Emu Natudia Idia Hegaegae Vadaeni, A?
1. Dahaka dainai sikuli natudia idia hegaegae be namo?
1 Lagani ta ta ai sikuli ia matamaia neganai, emu natudia be hahetoho bona hekwakwanai matamatadia idia davaria. Danu, idia dekenai dala matamatadia idia kehoa ‘hereva momokani idia gwauraia hedinarai’ totona. (Ioa. 18:37) Oi diba momokani idia hegaegae vadaeni, a?
2. Emu natudia idia hegaegae totona, dahaka idia diba be namo?
2 Emu natudia be bese abia isi bona tomadiho koikoi edia holidei karadia edia anina, bona unai karadia lalonai idia vareai be kerere ena badina idia lalopararalaia, a? Edukeisen badana tahua, mero o kekeni tura henia, bona alkahol o drag gaukaralaia karadia dekenai, bema haida ese idia doria, idia hegaegae vadaeni unai idia hanaia totona, a? Eiava do idia gwau sibona unai bamona karadia be edia tomadiho ese ia taravatua, a? Eiava idia diba edena bamona idia abia dae gaudia do idia herevalaia, a?—1 Pet. 3:15.
3. Edena dala ai tama sina ese Ruma Bese Ena Tomadiho negana idia gaukaralaia natudia idia hahegaegaea totona?
3 Ruma Bese Ena Tomadiho Negana Gaukaralaia: Momokani, sikuli ena lagani ibounai lalonai, natudia be hekwakwanai matamatadia idia davaria neganai, reana do oi ura unai gaudia umui herevalaia. Bema oi hekwarahi lagani ta ta ai sikuli ia do matamaia lasi lalonai, emu natudia ese do idia davaria hekwakwanai umui herevalaia hebou, vadaeni idia be sikuli ai do idia gari lasi. Namona be Ruma Bese Ena Tomadiho negadia ta o haida oi gaukaralaia, unai gaudia umui herevalaia totona. Reana emu natudia oi nanadaia sikuli dekenai idia giroa lou lalohadaina idia abia neganai, dahaka gaudia idia lalohekwarahilaia bada. Hari edia mauri lagani ia bada bona edia laloparara ia bada ia lao dainai, lagani gunadia ai umui herevalaia gaudia umui riviulaia diba. (Sal. 119:95) Danu natudia ida haheitalai haida umui karaia diba, hegeregere oi be tisa o stiuden ai do oi lao. Emu natudia dekenai Baibel amo haere idia henia dalana, bona buka haida hegeregere Herevalaia bona Memero Kekeni Edia Henanadai bukadia gaukaralaia dalana oi hadibaia. Sina ta be haheitalai haida ia gaukaralaia, unai amo ena natudia ia hahegaegaea lagani ta ta ena sikuli ia matamaia neganai, edia tisa matamatadia idia hereva henia bona idia hadibaia idia be Iehova ena Witnes taudia.—Gima Kohorona, December 15, 2010, rau 3-5 itaia.
4. Aonega tama sina be dahaka do idia karaia?
4 Dina gabediai Keristani matamata taudia ese idia davaria hahetoho be idia ia “hahekwarahia bada.” (2 Tim. 3:1) Namona be aonega tama sina ese edia natudia do idia davaria hekwakwanai idia laloa guna, bona idia hahegaegaea unai hekwakwanai idia hanaia totona. (Aon. 22:3) Lagani ta ta ai sikuli ia do matamaia lasi neganai, namona be oi hekwarahi emu natudia oi durua idia hegaegae totona.