Ekspiriens
◼ Australia: John, edukeisen bada ia abia tauna be ia maragi neganai dubu ia lao, to ia bada neganai ia laloa Dirava ia noho lasi. Painia ta ese John dekenai Was Life Created? buklet ia rakatania bona ia lou henia neganai Origin of Life buklet ia rakatania. Painia ia ura John ia durua dainai, ia ese magasin matamatadia ia abia lao—unai magasin ese Dirava ia havaraia gaudia bona Baibel ena peroveta herevadia idia herevalaia. Gabeai, painia ese John dekenai Buka Helaga—Dirava ena Hereva Eiava Taunimanima Edia? bukana ia henia. Ena be John ese unai buka ia duahia ore, to Dirava ia noho ia do daradaralaia. Unai dainai, painia ese John dekenai Baibel Hadibaia bukana ena rau 20, paragraf 8 bona rau 23-24, paragraf 13-16 ia hahedinaraia. Unuseniai Baibel siridia ese John ena kudouna ia hamarerea dainai ia gwau, “Reana Baibel lau stadilaia be namo.”
◼ Mexico: Tau ta ia laloa Baibel be Dirava ena buka lasi. Pablisa ese ia hahedinaraia Baibel be Dirava ena buka. Idia herevahereva murinai, unai tau be Baibel amo ia dibaia gaudia dainai ia moale. To ia moalelaia gauna badana be inai, Dirava ena taravatu ia dibaia neganai, pablisa ia hamaoroa: “Baibel ita stadilaia matamaia neganai, lau laloa ia be buka ta sibona bona egu kudou ia hamarerea lasi. To hari Baibel ena kara maoromaoro taravatudia ita stadilaia neganai, unai ese egu kudouna ia hamarerea.”
◼ United States: Tadikaka ta mai ena adavana ida be pablik gabuna ta ai idia haroro neganai, Taiwan hahine ta idia davaria—ia be ia abia dae Dirava ia noho, to ia laloa Baibel be nao taudia edia buka. Ia gwau unai buka bona magasin idia atoa patana ia lao badina ia laloa ena mauri be anina lasi, herevana iena kohu o moni be momo. Ia ura Baibel ese do ia durua mauri namona do ia davaria. Tadikaka bona ena adavana ese Baibel Hadibaia bukana bona Lasting Peace and Happiness—How to Find Them buklet amo stadi idia hamatamaia. To Baibel Hadibaia bukana ena karoa 2 idia do stadilaia lasi lalonai, Lasting Peace and Happiness—How to Find Them buklet ena kahana ladana, “A Guidebook for the Blessing of All Mankind” idia herevalaia guna. Paragraf 1-6 murinai, unai hahine ia hoa badina ia itaia Baibel be tomadiho bukadia ibounai ia hereaia. Baibel ena peroveta herevadia—idia guguru vadaeni gaudia—idia herevalaia murinai, unai hahine ia gwau, “Baibel be buka hereadaena, badina ena hereva be maoromaoro!”
◼ Japan: Ruma tauna ta ia laloa Dirava ia noho lasi, to pablisa be unai tauna ia lou henia loulou bona ia ida Awake! ena atikol ladana “Was It Designed?” idia herevalaia. Gabeai ruma tauna be ena lalohadai ia haidaua bona ia laloa reana Havaraia Tauna ta ia noho. Hari, unai ruma tauna ia abia dae Dirava ia noho, bona pablisa be ia ida Dirava Ena Sivarai Namona! buklet idia stadilaia.
◼ Canada: Hahine ta be ena ruma ia rakatania bona motuka dekenai ia guia gwauraia neganai, taihu ta ese ia dekenai magasin matamata ta ia henia. Gabeai, taihu be lou henia ia karaia neganai, hahine ia kamonai lasi bona ia gwau, Dirava ia noho lasi. To taihu ia giroa lou bona buklet ladana, A Satisfying Life—How to Attain It ia abia lao. Taihu ese hahine be ena ruma dekenai ia davaria neganai, taihu ia gwau, ‘Lau diba oi be Dirava oi abia dae lasi, to lau vadivadi badina oi lau laloa.’ Taihu be unai bamona ia hereva badina ia diba unai hahine be mai ena natuna to adavana lasi. Bena taihu ese hahine dekenai buklet ena rau 4, paragraf 6 ai sisiba namona ia herevalaia. Taihu ese unai hahine ia hagoadaia buklet ena kahana 2 do ia duahia—unai ese natudia naria dalana ia herevalaia. Hahine be mai moale ida buklet ia abia.