Henanadai Mauana

◼ Bema tomadiho oreana ta be mai ena hospital, Iehova ena Witnes taudia be unai hospital dekenai medikol heduru idia abia be maoro, a?

Tomadiho oreadia haida be mai edia hospital, gorere taudia dekenai medikol heduru idia henia totona. Nega momo unai bamona hospital be Babulonia Badana ena tomadiho karadia habadaia totona idia haginia lasi. (Apok. 18:​2, 4) To, reana idia be bisinesi ta bamona idia haginia, unai amo moni idia abia diba. Hari inai negai, hospital haida dekenai be tomadiho ena ladana idia torea sibona, to hospital ma haida dekenai fada eiava sista be gaukara momo idia karaia danu.

Bema Iehova ena Witnes tauna ta ia ura medikol heduru ia abia, vadaeni ia sibona abia hidi ia karaia, ia be unai hospital dekenai medikol heduru ia abia o lasi. Reana Witnes tauna ta ena lalomamina dekenai unai hospital ia lao be kerere lasi, to ma ta ena lalomamina dekenai unuseniai ia lao be kerere. (1 Tim. 1:5) Reana Witnes tauna be gau haida dainai unai hospital dekenai ia lao, bona unai gaudia mani ita kikilaia.

Hegeregere, reana tomadiho oreana ta ena hospital sibona be unai gabu kahirakahira dekenai ia noho. Eiava ena be hospital ma ta danu be unai gabu dekenai ia noho, to reana tomadiho oreana ena hospital sibona be gorere taudia idia durua namonamo. Eiava tomadiho oreana ena hospital sibona dekenai be muramura maorodia, doketa maorodia o ivaia doketa idia noho. Gabu haida ai tomadiho oreana ena hospital dekenai idia gaukara taudia be ta ena tomadiho ena lalohadai, hegeregere rara ia abia dae lasi lalohadaina be idia matauraia, to hospital ma haida be unai bamona lasi. Abia hidi oi karaia neganai, unai gau haida oi laloa be namo.

Bema tomadiho oreana ta ena hospital dekenai oi lao medikol heduru oi abia totona, idia ese oi idia durua bona oi ese edia gaukara ena davana oi karaia be maoro. Haheitalai be inai: Bema tomadiho oreana ta ena sitoa ta ai oi be kohu ta oi hoia, emu moni be unai tomadiho koikoina ena gaukara ia durua, a? Lasi, to oi henia monina be oi abia kohu ena davana sibona.

To oi be Keristani tauna dainai, unai bamona negadia ai oi naria namonamo danu, namo lasi tomadiho koikoi karana ta oi karaia. Danu, namo lasi unuseniai idia gaukara taudia o idia vadivadi taudia edia ladana oi gwauraia “Fada” o “Sista.” (Mat. 23:9) Namona be oi laloatao: Oi be medikol heduru oi abia totona unuseniai oi lao, gau ma ta lasi.

Tomadiho oreana ta ena hospital dekenai oi noho neganai, namona be oi hahedinaraia oi be Iehova ena Witnes tauna o hahinena ta, bona oi ura emu kongrigeisen elda taudia be oi idia vadivadi henia. Unai amo, elda taudia be oi do idia vadivadi henia bona hagoadaia noho.​​—1 Tes. 5:​14.

Ita ta ta ese unai point idauidau ita laloa guna be namo, bena abia hidi ita karaia diba edena hospital dekenai medikol heduru do ita abia.​​—Gal. 6:5.