Mai Gari Lasi ida Bisinesi Haroro Karaia
1. Dahaka dainai bisinesi teritori ai oi haroro totona oi gari?
1 Bisinesi teritori ai oi haroro totona oi gari, a? Oi gari lasi, badina Paulo danu be “mai gari lasi ida” ia haroro. (1 Tes. 2:2) Henunai idia noho henanadai bona haere ese oi do ia durua, mai gari lasi ida bisinesi teritori ai oi haroro totona.
2. Dahaka dainai gaukara taudia do idia badu karana dekenai ita wari lasi be namo?
2 Gaukara Taudia Do Idia Badu, A? Bisinesi momo ai gaukara taudia idia ura kastoma idia durua bona do idia badu lasi. Oi vadivadi neganai, reana idia laloa oi be kastoma ta bona do idia hereva namonamo. Dabua namona oi hahedokilaia bona turana ta bamona idia oi hereva henia neganai, oi do idia kara namo henia.
3. Kastoma idia badu lasi totona, dahaka ita karaia diba?
3 Kastoma Momo Vairanai Do Lau Haroro, A? Dala namona be, stoa taudia idia bisi lasi o stoa ia kehoa matamaia neganai oi haroro. Oi naria ela bona bosi o naria tauna be sibona ia noho neganai oi haroro. Emu haroro herevana oi hakwadogia.
4. Bisinesi haroro ita karaia neganai, edena bamona ita hereva diba?
4 Edena Bamona Lau Hereva be Namo? Bema gaukara taudia be mai edia bosi, vadaeni ia oi hereva henia guna. Reana oi gwau: “Nega momo ruma ai bisinesi taudia ai davaria lasi, unai dainai emu gaukara gabunai oi ai vadivadi henia. Oi gaukara dainai, egu hereva do lau hakwadogia.” Nega haida kontribusen dalana ita herevalaia lasi, badina ita ura lasi bosi ia laloa ita be kohu hoihoilaia taudia (salesmen). To bema ia henanadai edeseni amo moni ita abia bena eda haroro ita durua, vadaeni kontribusen ita herevalaia. Bema oi diba ia be edena bamona bisinesi, vadaeni bosi ena gwaumaoro oi noia bona nega kwadogi lalonai iena gaukara taudia oi haroro henia. Bena ataiai ai gwauraia herevana oi gwauraia. Bema gaukara tauna ia bisi, emu hereva oi hakwadogia bona pepapepa oi hariharilaia. Bema gaukara taudia oi haroro henia be auka, reana bosi be oi do ia hamaoroa, laga-ani gabunai buka o magasin oi rakatania totona.
5. Mai gari lasi ida bisinesi haroro ita karaia ena badina haida be dahaka?
5 Iesu bona Paulo be mai gari lasi ida bisinesi teritori ai taunimanima idia haroro henia. Unai dainai, oi danu be unai bamona gabudiai oi haroro diba. (Mat. 4:18-21, 9:9; Kara 17:17) Iehova oi noia oi ia durua, mai gari lasi ida oi haroro totona. (Kara 4:29) Ruma ai ita davaria lasi taudia haida be bisinesi gabudiai idia noho. Unai dainai, unuseniai ita haroro be namo, ani?