Edena Bamona Do Oi Haere?
1. Bema ta ese henanadai ta ia henia, dahaka dainai Iesu ena haheitalai ita tohotohoa be namo?
1 Iesu ese taunimanima edia henanadai idauidau ia haerelaia dalana be hari inai negai momo ese idia laloa bada. Iseda haroro gaukara ai taunimanima ese henanadai idauidau idia henia neganai, edia henanadai haerelaia dalana dekenai Iesu ena haheitalai ita tohotohoa be namo.—1 Pet. 2:21.
2. Dahaka ese ita do ia durua henanadai ta ena haere maorona ita henia totona?
2 Kamonai Namonamo Guna: Iesu be ta ese ia gwauraia henanadai ena badina ia laloa namonamo guna. Nega haida henanadai momo ita henia henanadai tauna ena lalohadai ita diba totona. Ta ese inai bamona henanadai, “Oi be Iesu oi abia dae, a?” ia henia neganai, reana ia ura diba dahaka dainai oi be Krismas oi hahelagaia lasi. Bema henanadai ia henia tauna ese ia laloa bada gauna oi lalopararalaia, ia ida oi herevahereva namonamo diba.—Luka 10:25-37.
3. Dahaka gaudia haida idia noho, unai ese ita ia durua Baibel amo haere maorodia ita henia totona?
3 Baibel amo Haere Henia: Dala namona be, Baibel ita gaukaralaia taunimanima edia henanadai ita haerelaia totona. (2 Tim. 3:16, 17; Heb. 4:12) Herevalaia bukana bona buklet ladana “Baibel Ena Hereva Badadia” ese ita ia durua haere maorodia ita henia totona. Ena be henanadai ia henia tauna ese Baibel ia abia dae lasi, to reana mai aonega ida Baibel ena hadibaia herevadia be ia dekenai oi hahedinaraia. Unai tauna oi hagoadaia Baibel lalonai idia noho hereva namodia ia laloa bada totona. Iesu oi tohotohoa karana amo haere maorodia oi henia diba, “golo apolodia siliva boseadia lalonai bamona,” bona taunimanima ia durua diba.—Aon. 25:11, BHğ.
4. Edena bamona negadiai, henanadai ibounai edia haere ita henia lasi be namo?
4 Henanadai Ibounai Ita Haerelaia, A? Bema henanadai ta ena haere oi diba lasi, oi hemarai lasi, to oi gwau: “Unai henanadai ena haere lau diba lasi, to tahua karana lau karaia bona do lau giroa mai emu henanadai haerelaia totona.” Mai manau ida unai bamona oi hereva bona iena namo oi laloa bada karana ese ruma tauna ena lalona do ia veria, bona do ia ura oi giroa lou. To, bema oi itaia ruma tauna be ia ura hepapahuahu ia havaraia, vadaeni namona be Iesu ena haheitalai oi tohotohoa bona herevahereva karana oi hakwadogia. (Luka 20:1-8) Unai hegeregerena, bema hereva momokani ia laloa bada lasi tauna ta ia ura oi ia hepapahuahu henia, namona be mai manau ida herevahereva karana oi koua bona emu nega oi gaukaralaia kudou-maoro taudia ma haida oi tahua totona.—Mat. 7:6.
5. Henanadai haerelaia karana dekenai, Iesu be dahaka haheitalai namona ia hahedinaraia?
5 Iesu ia diba Iehova dekenai ia tabekau be gau badana, unai amo “hereva momokani gwauraia hedinarai” gaukarana do ia hagugurua bona taunimanima edia henanadai ia haerelaia. (Ioa. 18:37) “Mauri hanaihanai idia ura kudou-maoro taudia” edia henanadai ita haerelaia karana amo Iesu ita tohotohoa be hahenamo ta!—Kara 13:48, NW.