Baibel Ia Havaraia Tauna Do Ita Dibaia

1. Dahaka dainai Baibel oi laloa bada?

BAIBEL dainai Iehova ita tanikiu henia! Inai buka amo, Iehova ese sisiba namodia ia henia bona ita ia durua hari ita davaria hekwakwanai idauidau ita hanaia totona. Danu, vaira negana totona Ia ese helaro namona ia henia. Bona gau badana be, Iehova ese Baibel amo ena kara namodia ia hahedinaraia. Unai dainai iena kara namodia ita laloa dobu neganai, iseda kudouna do ia hamarerea bona ita ia hagoadaia Dirava ita tura henia namonamo totona.​—Sal. 25:14.

2. Edena dala idauidau ai Iehova be taunimanima dekenai sibona ia hahedinaraia?

² Iehova ena ura be taunimanima ese ia do idia dibaia. Gunaguna, ena taunimanima dekenai nihi, matahanai, bona aneru ia siaia ena hereva idia gwauraia totona. (Num. 12:6; Kara 10:3, 4) To bema nihi, matahanai, eiava aneru amo ia henia herevadia idia torea lasi, edena bamona ita stadilaidia diba? Unai dainai, Iehova ese tatau haida ia abia hidi bena ia ura ita dibaia gaudia be “buka ta lalonai [idia] torea.” (Ier. 30:2) “Dirava momokanina ena dala be goevadae” dainai, ita diba momokani Baibel amo ita ia hereva henia dalana, be dala hereadaena bona ita do ia durua.​—Sal. 18:30.

3. Edena dala ai guna ema bona hari Dirava ese ena Hereva ia gimaia? (Isaia 40:8)

³ Isaia 40:8 duahia. Lagani tausen momo lalodiai Dirava ena Hereva ese abidadama tatau bona hahine dekenai hakaua hereva namodia ia henia. Edena dala ai unai ia vara? Idaunegai Toretore Helagadia be idia dika diba gaudia dekenai idia torea, unai dainai hari unai toretore gunadia idia noho lasi. To Iehova ese dala ia karaia unai hereva helagadia edia kopi momo idia torea hanai totona. Ena be toretore taudia be goevadae lasi, to edia gaukara idia sekea namonamo. Hegeregere, diba bada tauna ta ese Heberu Toretoredia ia herevalaia, ia gwau: “Ita diba momokani idaunegai idia torea bukana ta ena hereva be unai bamona idia gimaia namonamo lasi.” To ena be idaunegai, Dirava ena Hereva be idia dika diba gaudia dekenai idia torea, bona toretore taudia be goevadae lasi, to ita abia dae hari Baibel dekenai ita duahia herevadia, be Iehova ena lalohadai.

4. Inai atikol lalonai dahaka do ita herevalaia?

⁴ Iehova be “harihari gaudia namodia ibounai bona harihari gaudia goevadia ibounai” edia Badina. (Iam. 1:17) Baibel be Iehova ese ita dekenai ia henia harihari gauna hereadaena. Bema ta be ita dekenai harihari gauna ta ia henia, ia henia gauna ese ita dekena gau ta ia hadibaia. Do ita laloparara ia be ita ia diba namonamo bona iseda dabu gaudia ia diba danu. Baibel ia Henia Tauna be unai bamona do ita laloa danu. Baibel ita tahua namonamo neganai, Iehova ena kara do ita dibaia. Do ita laloparara ia ese ita ia diba namonamo bona iseda dabu gaudia ia diba. Inai atikol lalonai, Baibel ese Iehova ena kara badadia toi ia hahedinaraia daladia do ia herevalaia, unai be ena aonega, ena hahemaoro bona ena lalokau. Mani Baibel ese Dirava ena aonega ia hahedinaraia daladia ita herevalaia guna.

