Mai Anina Bada Gauna: Iehova ia ura bada “bese ibounai lalonai” taunimanima be dala maorona ai ia do idia tomadiho henia. (Kara 10:34, 35) Unai dainai Iesu ia gwau, sivarai namona be “tanobada ibounai” bona “bese ibounai” dekenai do ita harorolaia. (Mat. 24:14) Sekaraia ia peroveta ia gwau, “gado idauidau ibounai besedia dekena amo” taunimanima be do idia kamonai. (Sek. 8:23) Aposetolo Ioane ena matahanai hegeregerena, hisihisi badana amo idia roho mauri taudia be “bese ibounai, iduhu ibounai, kopina bona gado idauidau amo.” (Apok. 7:9, 13, 14) Unai dainai, bema iseda teritori ai idau gado tauna ta ita davaria, namona be ita haroro henia.