Heduru Painia Gaukara Do Oi Karaia, A?
1. Dahaka dainai Memorial be nega namona haroro gaukara ita habadaia totona?
1 Memorial be nega namona haroro gaukara ita habadaia totona. Unai negai ita be Iehova ese ena Natuna ena mauri davalaia boubouna amo ia hahedinaraia lalokau hereadaena ita laloa. (Ioa. 3:16) Unai dainai, mai eda ura bada ida Iehova bona ia ese taunimanima totona ia karaia gaudia be ma haida dekenai ita harorolaia. (Isa. 12:4, 5; Luka 6:45) Danu, Memorial neganai ita be mai moale ida eda turadia bona dekena taudia ita boiria, unai hebou idia mai totona. Gabeai, dala ita karaia Memorial hebouna idia mai taudia ita durua totona. Oi ura March, April, o May ai heduru painia gaukara oi karaia, a?
2. Dahaka dainai March be nega namona heduru painia gaukara oi karaia totona?
2 March Gaukaralaia Namonamo: March be hua namona heduru painia gaukara oi karaia totona. Anina be oi abia hidi diba, hora 30 eiava hora 50 do oi hagugurua. Bema March lalonai sekit naria tauna ia vadivadi, bona regula bona spesel painia taudia ida ia hebou, vadaeni heduru painia taudia be unai hebou lalonai idia vareai diba. Memorial ena invateisen pepana hariharilaia gaukarana idia halataia, lagani gunadia bamona lasi. Anina be March 1, 2013 ai unai gaukara do ita hamatamaia ela bona Memorial negana—Tuesday, March 26, 2013. Danu, March ena wikeni ibounai be faiv. Unai dainai, emu sediual oi hamaoromaoroa be gau badana, unai amo inai hua helagana lalonai heduru painia gaukara oi karaia.
3. Edena dala ai palani ita karaia diba haroro gaukara ita habadaia totona?
3 Hari Palani Karaia: Hari be nega namona emu sediual oi sekea bona oi itaia dahaka do oi haidaua, unai amo heduru painia gaukara oi karaia. Famili do idia gaukara hebou be gau badana dainai, namona be emu Ruma Bese ena Tomadiho negana ai emui tahua gaudia umui herevalaia bona sediual ta umui karaia. (Aon. 15:22, NW) Bema heduru painia gaukara do oi karaia lasi, oi lalomanoka lasi. Emu sediual oi haidaua, unai amo emu haroro gaukara oi halataia, a? Wiki lalonai, dina ma haida ai, haroro gaukara oi karaia diba, a?
4. March, April, bona May ai eda gaukara ita habadaia neganai, dahaka namo do idia vara?
4 March, April, bona May ai eda gaukara ita habadaia neganai, Iehova bona ma haida hesiai henia karana amo moale bada do ita abia. (Ioa. 4:34; Kara 20:35) Gau badana be inai: Hesiai gaukara ita karaia dainai, Iehova do ia moale.—Aon. 27:11.