DIRAVA ENA AONEGA IA HAHEDINARAIA

5. Edena dala ai Baibel ese Dirava ena aonega ia hahedinaraia?

⁵ Iehova ia diba ena sisiba ita abia be namo. Bona ena harihari gauna, Baibel, be iena aonega amo ia honu. Baibel ena sisiba ese taunimanima ia durua bona edia mauri ia haidaua diba. Mose be Baibel ena buka ginigunadia ia torea neganai, Israela taudia ia hamaoroa: “Inai be hereva kavakavana lasi, to ia be mauri ia henia herevadia.” (Deu. 32:47) Toretore Helagadia idia badinaia taudia edia mauri be ia namo bona idia moale. (Sal. 1:2, 3) Ena be Dirava ena Hereva be gunaguna ai idia torea, to ia be mai ena siahu taunimanima edia mauri ia haidaua totona. Hegeregere, jw.org ai “Baibel ese Mauri Ia Haidaua” ena kahana ai, mauri sivaraidia momo do oi davaria. Idia hahedinaraia hari inai negai, Baibel ena siahu be “abidadama taudia lalonai ia gaukara noho.”​—1 Tes. 2:13.

6. Dahaka dainai ita gwau diba Baibel be buka ma haida bamona lasi?

⁶ Buka ta be Dirava ena Hereva bamona lasi. Dahaka dainai? Badina unai buka ia Havaraia Tauna, Iehova Dirava be ia noho hanaihanai siahu ibounai Diravana, bona ena aonega be bada herea. Buka ma haida idia torea taudia be idia mase vadaeni, to gabeai unai buka lalonai idia torea sisiba herevadia be anina lasi. To, Baibel lalonai idia noho hakaua herevadia be idia noho hanaihanai, bona idaunegai amo ema bona hari taunimanima idia durua noho. Unai buka helagana ita duahia bona ita dibaia gaudia ita laloa dobu neganai, Dirava ese ena lauma helaga amo ita ia durua bona Baibel ena sisiba be iseda mauri lalonai ita badinaia dalana do ita lalopararalaia. (Sal. 119:27; Mal. 3:16; Heb. 4:12) Oibe, Baibel ia Havaraia Tauna ia ura oi ia durua. Unai dainai hanaihanai Baibel ita duahia be namo!

7. Edena dala ai idaunegai, Baibel ese Dirava ena taunimanima ia hatamonaia?

⁷ Baibel ese Dirava ena aonega ia hahedinaraia dalana ma ta be, ena taunimanima ia hatamonaia. Israela taudia be Gwauhamata Tanona lalonai idia vareai neganai, unai tano ena kahana idauidau ai idia noho. Haida be haoda taudia, haida be boromakau idia naria, bona haida be tano idia birulaia. Gabu tamona ai idia noho Israela taudia be reana tano ma ta ai idia noho Israela taudia idia laloa bada lasi. To Iehova be dala ia hegaegaelaia, unai amo nega idauidau ai Israela taudia idia hebou bona unai negadia ai Dirava ena Hereva idia duahia bona herevalaia. (Deu. 31:10-13; Neh. 8:2, 8, 18) Mani oi laloa, abidadama Israela tauna ta be Ierusalema dekenai ia ginidae bona gabu idauidau amo idia mai tadikaka milioni momo ia itaia neganai, ia moale bada! Unai dala amo Iehova ese ena taunimanima ia durua idia lalotamona totona. Gabeai, unai Keristani taudia be tatau bona hahine, bona idia be gado idauidau idia herevalaia. Idia momo edia noho daladia be idauidau. To Dirava ena Hereva idia ura henia dainai, mai lalotamona ida Dirava momokanina idia tomadiho henia. Abidadama matamata taudia be tadikaka taihu ese idia durudia bona hebou idia lao neganai, Dirava ena Hereva idia lalopararalaia diba.​—Kara 2:42; 8:30, 31.

8. Edena dala ai Baibel ese hari Iehova ena taunimanima ia hatamonaia?

⁸ Iseda aonega Diravana ese Baibel amo ena taunimanima ia hadibaia bona hatamonaia. Baibel be hereva momokani ena badina bona unai ita moalelaia. Hanaihanai iseda kongrigeisen hebou, sekit hebouhebou, bona hebouhebou badadia dekenai ita lao, bona unuseniai ita kamonai Baibel idia duahia, anina idia gwauraia bona herevalaia. Unai dala amo, Iehova ese Baibel ia gaukaralaia ena taunimanima ia durua “mai lalotamona ida ia do idia hesiai henia” totona.​—Sef. 3:9.

