‘Sivarai Namona be Do Idia Harorolaia’!
1. Edena bamona ita diba ta ese haroro gaukara ia koua diba lasi?
1 Iehova be ena ura ia hagugurua diba, ta ese do ia koua lasi. (Isa. 14:24) Ena be tuari dekenai Hahemaoro Tauna Gideona bona ena tatau 300 ese Midiana taudia 135,000 idia halusia be auka, to Iehova ese Gideona ia hamaoroa: “Israela be Midiana taudia edia siahu dekena amo do oi hamauria. Lau ese oi lau siaia inai.” (Gun. 6:14) Hari inai negai, Iehova be edena gaukara ia durua? Iesu ia gwau: “Basileia ena Sivarai Namona be tanobada ibounai dekenai do idia harorolaia.” (Mat. 24:14) Unai gaukara ita karaia neganai, ta ese do ia koua lasi!
2. Dahaka dainai ita diba momokani haroro lalonai Iehova ese ita ta ta do ia durua?
2 Iehova ese Ita Ta Ta Ia Durua: Ita diba momokani Iehova be ena Witnes oreana sibona lasi, to ita ta ta do ia durua danu, ani? Aposetolo Paulo ia lalohisihisi negana ta ai, Iehova be ena Natuna, Iesu amo Paulo ia hagoadaia. (2 Tim. 4:17) Unai hegeregerena, namona be ita diba momokani, Iehova be ita ta ta do ia durua ena ura ita hagugurua totona.—1 Ioa. 5:14.
3. Edena negai Iehova be ita ia durua?
3 Dina ta ta ai tauanina durua gaudia totona oi hekwarahi dainai, oi hesiku haroro gaukara oi karaia totona, a? “Manoka bona hesiku taudia be Lohiabada ese ia hagoadaia noho.” (Isa. 40:29-31) Dagedage oi davaria, a? “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua.” (Sal. 55:22) Nega haida haroro totona oi gari, a? “Oi lao. Lau be oiemu hereva do lau durua.” (Eso. 4:11, 12) Oi gorere dainai, emu goada ia hegeregere lasi oi haroro totona, a? Iehova ese oi ia laloa bada bona oi ia gaukaralaia diba, herevana emu goada ena bada be edena bamona.—1 Kor. 3:6, 9.
4. Ita diba Iehova be ita do ia durua dainai, dahaka ita karaia be namo?
4 Iehova ena imana “ia abia isi vadaeni, be daika ese ia atoa lou diba?” (Isa. 14:27) Ita diba Iehova be iseda hesiai gaukara do ia durua dainai, ita hesiku lasi to mai gari lasi ida iseda haroro gaukara ita karaia noho.—Kara 14:3.