“Oi be Painia Namona ai Do Oi Lao!”

1. Taihu ta ese ena painia gaukara be edena bamona ia laloa?

¹ Kathe B. Palm ia gwau: “Painia gaukara be gaukara hereadaena, unai gaukara amo hahenamo momo bona moale korikori lau davaria.” Unai taihu be lagani momo lalonai painia gaukara ia karaia bona Chile, South America dekenai, ma haida ia haroro henia. Reana ta be oi dekenai ful-taim hesiai gaukara ena hahenamo idauidau ia herevalaia, bena oi ia hamaoroa: “Oi be painia namona ai do oi lao!”

2. Dahaka dainai Iehova tomadiho henia karadia amo moale korikori ita davaria diba?

² Mauri Dalana Hereadaena: Haheitalai namona ia hahedinaraia tauna, Iesu, be ena Tamana ena ura ia karaia neganai, moale ia davaria. (Ioa. 4:​34) Unai dainai, mai moale ida ia ese ena hahediba taudia ia hadibaia, taunimanima ese Iehova tomadiho henia karadia idia karaia neganai, moale korikori idia davaria. Iehova ese ia moalelaia karadia ita karaia neganai, ita moale bada. Danu, ma haida durua totona, iseda nega, goada, bona kohu ibounai ita gaukaralaia neganai, unai ese iseda moale ia habadaia.​​—Kara 20:​31, 35.

3. Haroro gaukara dekenai nega bada ita atoa neganai, dahaka anina namona ita moalelaia?

³ Bema nega bada ita atoa ita haroro totona, Baibel stadi momo ita hamatamaia bona stadi karaia noho ena moale do ita mamia danu. Herevana iseda teritori haida dekenai ruma taudia momo idia ura lasi kamonai, to haroro gaukara karaia namonamo dalana ita manadalaia neganai, do ita davaria unai teritori dekenai kamonai taudia haida idia noho. Painia taudia be Painia Gaukara Sikuli ai idia dibaia gaudia idia gaukaralaia diba​—lagani tamona lalonai painia gaukara idia hagugurua painia taudia matamatadia be unai sikuli dekenai idia lao diba. (2 Tim. 2:​15) Mai haheauka ida hereva momokani ena uhe ita hadoa noho be namo, reana gabeai ita hadoa gauna do ia tubu namonamo bona huahua do ia atoa.​​—Had. 11:6.

4. Kahirakahira sikuli do idia haorea matamata taudia ese dahaka idia laloa be namo?

⁴ Matamata Taudia: Ena be oi sikuli noho, to vaira negana ai do oi karaia gaudia oi lalohadailaia vadaeni, a? Ema bona hari, reana emu sikuli gaukaradia be momo dainai, emu nega bada be unuseniai oi gaukaralaia. To sikuli oi haorea murinai, emu nega be edena bamona do oi gaukaralaia? Namona be moni gaukara oi atoa guna lasi, to regula painia gaukara oi gurigurilaia bona oi karaia. Painia gaukara amo do oi dibaia gaudia​—taunimanima idauidau oi do haroro henia, koua gaudia do oi hanaia, sibona emu ura do oi biagua, bona hadibaia dalana do oi hanamoa​—​ese emu mauri ibounai lalonai namo bada do ia havaraia.

5. Edena dala ai tama sina bona kongrigeisen taudia ese ma haida idia hagoadaia painia gaukara idia karaia totona?

⁵ Tama sina e, emui natudia umui durua ful-taim hesiai gaukara idia abia hidi totona, a? Emui hereva bona kara amo emui natudia umui durua diba Basileia idia tahua guna totona. (Mat. 6:​33) Ray be haisikuli ia haorea murinai painia gaukara ia hamatamaia, bona ia gwau: “Egu sinana be hanaihanai lau ia hamaoroa painia gaukara be mauri dalana hereadaena.” Namona be kongrigeisen taudia ibounai ese edia kara bona hereva amo matamata taudia idia hagoadaia diba painia gaukara idia karaia totona. Spain tadikaka ta ladana, Jose, ia gwau: “Egu kongrigeisen taudia idia laloa painia gaukara be gaukara hereadaena matamata taudia totona. Edia hereva sibona amo lasi to edia heduru karadia ese lau idia hagoadaia painia gaukara lau karaia totona.”