9. Baibel ena hereva ita lalopararalaia totona edena kara be mai anina bada? (Luka 10:21)

⁹ Mani Iehova ese ena aonega ia hahedinaraia dalana ma ta ita itaia. Iehova ena siahu amo Baibel ena kahana momo idia torea dalana be manau taudia sibona ese idia lalopararalaia diba. (Luka 10:21 duahia.) Gabu ibounai ai taunimanima ese Baibel idia duahia. Diba bada tauna ta ia gwau, Baibel be “taunimanima momo ese idia duahia sibona lasi, to idia duahia namonamo bukana ta.” To, manau taudia sibona ese ena hereva idia lalopararalaia namonamo bona idia badinaia.​—2 Kor. 3:15, 16.

10. Baibel ese Iehova ena aonega ia hahedinaraia dalana ma ta be dahaka?

¹⁰ Baibel ai Iehova ena aonega be dala ma ta ai do ita dibaia. Iehova ese Baibel amo kongrigeisen dekenai sibona ita ia hadibaia lasi, to ita ta ta ia hadibaia bona hagoadaia danu. Iena Hereva ita duahia neganai, ita mamia Iehova be ita ta ta ia laloa bada. (Isa. 30:21) Hekwakwanai ta oi davaria neganai, nega hida Baibel oi kehoa bona oi duahia sirina ese oi ia durua? To, Baibel be taunimanima milioni momo ese idia lalopararalaia diba. Edena dala ai Baibel lalonai ia noho herevana be oi do ia durua gauna? Unai ia vara diba badina mai ena aonega bada Diravana ese Baibel ia torea.​—2 Tim. 3:16, 17.

DIRAVA ENA KARA MAOROMAORO IA HAHEDINARAIA

11. Edena dala ai Dirava ese ta laloa bada karana ia hahedinaraia?

¹¹ Iehova ena kara badana ta be kara maoromaoro. (Deut. 32:4) Kara maoromaoro tauna be ta ena toana ia laloa lasi, bona unai be Iehova ena kara. (Kara 10:34, 35; Roma 2:11) Bona unai nega ai, Baibel be idia gaukaralaia gado dekenai idia torea karana ese Dirava ena kara maoromaoro ia hahedinaraia. Baibel ena buka ginigunadia 39 be Heberu gado ai idia torea badina unai nega ai taunimanima be unai gado idia lalopararalaia diba. To, Keristani ginigunadia edia negai, momo be Grik gado ai idia hereva dainai, Baibel ena buka dokodia 27 be Grik gado ai idia torea. Iehova be gado tamona sibona ia abia hidi lasi ena Hereva idia torea totona. Hari, kahirakahira taunimanima 8 bilioni be gado idauidau idia gaukaralaia. Edena dala ai taunimanima momo ese Iehova idia dibaia diba?

12. Edena dala ma ta ai Daniela 12:4 ena hereva ia guguru?

¹² Iehova be peroveta tauna Daniela amo ia gwauhamata, nega dokona ai Baibel lalonai “diba momokanina be do ia bada herea.” Bona momo ese unai do idia lalopararalaia. (Daniela 12:4 duahia.) Unai diba idia habadaia dalana ta be, Baibel bona Baibel bukadia idia hahanaia, halasia, bona hariharilaia. Tanobada hegegemadai Baibel be gado momo ai idia hahanaia bona idia hariharilaia bukana ta. Kampani haida ese idia karaia Baibel ena davana be nega haida ia bada. Iehova ena Witnes taudia ese Baibel ibounai eiava ena kahana haida sibona be, gado 240 mai kahana ai idia hahanaia vadaeni, bona ta ese ena kopi ta ia abia diba, ia be davana lasi. Unai dainai, dokona ia do ginidae lasi neganai, bese ibounai taudia be “Basileia ena sivarai namona” do idia dibaia noho. (Mat. 24:14) Kara maoromaoro Diravana ia ura taunimanima momo ese ena Hereva do idia duahia bona Ia do idia dibaia. Badina ita ibounai ia lalokau henia.   

DIRAVA ENA LALOKAU IA HAHEDINARAIA

13. Edena dala ai Baibel ese Iehova ena lalokau ia hahedinaraia? (Ioane 21:25)

¹³ Baibel ese ia hahedinaraia Iehova ena kara hereadaena, be lalokau. (1 Ioa. 4:8) Mani Iehova ese Baibel ai ia torea bona ia torea lasi gaudia ita laloa. Ia ese ita do idia durua herevadia ia henia, unai amo ia do ita tura henia, iseda mauri do ita moalelaia bona mauri hanaihanai do ita abia. Oibe, Iehova ese ita ia lalokau henia dainai, gau momo edia sivarai ia gwauraia lasi.​—Ioane 21:25 duahia.

