Emu Haroro Dalana Hanamoa Noho
1. Aposetolo edia negai, daidia edia haheitalai ese ita ia durua haroro taudia namodia ai ita lao totona?
1 Keristani taudia ese edia haroro dalana idia hanamoa be namo. Iesu eseena hahediba taudia dekenai treinini ia henia edia haroro daladia idia hanamoa totona. (Luka 9:1-5; 10:1-11) Danu, Akwila bona Prisikila ese Apolo dekenai, ‘Dirava ena dala idia herevalaia maoromaoro.’ (Kara 18:24-26) Paulo ese haroro gaukara ia manadalaia tauna, Timoteo ia hagoadaia ena hadibaia gaukara do ia goadalaia noho, “vadaeni taunimanima ibounai do idia itaia” ia goada ia lao noho. (1 Tim. 4:13-15) Unai hegeregerena, ena be nega daudau haroro gaukara ita karaia, to namona be eda haroro daladia ita hanamoa noho.
2. Edena dala ai ma haida amo diba ita abia?
2 Haida amo Diba Abia: Aposetolo edia nega bamona, eda haroro daladia ita hanamoa totona, ma haida amo diba ita abia be namo. (Aon. 27:17) Unai dainai, ita bamoa pablisa be ena haroro herevana ia gwauraia neganai, ita kamonai namonamo. Haroro gaukara idia manadalaia pablisa amo heduru ita abia, bona ita kamonai namonamo. (Aon. 1:5) Lou henia, Baibel stadi o haroro dala ma haida oi daradaralaia, a? Namona be grup naria tauna o ia manada pablisa ta oi noia oi ia durua totona. Laloatao, Iehova ena lauma helaga ese ita ia durua diba, unai dainai hanaihanai ita guriguri be namo.—Luka 11:13.
3. Ta ese ita ia durua neganai, dahaka ita karaia be namo?
3 Bema ta ese emu haroro dalana hanamoa totona heduru hereva ia henia, namona be oi abia dae. (Had. 7:9) Apolo bamona, mai manau bona tanikiu ida ma haida edia heduru ita abia dae. Unai be aonega karana.—Aon. 12:15.
4. Haroro taudia namodia ai idia lao totona, Iesu ena hagoadaia herevana be dahaka?
4 Anina Namona ese Dirava Ia Hanamoa: Iesu be haheitalai amo ena hahediba taudia ia hagoadaia haroro taudia namodia ai idia lao totona. Iesu ia gwau, ia be vain auna bamona, bona horoa Keristani taudia be vain ena rigi bamona. Ia gwau, ena Tamana ese huahua idia atoa rigi ibounai ia hagoevaia, “unai amo huahua momo idia havaraia diba.” (Ioa. 15:2) Vain umana ena biaguna ia ura vain auna ena rigi ibounai ese huahua idia atoa, unai hegeregerena Iehova ia ura iseda haroro dalana ita hanamoa, unai amo “iseda uduna” amo anina namona ita havaraia. (Heb. 13:15) Eda haroro daladia ita hanamoa neganai, dahaka namo do ita abia? Iesu ia gwau: “Lauegu Tamana ese hanamoa ia abia dalana be inai, umui ese huahua momo umui havaraia noho.”—Ioa. 15:8.