HARORO HANAMOA DALADIA​—Baibel Stiuden Durua Ia Goada ela Bona Ia Gwauhamata Bona Bapatiso

DAHAKA DAINAI MAI ANINA BADA: Baibel stiuden taudia be Iehova ena lalonamo idia abia totona ia dekenai edia mauri idia gwauhamatalaia bona bapatiso idia abia be namo. (1Pe 3:21) Edia gwauhamata idia badinaia bona idia bapatiso taudia be Iehova ese do ia naria bona durua. (Sa 91:1, 2) Keristani taudia edia gwauhamata be Iehova sibona dekenai, to taunimanima ta, gaukara ta, o orea ta dekenai lasi. Unai dainai, stiuden ese Dirava idia lalokau bona tanikiu henia be namo.​—Ro 14:7, 8.

KARAIA DALANA:

• Emui stadi lalonai, Iehova amo umui dibaia gaudia umui herevalaia. Oi hahedinaraia dina ta ta ai Baibel duahia bona “nega ibounai” Iehova guriguri henia karana be mai anina bada.​—1Te 5:17; Ia 4:8

• Emu Baibel stiuden oi hagoadaia gwauhamata bona bapatiso karana be ena tahua gauna ai ia halaoa. Bona oi durua tahua gaudia ma haida ia atoa, hegeregere, hebou ai do ia haere o ena neiba bona gaukara turadia ia haroro henidia. Laloatao Iehova be ta ia doria lasi ia do ia hesiai henia totona. Gwauhamata karana be ta sibona ese ia abia hidi gauna.​—De 30:19, 20

• Emu stiuden oi hagoadaia ena mauri lalonai gau haida ia haidaua, unai amo Iehova do ia hamoalea bona ia hegeregere bapatiso totona. (Ao 27:11) Momokani, ta ese ena kara bona ia abia dae gaudia ia haidaua be mai ena hekwarahi, unai dainai namona be stiuden tauna oi durua noho ena kara gunana ia kokia bona kara matamata ia atoa. (Ef 4:22-24) Ia ida Gima Kohorona ena atikol ladana, “Baibel Ese Mauri Ia Haidaua” umui herevalaia

• Iehova oi hesiai henia lalonai oi moalelaia gaudia be ia dekenai oi herevalaia.​—Is 48:17, 18