Hereva Oi “Badinaia Haraga,” A?

1. Dahaka dainai hereva ita badinaia be auka?

NEGA haida hereva oi badinaia be auka, a? King Davida be unai bamona ia mamia dainai, ia guriguri: “Oi lau badinaia urana be lau dekenai oi havaraia.” (Sal. 51:12) Davida be Iehova ia lalokau henia. To, nega haida ia hekwarahi hereva ia badinaia totona, bona ita danu be unai bamona. Dahaka dainai? Badina ginigunana be, Adamu amo kamonai lasi karana ita abia. Badina iharuana be, Satani ia karaia bamona, ia ura Dirava ita gwau-edeede henia. (2 Kor. 11:3) Bona badina ihatoina be, ita be inai tanobada ena gwau-edeede taudia huanai ita noho, unai “lalohadai be hari kamonai lasi taudia edia lalona dekenai ia gaukara.” (Efe. 2:2) Namona be ita gaukara goada ura dikadia ita dadaraia sibona lasi, to danu Satani bona inai tanobada ena hahetoho ita dadaraia. Danu, namona be ita gaukara goada Iehova bona siahu taudia edia hereva ita badinaia totona.

2. Iamesi 3:17 ai, inai hereva “badinaia haraga” ena anina be dahaka?

² Iamesi 3:17 duahia. Iamesi ia gwau aonega taudia be hereva idia “badinaia haraga.” Unai hereva ena anina mani ita laloa. Iehova ese taunimanima haida dekenai siahu ia henia, bona namona be mai iseda ura ibounai ida edia hereva ita kamonai. To, Iehova ia ura lasi ena taravatu idia dadaraia taudia edia hereva ita kamonai.—Kara 4:​18-20.

3. Dahaka dainai Iehova ia ura siahu taudia edia hereva ita badinaia be namo?

³ Taunimanima edia hereva ita badinaia be auka, to Iehova ena hereva ita badinaia be auka lasi, badina hanaihanai Iehova ese ia henia taravatu be goevadae. (Sal. 19:7) To siahu taudia be unai bamona lasi. To, iseda guba Tamana ese tama sina, gavamani taudia bona elda taudia dekenai siahu ia henia. (Aon. 6:20; 1 Tes. 5:12; 1 Pet. 2:​13, 14) Edia hereva ita badinaia neganai, ita be Iehova ita badinaia unai. Inai stadi ai, ita ese siahu taudia edia hereva ita badinaia dalana do ita herevalaia, ena be nega haida edia hakaua dalana ita abia dae bona badinaia be auka.

EMU TAMA SINA OI KAMONAI HENIA

4. Dahaka dainai natudia momo be tama sina edia hereva idia kamonai lasi?

⁴ Matamata taudia edia turadia momo be edia ‘tama sina idia kamonai henia lasi.’ (2 Tim. 3:​1, 2) Dahaka dainai hereva idia kamonai lasi? Haida idia mamia edia tama sina edia kara be edia hereva amo ia idau. Bona natudia idia laloa unai be maoro lasi. Natudia haida idia laloa edia tama sina edia sisiba be hereva gunadia, idia do idia durua lasi, eiava idia atoa taravatu be auka momokani. Bema oi be matamata tauna ta, unai bamona oi mamia danu, a? Natudia momo idia mamia inai oda hereva be auka: “Emui tama sina do umui kamonai henia, unai be Dirava ena ura hegeregerena, badina ia be kara maorona.” (Efe. 6:1) Dahaka ese oi do ia durua unai oda herevana oi badinaia totona?

5. Luka 2:​46-52 hegeregerena, dahaka dainai tama sina kamonai henia karana dekenai Iesu be haheitalai namona?

⁵ Iesu be hereva badinaia karana dekenai haheitalai namona. (1 Pet. 2:​21-24) Ia be goevadae tauna to iena tama sina be goevadae lasi. To Iesu be iena tama sina ia matauraia ena be nega haida kerere idia karaia bona ena kara idia lalopararalaia lasi. (Eso. 20:12) Iesu ena mauri lagani be 12 neganai, ia dekenai ia vara gauna mani ita laloa. (Luka 2:​46-52 duahia.) Iesu be ena tama sina ida aria totona Ierusalema dekenai idia lao. Iosepa bona Maria be hanua dekenai idia giroa lou totona, edia maduna be do idia sekea bema edia natudia be edia bese ida idia raka hebou. To aria murinai idia ese Iesu idia rakatania. Iosepa bona Maria be Iesu idia davaria neganai, Maria ese ia hamaoroa: “Natugu e, dahaka dainai ai dekenai inai bamona oi karaia?” Iesu be idia dekenai ia badu lasi, to mai hemataurai ida ia haere henidia. Ena be Iosepa bona Maria be “ena hereva ena anina idia lalopararalaia lasi,” to Iesu be “idia ia kamonai henia noho.”

