Emu Baibel Stiuden Totona ‘Emu Mauri Oi Henia’
1. Dahaka ita karaia be namo Baibel stiuden ita durua totona?
1 Emu Baibel stiuden oi durua ela bona Dirava ia gwauhamata henia totona, stadi sibona oi karaia be hegeregere lasi. Aposetolo Paulo be ia hadibaia taudia ia tura henia karana ia herevalaia neganai, ia gwau ia be sina ta ese ena natuna ia ubua bona naria bamona ia kara henidia. Ita danu ita ura ‘iseda mauri ita henia,’ eda Baibel stiuden ita durua edia hetura karana Dirava ida ia goada ia lao totona.—1 Tes. 2:7-9.
2. Dahaka dainai Baibel stiuden ita laloa bada be namo, bona edena dala ai unai ita hahedinaraia?
2 Oi Laloa Bada: Baibel stiuden be ia dibaia gaudia ia badinaia neganai, ena lalomamina ese do ia veria Baibel ena taravatu idia badinaia lasi turadia ia rakatania totona. (1 Pet. 4:4) Reana ena ruma bese ese idia dagedage henia. (Mat. 10:34-36) Unai bamona ia vara neganai, ita be iena turana ai ita lao bona ia ita hagoadaia be namo. Misinari tadikaka ta ia gwau: “Stadi murinai, stadi tauna ena ruma oi rakatania haraga lasi. Bema hegeregere, nega sisina lalonai ia ida oi helai bona umui herevahereva.” Namona be oi hegaegae dala namodia ai emu Baibel stiuden oi durua totona. Hegeregere, bema ia gorere, oi rini henia o oi vadivadi henia, a? Hebou gabudiai oi be emu Baibel stiuden ida oi helai, bona oi durua ena natudia oi naria totona, a?
3. Edena dala ai iseda Baibel stiuden ita durua kongrigeisen amo goada ia abia totona?
3 Kongrigeisen amo Heduru Idia Abia: Bema haroro gaukara ena teritori be emu Baibel stiuden ena ruma kahirakahira, reana ia oi vadivadi bona emu bamoa tadikaka taihu ia hedavari henia diba. Bema ia hegeregere, nega ta ta ai pablisa idauidau, hegeregere elda taudia oi boiria emu stadi dekenai oi idia bamoa totona. Danu, stadi ta oi hamatamaia murinai, namona be hebou totona Kingdom Hall dekenai oi boiria mai. Unai amo ia be tadikaka taihu edia hebamo karana ia moalelaia, idia ese do idia hagoadaia bona iena ruma bese taudia bamona do idia lao.—Mar. 10:29, 30; Heb. 10:24, 25.
4. Edena dala ai Iseda gaukara be anina namona ia havaraia diba?
4 Tama o sina ta be ia hekwarahi bada ena natudia ia durua bona idia ese Iehova idia abidadama henia bona hereva momokani idia badinaia neganai, ia moale bada. (3 Ioa. 4) Ita be unai bamona moale ita abia diba, bema eda Baibel stiuden totona eda mauri ita henia.