be inai pepa dekenai idia noho.” To, ruma tauna be reana mai ena henanadai. Eiava reana Memorial ena boiboi pepana ia abia dae bona ia gwau ia ura mai. Namona be noutbuk dekenai ena ladana oi torea, gabeai oi lou henia totona.
16 Lagani 2007 ai, ami tauna ta ese ena ruma iduarana dekenai Memorial ena boiboi pepana ta ia davaria. Ia ura ia lao to ena bosi amo gwaumaoro ia abia guna be namo. Unai boiboi pepana be ena bosi dekenai ia hahedinaraia neganai, bosi ia gwau iena tama sina danu be Iehova ena Witnes taudia, bona guna idia ida kongrigeisen heboudia ia lao. Unai dainai, ami tauna dekenai gwaumaoro ia henia sibona lasi to ia bamoa unai Memorial dekenai idia lao totona!
17 Iehova Tanikiu Henia: Lagani 2008 ena Memorial negana ia do ginidae lasi lalonai, Iehova ese ita ta ta totona ena hariharibada karana ia hahedinaraia dalana ita laloa be namo. Aposetolo Paulo ia gwau: “Umui ai noia goada inai bamona, ‘Umui ese Dirava ena hariharibada umui abia vadaeni, be umui negea kava lasi.’ ” (2 Kor. 6:1) Edena dala ai ita hahedinaraia ita be Dirava ena lalokau karana ita laloa bada? Paulo ia gwau: “To aiemai kara ibounai dekena amo ai hedinaraia ai be Dirava ena hesiai taudia.” (2 Kor. 6:4) Unai dainai, haroro gaukara ita karaia goadagoada bona iseda kara amo ita hahedinaraia, ita be Iehova ena harihari gauna ita laloa bada bona ia ita tanikiu henia. Inai lagani ena Memorial negana ia do ginidae lasi lalonai, namona be iseda haroro gaukara ita habadaia, unai amo gabu ibounai dekenai sivarai namona do ita gwauraia hedinarai.
[Study Questions]
1. Taunimanima dekenai dahaka sivarai namodia ita harorolaia?
2. Dahaka dainai Memorial negana be nega namona sivarai namona ita harorolaia totona?
3. Dahaka ese ita ia durua diba ruma bese ida haroro gaukara ita habadaia totona?
4. Bema ful-taim moni gaukara ita karaia, edena dala ai eda sediual ita haidaua heduru painia ita karaia totona?
5. Idia buruka eiava gorere taudia be edena bamona oi durudia diba idia heduru painia totona?
6. Edena dala ai ia sikuli noho tadikaka o taihu ta be heduru painia ia karaia diba?
7. Memorial negana ai, elda taudia be dahaka idia karaia kongrigeisen taudia idia hagoadaia totona?
8. Kongrigeisen ta ena ekspiriens amo dahaka ita dibaia?
9. Dahaka dainai Memorial negana be nega namona ma haida ita durua sivarai namona idia harorolaia matamaia totona?
10. Idia haroro lasi pablisa be elda taudia ese edena bamona idia durua diba?
11. “Dirava ena hariharibada” karana be dahaka?
12. Memorial dekenai daidia ita boiria be namo?
13. Pablisa rua idia hekwarahi ma haida be Memorial dekenai idia boiria dainai, Iehova ese edena dala ai idia ia hanamoa?
14. Tanobada hegegemadai, March 1 ai dahaka gaukara do ita karaia matamaia?
15. Memorial ena boiboi pepadia ita henia neganai, dahaka ita gwau diba?
16. Edena ekspiriens ese ia hahedinaraia, Memorial ena boiboi pepadia hariharilaia karana be mai ena namo?
17. Edena dala ai ita hahedinaraia ita be Dirava ena hariharibada karana ita laloa bada?
[Box on page 3]
Daidia Danu be Heduru Painia Idia Karaia Diba?
◼ Ruma bese taudia
◼ Ful-taim moni gaukara idia karaia taudia
◼ Idia gorere bona buruka taudia
◼ Idia sikuli taudia
[Box on page 4]
Memorial Ena Boiboi Pepana Ita Hariharilaia Neganai:
◼ Hereva kwadogina gwauraia; mai ura bada ida hereva
◼ Kamonai taudia edia ladana torea bona lou henidia
◼ Wikeni ai magasin hariharilaidia