6-7. Dahaka ese matamata taudia do ia durua edia tama sina idia kamonai henia totona?

⁶ Matamata taudia e, emui tama sina idia kerere eiava umui idia lalopararalaia lasi neganai, edia hereva umui badinaia be auka, a? Dahaka ese umui do ia durua? Gau ginigunana be, Iehova ena hemami umui laloa. Baibel ia gwau emui tama sina umui kamonai henia neganai, “Lohiabada ese unai ia moalelaia.” (Kol. 3:20) Iehova ia diba nega haida, emui tama sina be umui do idia lalopararalaia lasi eiava idia atoa taravatu do umui badinaia be auka. To bema idia umui kamonai henia, Iehova do umui hamoalea.

⁷ Gau iharuana be, emui tama sina edia hemami umui laloa. Tama sina umui kamonai henia neganai, idia umui hamoalea bona umui do idia trast henia. (Aon. 23:​22-25) Danu, emui hetura karana do ia goada. Belgium ai tadikaka Alexandre, ia gwau: “Egu tama sina edia hereva lau badinaia neganai, emai hetura karana ia hanamoa bona ai moale.”b Gau ihatoina be, bema emui tama sina umui kamona henia, gabeai unai ese umui do ia durua. Paulo be Brazil ai ia noho, ia gwau, “Egu tama sina lau kamonai henia karana ese lau ia durua Iehova bona siahu taudia lau kamonai henia totona.” Dirava ena Hereva ese tama sina kamonai henia ena namo ia hahedinaraia, ia gwau: “Vadaeni do umui noho namo bona tanobada ai nega daudau do umui noho.”—Efe. 6:​2, 3.

8. Dahaka dainai matamata taudia momo idia ura edia tama sina idia kamonai henia?

⁸ Matamata taudia momo idia itaia hereva idia badinaia neganai namo idia davaria. Luiza be Brazil ai ia noho, matamanai ia danu be ia laloparara lasi, dahaka dainai tama sina ese gwaumaoro idia henia lasi fon ta ia abia totona. Ia itaia, iena turadia momo be mai edia fon. To, gabeai ia laloparara ena tama sina ese ia idia gimaia. Ia gwau: “Lau diba egu tama sina ese idia atoa taravatu lau badinaia karana ese egu mauri ia gimaia, bona lau idia biagua auka lasi.” United States ai taihu matamata Elizabeth be nega haida ia hekwarahi iena tama sina ia kamonai henia totona. Ia gwau: “Egu tama sina ese taravatu ta idia atoa ena badina lau lalopararalaia lasi neganai, guna idia atoa taravatu ese lau idia gimaia karana lau laloa lou.” Armenia ai taihu Monica, ia gwau iena tama sina ia kamonai henia neganai, gau ibounai idia namo.

“GAVAMANI” TAUDIA KAMONAI HENIA

9. Momo ese taravatu badinaia karana be edena bamona idia laloa?

⁹ Taunimanima momo idia gwau “gavamani” idia noho bona edia taravatu haida ita badinaia be namo. (Roma 13:1) To, danu idia ese taravatu haida idia badinaia lasi bema idia laloa unai taravatu be ia auka eiava idia ura henia lasi. Hegeregere, takisi moni henia karana. Europe ena tano ta ai, taunimanima momo idia abia dae, “bema gavamani be edia gaukara idia karaia namonamo lasi, takisi moni idia henia lasi be maoro.” Unai dainai, ena sitisen taudia be gavamani dekenai takisi davana ibounai idia henia lasi.

