Pepapepa Matamatadia!
1. Haroro gaukara totona dahaka dainai pepapepa matamatadia idia karaia?
1 Pepapepa matamatadia faiv be lagani 2013 “Dirava Ena Hereva be Momokani” distrik hebouhebouna ai idia halasia. Danu, pepapepa ma ta be Basileia Sivaraina Namba 38 ena ladana, “Mase Taudia Idia Toreisi Lou Diba, A?” Unai pepapepa siks idia karaia dalana be namo herea. Dahaka dainai unai pepapepa edia sitaelo be tamona? Ruma-ta-ruma-ta ai ita hariharilaia neganai, edena dala ai edia henanadai, siri bona laulau ita gaukaralaia namonamo diba?
2. Dahaka dainai pepapepa matamatadia be sitaelo tamona ai idia karaia?
2 Dahaka Dainai Edia Sitaelo be Tamona? Ruma-ta-ruma-ta haroro ai ita badinaia dala namodia foa be inai: (1) Henanadai namona ta oi henia. (2) Baibel siri ta oi herevalaia. (3) Ruma tauna dekenai pepapepa oi henia, ia duahia totona. (4) Henanadai ta oi rakatania, unai amo gabeai oi lou henia bena haerelaia. Pepapepa ena sitaelo matamatana ese ita do idia durua, unai dala foa ita badinaia totona.
3. Edena dala ai haroro gaukara ai pepapepa matamatadia ita hariharilaia diba?
3 Edena Dala ai Ita Gaukaralaidia Diba? (1) Ruma tauna oi hanamoa murinai, pepapepa ena henanadai oi hahedinaraia, bona oi noia ena lalohadai ia gwauraia. (2) Pepapepa oi kehoa, bena “Baibel Ia Gwau” kahana herevalaia. Reana Baibel amo siri oi duahia. Bema ruma tauna ia ura umui herevahereva noho, vadaeni “Ena Namo” kahana oi herevalaia. (3) Pepapepa oi hariharilaia, bona oi hagoadaia gabeai pepapepa ibounai ia duahia totona. (4) Dokonai, pepapepa murinai kahana ladana, “Mani Oi Laloa” ena henunai ia noho henanadai oi hahedinaraia, bona lou henia dalana oi karaia, gabeai Baibel ena haere umui herevalaia totona.
4. Ia kamonai tauna ita lou henia neganai, dahaka ita herevalaia diba?
4 Danu, lou henia gaukara dekenai pepapepa ita gaukaralaia be auka lasi. Pepapepa murinai ia noho Baibel siridia oi gaukaralaia, guna oi rakatania henanadai oi haerelaia totona. Kamonai tauna oi do rakatania lasi neganai, pepapepa ai Sivarai Namona! buklet ena laulau oi poinia. Ruma tauna dekenai unai buklet oi hahedinaraia bona ena karoa maorona oi hahedinaraia. Bena buklet oi hariharilaia. Bema buklet ia abia dae, lou henia dalana oi karaia, gabeai buklet umui herevalaia totona. Baibel stadi ta oi hamatamaia unai! Eiava bema buklet oi hariharilaia lasi, vadaeni pepapepa ma ta oi hariharilaia diba, bona lou henia dalana oi karaia, gabeai unai umui herevalaia totona.
5. Dahaka dainai eda haroro gaukara ai pepapepa ita gaukaralaia be namo?
5 Lagani 130 mai kahana lalonai, pepapepa be eda haroro gaukara ai ita hariharilaia. Herevana idia bada o maragi bona edia sitaelo be idauidau, to idia be eda tulu namodia. Namona be inai pepapepa matamatadia ita gaukaralaia namonamo, unai amo tanobada ibounai dekenai Baibel ena diba namona ita halasia noho.—Aon. 15:7a.