Haroro Gaukara ai Naria Namonamo
1. Dahaka dainai haroro gaukara ai ita naria namonamo?
1 Dirava ena hesiai taudia be “mamoe, uda sisia edia huanai bamona,” bona “inai uru gagevana bona dikana lalonai” haroro gaukara idia karaia noho. (Mat. 10:16; Fili. 2:15) Ripoti haida ese idia hahedinaraia tuari, dagedage bona taunimanima henaoa karadia be idia vara momo, unai ese ia hamomokania kara dika taudia be ‘edia kara dika idia habadaia momokani.’ (2 Tim. 3:13) Baibel ai edena hakaua herevadia ese ita ia durua haroro gaukara ai ‘ita naria namonamo’ totona?—Mat. 10:16.
2. Dahaka gaudia idia vara dainai teritori oi rakatania bona teritori ma ta ai oi haroro?
2 Mai Aonega ida Ita Kara: Aonega Herevadia 22:3 ese ia hahedinaraia aonega tauna be dika amo ia “raka siri.” Namona be ita naria namonamo, badina iseda teritori ai dika be ita laloa lasi negadiai idia vara diba. Reana ita itaia pulisi edia gaukara be ia bada noho o hutuma be dala dekenai idia haboua. Nega haida ruma tauna ese ita do ia hadibaia ita naria namonamo totona. Namo lasi dika ia vara gabuna ita lao, to unai gabu ita rakatania haraga bona gabu ma ta dekenai ita haroro be aonega karana.—Aon. 17:14; Ioa. 8:59; 1 Tes. 4:11.
3. Edena dala ai haroro gaukara dekenai Hadibaia Tauna 4:9 ena hakaua herevana ita badinaia diba?
3 Gaukara Hebou: Hadibaia Tauna 4:9 ia gwau, “Tau rua ese tau tamona idia hereaia noho.” Reana guna haroro gaukara ai oi sibona oi gaukara, to hari unai bamona oi karaia diba, a? Gabu haida dekenai, unai bamona idia karaia diba. To gabu ma haida dekenai, adorahi ai taihu o matamata tauna ta sibona ia haroro be namo lasi. Idia vara gaudia ese idia hahedinaraia ma haida ida ita gaukara hebou be mai anina bada. (Had. 4:10, 12) Haroro grup ai idia noho taudia ta ta ita naria namonamo. Teritori ita rakatania gwauraia neganai, grup taudia haida ita hadibaia be namo.
4. Kongrigeisen taudia ibounai gimaia totona dahaka ita karaia be namo?
4 Elda taudia edia maduna be hakaua herevadia idia henia eda teritori ai ita badinaia totona, badina ‘idia ese ita idia naria noho.’ (Heb. 13:17) Ita manau bona elda taudia ida ita gaukara hebou neganai, Iehova ese ita do ia hanamoa. (Mika 6:8; 1 Kor. 10:12) Teritori dekenai haroro gaukara ita karaia neganai, namona be nega ibounai ita naria namonamo.