Emu Nega Do Oi Gaukaralaia Namonamo, A?
Memorial Negana ai Iseda Tanikiu Karana Ita Hahedinaraia
1. Memorial be nega namona dahaka ita karaia totona?
1 April 14 ena Memorial be nega namona Iehova ena kara namodia ita laloa bada bona iseda tanikiu karana ita hahedinaraia totona. Luka 17:11-18 ena sivarai ese ia hahedinaraia, Iehova bona Iesu be unai kara idia laloa bada. Lepera gorere amo idia namo lou taudia 10 amo, tamona sibona be Iesu ena kara namona ia lalopararalaia neganai, ia giroa lou bena Iesu ia tanikiu henia. Vaira negai, Iesu ena harihari gauna, mauri davalaia boubouna ese taunimanima edia hisihisi ibounai do ia haorea bona do idia mauri hanaihanai! Unai dainai, dina ta ta ai Iehova ita tanikiu henia. Wiki vairai, edena dala ai eda tanikiu karana ita hahedinaraia diba?
2. Edena dala ai Iesu ena mauri davalaia boubouna do ita laloa?
2 Iehova Bona Iesu Edia Kara Namona Laloa Bada: Ita laloa gauna ta dainai ita ura ita tanikiu. Iesu ena mauri davalaia boubouna ita laloa bada totona, namona be Memorial ena Baibel duahiduahi sediual ta ita badinaia, hegeregere Nega Matamata Baibel, Mataio-Apokalupo ena apendiks 13, kalenda, bona Dina Iboudiai Buka Helaga Tahua buklet. Namona be emu famili ida unai umui laloa. Unai bamona ita karaia neganai, mauri davalaia boubouna do ita laloa bada. Unai ese eda kara ia hanamoa.—2 Kor. 5:14, 15; 1 Ioa. 4:11.
3. Memorial negana ai, edena dala idauidau ai eda tanikiu karana ita hahedinaraia diba?
3 Tanikiu Karana Hahedinaraia: Eda kara amo tanikiu karana ita hahedinaraia. (Kol. 3:15) Lepera gorere amo ia namo lou tauna be mai moale ida ia giroa lou bona Iesu ia tanikiu henia. Danu, ia be mai ena ura bada ida Iesu ena hoa karana sivaraina be ma haida dekenai ia harorolaia. (Luka 6:45) Ita danu be Iesu ena mauri davalaia boubouna ita laloa bada dainai, mai ura bada ida ma haida do ita boiria Memorial idia mai totona, a? Iseda tanikiu karana ita hahedinaraia dalana ta be, heduru painia ita karaia o haroro gaukara ita habadaia be namo. Memorial hanuaboina ai idia mai vadivadi taudia ita welkam henidia bona edia henanadai ita haerelaia.
4. Edena dala ai Memorial negana ita gaukaralaia namonamo diba?
4 Inai be iseda Memorial ginigabena, a? (1 Kor. 11:26) Ita diba lasi. To bema ia be memorial ginigabena, vadaeni hari be nega namona Iehova bona Iesu dekenai eda tanikiu karana ita hahedinaraia totona. Emu nega do oi gaukaralaia namonamo, a? Namona be eda uduna bona lalona amo mauri davalaia boubouna ia Henia Tauna, Iehova, ita tanikiu henia.—Sal. 19:14.