Iseda Haroro Gaukara Lalonai Ita Haheauka be Namo
1. Edena dala ai Iehova ese taunimanima dekenai haheauka karana ia hahedinaraia?
1 Dirava be taunimanima dekenai haheauka karana ia hahedinaraia. (Eso. 34:6; Sal. 106:41-45; 2 Pet. 3:9) Tanobada hegegemadai Basileia harorolaia gaukarana be Iena haheauka karana ia hahedinaraia dala badana ta. Lagani 2,000 bamona lalodiai, Iehova be taunimanima dekenai ia haheauka, bona kudou-maoro taudia ia veria mai noho. (Ioa. 6:44) Edena dala ai iseda haroro gaukara lalonai Iehova ena haheauka karana ita tohotohoa diba?
2. Edena dala ai iseda teritori ai haheauka karana ita hahedinaraia?
2 Ruma-Ta-Ruma-Ta Haroro Gaukara: Kamonai taudia ita do davaria lasi gabudia ai haroro gaukara ita “hadokoa lasi,” unai amo Iehova ena haheauka karana ita tohotohoa. (Kara 5:42) Ena be taunimanima idia ura lasi kamonai, ita idia kirikirilaia, bona idia dagedage, to mai haheauka ida haroro gaukara ita karaia noho. (Mar. 13:12, 13) Danu, ena be kamonai taudia be edia ruma ai ita davaria be auka, to ita hekwarahi hereva momokani ena uhe ita dairia neganai, ita be haheauka karana ita hahedinaraia.
3. Lou henia bona Baibel stadi ita karaia neganai, dahaka dainai ita haheauka be namo?
3 Baibel Stadi: Ita hadoa gauna ia tubu totona ita haheauka be mai anina bada. Ena be ita hadoa gauna ita naria namonamo, to ena tubu karana ita haharagaia diba lasi. (Iam. 5:7) Unai hegeregerena ta be hahediba tauna ai do ia lao haraga lasi. (Mar. 4:28) Ita stadi henia taudia ese tomadiho koikoi ena hahediba herevadia bona Baibel ese ia taravatua kastom karadia idia dadaraia be mai ena hekwarahi. Namo lasi idia ita doria edia mauri lalonai gau haida idia haidaua haraga totona. Namona be ita haheauka bona nega ita henia, stadi tauna ena lalona ai Dirava ena lauma ia gaukara totona.—1 Kor. 3:6, 7.
4. Edena dala ai haheauka karana ese ita ia durua Witnes lasi varavara ita haroro henia totona?
4 Witnes Lasi Varavara: Ena be ita ura dikadika eda Witnes lasi varavara be hereva momokani do idia dibaia, to namona be ita haheauka bona nega maorona ai eda abidadama be idia dekenai do ita herevalaia, danu ita naria namonamo idia dekenai gau momo ita herevalaia bena do idia hesiku garina. (Had. 3:1, 7) To hari, gau badana be haheitalai namona ita hahedinaraia bona ita noho hegaegae mai hemataurai bona manau ida iseda abidadama ita gwauraia totona. (1 Pet. 3:1, 15) Momokani, iseda haroro gaukara lalonai ita haheauka neganai, anina namona do ia vara bona iseda guba Tamana ita hamoalea diba.