14. Edena dala ma ta ai Baibel ese ia hamomokania Dirava be ita ia lalokau henia?

¹⁴ Iehova be lalokau ia hahedinaraia dalana ma ta be, hemataurai dalanai ita ia hereva henia. Baibel lalonai, ia ese taravatu momo ia henia lasi. To, ita ia durua abia hidi maorodia ita karaia totona, mauri sivaraidia, peroveta herevadia, bona sisiba namodia ia henia. Unai dala amo, Dirava ena Hereva ese iseda kudouna do ia veria ia ita lalokau henia bona badinaia totona.

15. (a) Edena dala ai Iehova be iena Hereva idia duahia taudia ia laloa bada? (b) Laulau lalonai kekeni maragina, tadikaka matamatana bona taihu burukana be edena Baibel sivaraina idia laloa dobu noho? (Gen. 39:1, 10-12; 2 Ki. 5:1-3; Luka 2:25-38)

¹⁵ Baibel ese ia hahedinaraia Iehova be ita ia laloa bada. Edena dala ai? Iena Hereva lalonai sivarai momo ese taunimanima edia hemami ia herevalaia. Baibel ese ia sivarailaia taudia edia hemami ita lalopararalaia diba, badina edia hemami be ita hegeregerena. (Iam. 5:17) Mai anina bada gauna be, Iehova ese ita hegeregerena taudia ia kara henia sivaraidia ita duahia neganai, ita laloparara “Iehova be lalokau bona hebogahisi bada Diravana.”​—Iam. 5:11.

16. Baibel lalonai kara dika idia karaia taudia edia sivarai ita duahia neganai, Iehova dekenai dahaka ita dibaia? (Isaia 55:7)

¹⁶ Baibel ese Iehova be ita ia lalokau henia dalana ma ta ia hahedinaraia. Baibel ia hahedinaraia kerere ita karaia neganai, Dirava be ita do ia rakatania lasi. Hegeregere, Israela taudia be Iehova idia kara dika henia loulou, to idia helalo-kerehai momokani neganai, Dirava ese edia dika ia gwauatao. (Isaia 55:7 duahia.) Keristani ginigunadia idia diba danu Dirava be idia ia lalokau henia bada. Lauma helaga ena heduru amo aposetolo Paulo be tadikaka taihu ia hagoadaia, kara dika badana ia karaia to ia helalo-kerehai tauna be ‘mai hebogahisi ida idia gwauatao bona idia hagoadaia be namo.’ (2 Kor. 2:6, 7; 1 Kor. 5:1-5) Iehova be ena hesiai taudia idia kara dika neganai, idia ia dadaraidia lasi! To, mai lalokau ida ia durudia, ia sisiba henidia bona ia boiridia lou iena turana ai idia lao totona. Iehova ia gwauhamata hari inai negai helalo-kerehai taudia dekenai unai bamona do ia karaia danu.​—Iam. 4:8-10.

DIRAVA ENA HEREVA BE ‘HARIHARI GAUNA NAMONA’

17. Dahaka dainai Baibel be harihari gauna hereadaena?

¹⁷ Iehova be ita dekenai harihari gauna namona ia henia. Dahaka dainai Baibel be idau momokani? Baibel amo Dirava ena aonega, ena hahemaoro karana, bona ena lalokau ita dibaia. Inai buka ese ia hamomokania Iehova ia ura ia do ita diba namonamo bona iena turana ai ita lao.

18. Edena dala ai ita hahedinaraia Iehova ena ‘harihari gauna namona’ Baibel, ita laloa bada?

¹⁸ Namo lasi Dirava ena Hereva, ena ‘harihari gauna namona,’ ita laloa maragi. (Iam. 1:17) Hanaihanai do ita hahedinaraia Baibel ita laloa bada. Baibel ita duahia totona, namona be ita guriguri bona ena hereva helagadia ita laloa dobu. Unai ita karaia neganai, ita diba momokani Baibel ia Torea Tauna Badana ese iseda hekwarahi do ia hanamoa bona ‘Dirava do ita diba.’​—Aon. 2:5.