**Eda Haroro Gaukara Ita Karaia Namonamo Dalana—Baibel Hadibaia Bukana Hariharilaia**

Dahaka Dainai mai Anina Bada? Baibel Hadibaia bukana be iseda hadibaia gaukara ena tulu badana ta. Inai buka amo taunimanima dekenai Baibel ena hahediba herevadia ita hadibaia. To, inai buka amo ta ita do stadi henia lasi neganai, namona be ia dekenai ita henia guna. Unai dainai, ita hekwarahi Baibel Hadibaia bukana hariharilaia dalana ita manadalaia. (Aon. 22:29) Dala idauidau ai ita hariharilaia diba, bona pablisa ese ia manadalaia dalana ia gaukaralaia diba. Oi hariharilaia daladia haida be inai.

Karaia Dalana:

Ruma tauna ena lalona do ia veria henanadai ta oi gaukaralaia, bena unai ia haerelaia karoa oi kehoa. Reana karoa ta ta edia matamanai idia noho henanadai ta oi gaukaralaia. Ruma tauna ena haere oi kamonai murinai, siri maorona ta oi duahia, bena umui herevalaia gauna ena paragraf be ia dekenai oi hahedinaraia bona umui herevalaia sisina.
Dala ma ta be, rau 3 ai idia noho henanadai ta oi gaukaralaia ruma tauna ena ura habadaia totona, bena unai henanadai ia haerelaia karoa oi kehoa. Reana vanegai nius dekenai idia halasia sivaraina ta oi gwauraia, bena ruma tauna dekenai oi gwau, “Taunimanima momo be inai henanadai ena haere idia ura diba.” Eiava oi gwau, “Ai be emai dekena taudia ai vadivadi henia bona idia ida nega vaira ai do idia vara gau namodia ai herevalaia.” Bena rau 4 bona 5 ai idia noho laulau hahedinaraia, bona oi nanadaia: “Oi ura edena gwauhamata ia vara momokani?” Eiava oi gwau, “Ai be taunimanima ai vadivadi henidia bona ai ura nega sisina lalonai edia henanadai ena haere davaria dalana ai hadibaia.” Bena ruma tauna dekenai rau 6 ai idia noho henanadai oi hahedinaraia bena ia ese ta ia abia hidi diba.
Maoromaoro ruma tauna ida Baibel stadi oi hamatamaia diba. Reana oi gwau: “Inai Baibel stadi bukana be emai dekena taudia dekenai ai hahedinaraia noho. Inai buka oi itaia vadaeni, a? [Haere naria.] Bema ia hegeregere oi dekenai, lau ura miniti haida sibona lalonai inai buka be emu Baibel ida oi stadilaia dalana lau hahedinaraia.”

Hari Hua Oi Tohoa Gauna be Inai:

Emui ruma bese ena tomadiho negana ai umui tohoa diba.
Haroro gaukara ai, oi ura gwauraia hamatamaia herevana be pablisa ma haida dekenai oi gwauraia danu. (Aon. 27:17) Bema emu hamatamaia herevana ese ruma tauna ena lalona ia veria lasi, oi haidaua be namo.