Oi Ura Sibona Emu Teritori Oi Abia, A?
1. Bema emu kongrigeisen ena haroro teritori be momo, reana oi ura dahaka oi karaia?
1 Bema emu kongrigeisen ena haroro teritori be momo, reana oi ura sibona emu teritori ta oi abia, reana unai be emu gabu kahirakahira ia noho teritori ta. Orea bukana, rau 103, ia gwau: “Bema unai bamona teritori ta oi abia, oiemu haroro negana oi gaukaralaia namonamo diba. Danu, bema oi ura, ma pablisa ta oi boiria diba oiemu teritori lalonai do umui gaukara hebou totona.”
2. Edena haroro grup idauidau oi bamoa diba?
2 Haroro Grup Haida: Bema emu haroro teritori be emu moni gaukara gabuna kahirakahira, vadaeni dina tubua eiava gaukara murinai oi haroro diba, reana oi kahirakahira ia gaukara pablisa ma ta oi boiria umui haroro hebou totona. Bema emu haroro teritori be emu ruma kahirakahira, vadaeni adorahi ai emu famili ida oi haroro hebou diba. To, bema haroro grup ena hebou ta do oi lao lasi, vadaeni emu haroro gaukara oi do hamatamaia lasi neganai, guriguri amo Iehova ena heduru oi noia guna be namo. (Fili. 4:6) Danu, oi sibona emu teritori ai oi haroro sibona lasi, to nega haida kongrigeisen ena haroro grup ida oi haroro hebou be namo. Hegeregere, Saturday o Sunday ai momo be haroro gaukara idia karaia neganai, unai haroro grup oi durua be namo.
3. Sibona eda teritori ita abia ena namo haida be dahaka?
3 Ena Namo: Bema oi sibona emu teritori ta oi abia, vadaeni oi be mai emu haroro gabuna bona emu sediual hegeregerena oi haroro diba. Nega bada lalonai oi haroro diba, bona moni bada do oi negea lasi. Heduru painia o regula painia gaukara oi karaia diba. Kamonai taudia be oi kahirakahira idia noho dainai, lou henia bona Baibel stadi karaia be do ia auka lasi. Sibona edia teritori ai idia haroro taudia momo idia gwau, ‘Bema teritori ta dekenai oi haroro loulou, bona pablisa ma ta ese unai teritori ia do noia lasi lalonai, ruma taudia be oi do idia diba namonamo bona tura henia.’ Oi laloa sibona oi abia teritori ai haroro karana ese oi bona emu famili do ia durua emui hesiai gaukara umui hagugurua momokani totona, a?—2 Tim. 4:5.