6. Bema ita ura lasi painia gaukara ita karaia, dahaka ita karaia diba?

⁶ Koua Gaudia Hanaia: Reana oi gwau, ‘Lau ura lasi painia gaukara lau karaia.’ Bema emu hereva be unai bamona, vadaeni guriguri amo Iehova dekenai emu hemami oi herevalaia bona oi hamaoroa, ‘Lau daradara painia gaukara lau karaia be namo o lasi, to lau ura oi moalelaia karadia lau karaia.’ (Sal. 62:8; Aon. 23:26) Bena Baibel bona iena orea ese idia halasia bukadia amo Iehova ena lalohadai oi tahua. Regula painia taudia momo be matamanai heduru painia idia “mamia toho” guna, bona unai gaukara amo moale idia mamia neganai, unai ese edia lalona ia doria regula painia gaukara idia karaia totona.​​—Sal. 34:​8, BHğ.

7. Bema ita laloa ita be hegeregere lasi hua ta ta ai hora 70 ita hagugurua totona, vadaeni edena dala ai unai koua gauna ita hanaia diba?

⁷ Bema oi laloa oi be hegeregere lasi hua ta ta ai hora 70 oi hagugurua be edena bamona? Bema painia taudia haida edia noho dalana be emu noho dalana hegeregerena, vadaeni edia heduru oi tahua. (Aon. 15:22) Bena sediual idauidau oi torea. Reana do oi davaria unai hora oi hagugurua diba, bema anina lasi karadia haida oi dadaraia bona nega bada oi henia haroro totona.​​—Efe. 5:​15, 16.

8. Dahaka dainai nega haida eda noho dalana ita tahua namonamo be namo?

⁸ Emu Noho Dalana Oi Itaia Lou: Nega momo eda noho dalana be ia idau. Unai dainai, namona be nega haida iseda noho dalana ita tahua namonamo. Hegeregere, oi be kahirakahira emu moni gaukara amo do oi ritaea, a? Randy, ena moni gaukara amo ia ritaea, bona ia gwau: “Unai ese dala ia kehoa lau bona egu adavana ida painia gaukara ai karaia matamaia, bona pablisa be momo lasi gabudiai dekenai ai lao haroro totona. Unai abia hidi lau karaia dainai, hahenamo momo lau davaria, bona hahenamo hereadaena be egu lalomamina ia namo.”

9. Headava taudia be dahaka idia laloa be namo?

⁹ Headava taudia haida be edia noho dalana idia tahua namonamo murinai, idia davaria idia ruaosi ese moni gaukara idia karaia be anina lasi. Unai ena anina be, edia noho dalana do idia haidaua be gau badana, to gabeai hahenamo momo do idia abia. John ena hahine be ful-taim moni gaukara amo ia doko ena haroro gaukara ia habadaia totona. John ia gwau: “Lau moale bada badina egu adavana be hanaihanai Iehova ena hesiai gaukara ia karaia.”

10. Dahaka ese Keristani taudia ia doria painia gaukara idia laloa totona?

¹⁰ Lalokau Bona Abidadama Hahedinaraia: Iehova ese haroro gaukara hereadaena be ita dekenai ia henia. Kahirakahira Dirava ese inai nega dikana do ia haorea, bona Iehova ena ladana ai idia boiboi taudia sibona be hahemauri do idia abia. (Roma 10:​13, NW ) Iehova ita lalokau henia bona ita dekenai ia karaia karana ita laloa dainai, unai ese ita ia doria iena Natuna ena oda ita badinaia bona ita haroro goadagoada. (Mat. 28:​19, 20; 1 Ioa. 5:3) Ita be abidadama taudia dainai ita abia dae ita be nega dokona lalonai ita noho, bona unai ese ita ia doria nega kwadogina lalonai haroro gaukara ita goadalaia bona tanobada gaudia ita gaukaralaia guguru lasi.​​—1 Kor. 7:​29-​31.

11. Bema ta ese oi ia hamaoroa, oi be painia namona ai do oi lao, unai hereva be edena bamona ita laloa be namo?

¹¹ Regula painia gaukara be orea ese ia makaia horana ita hagugurua gaukarana sibona lasi, to unai be Dirava ita badinaia karana. Unai dainai bema ta ese oi ia hamaoroa, oi be painia namona ai do oi lao, unai be hereva namona. Danu, namona be mai guriguri ida inai oi laloa: ‘Painia gaukara lalonai lau vareai be namo, unai amo painia gaukara idia moalelaia taudia ida lau gaukara hebou.’

[Blurb on page 4]

Tama sina e, emui natudia umui durua ful-taim hesiai gaukara idia abia hidi totona, a?

[Blurb on page 7]

Iehova ese haroro gaukara hereadaena be ita dekenai ia henia.