10. Ena be taravatu haida ita ura henia lasi to dahaka dainai ita badinaia?

¹⁰ Baibel ese ia hahedinaraia, Satani ena siahu henunai idia noho gavamani ese hisihisi idia havaraia, to kahirakahira dika bada do idia davaria. (Sal. 110:​5, 6; Had. 8:9; Luka 4:​5, 6) Danu ia hahedinaraia, “gavamani ia dadaraia tauna be Dirava ese ia haginia dalana ia dadaraia.” Hari, Iehova ese gavamani taudia dekenai gwaumaoro ia henia nega sisina lalonai ita idia lohiaia totona. Unai dainai, namona be “edia gaukara davana do [ita] henia,” edia takisi moni ita henia, idia ita matauraia bona badinaia. (Roma 13:​1-7) Reana taravatu ta dekenai do ita laloa, ia be maoro lasi bona ita badinaia be auka. To ita ese Iehova ita badinaia, bona ita ia hamaoroa siahu taudia edia hereva ita badinaia, bema unai ese iena taravatu ia utua lasi.—Kara 5:29.

11-12. Luka 2:​1-6 hegeregerena, Iosepa bona Maria be dahaka idia karaia taravatu ta idia badinaia totona bona dahaka namo ia vara? (Laulau itaia danu.)

¹¹ Iosepa bona Maria be haheitalai namodia. Ena be ia auka, to idia noho hegaegae siahu taudia edia hereva idia badinaia totona. (Luka 2:​1-6 duahia.) Maria be mai ena bogana bona hua 9 bamona neganai, ia bona Iosepa edia badinaia karana ia tohoa gauna ta ia vara. Roma ena lohia tauna, Augusto be oda ia henia taunimanima ese edia ladana idia rejista totona. Betelehema dekenai do idia lao ena daudau be kilomita 150 bamona bona ororo momo do idia hanaia. Maria dekenai unai laolao be mai ena hekwarahi. Ia bona beibi ena seifti totona idia laloa momo. Unai laolao lalonai Maria ia mara be edena bamona? Maria ena bogana lalonai ia noho beibi be vaira neganai Mesia ai do ia lao. Unai dainai, gavamani ena oda do idia badinaia lasi, a?

¹² Ena be Iosepa bona Maria idia lalohekwarahi, to taravatu idia badinaia. Iehova ese edia badinaia karana ia hanamoa. Maria be Betelehema ai ia ginidae namonamo, beibi namona ia havaraia, bona Baibel ena peroveta herevana idia hagugurua!—Mika 5:2.

13. Edena dala ai iseda kamonai karana ese tadikaka taihu ia durua?

¹³ Siahu taudia edia taravatu ita badinaia neganai, ita bona ma haida dekenai namo ia havaraia. Edena dala ai? Taravatu idia utua taudia ese idia abia panisi do ita abia lasi. (Roma 13:4) Siahu taudia edia taravatu ita badinaia neganai, do idia diba ita Iehova ena Witnes taudia be gavamani ita kamonai henia taudia. Hegeregere, lagani momo gunanai Nigeria ai, soldia taudia be kongrigeisen hebou negana ai Kingdom Hall lalonai idia vareai bona takisi davana idia henia lasi taudia idia tahua. Soldia edia gunalaia tauna ese soldia ia hamaorodia Kingdom Hall do idia rakatania, ia gwau: “Iehova ena Witnes taudia be hanaihanai takisi davana idia henia.” Nega ta ta ai taravatu oi badinaia neganai, Iehova ena taunimanima edia ladana namona oi gimaia, bona nega ta emu tadikaka taihu be unai ladana namona ese do ia durua.—Mat. 5:16.

14. Dahaka ese taihu ta ia durua siahu taudia edia hereva ia “badinaia haraga” totona?

¹⁴ To hanaihanai siahu taudia edia hereva ita badinaia totona be mai ena hekwarahi. United States ai taihu Joanna, ia gwau: “Egu famili haida be siahu taudia ese idia hahisia bada dainai, ia auka edia hereva lau badinaia totona.” To, Joanna ia gaukara goada ena lalohadai ia haidaua totona. Ia karaia gauna ginigunana be, social media ai lalohadai kereredia idia havaraia gaudia itaia karana ia hadokoa. (Aon. 20:3) Gau iharuana be, Iehova dekenai ia guriguri ena abidadama do ia hagoadaia, to ia noia lasi taunimanima edia gavamani ia haidaua totona. (Sal. 9:​9, 10) Gau ihatoina be, iseda pablikeisen ai gini siri karana idia herevalaia atikol ia duahia. (Ioa. 17:16) Hari Joanna ia gwau, siahu taudia ia matauraia bona edia taravatu ia badinaia karana ese “lalomaino ia henia.”

IEHOVA ENA OREA AMO HAKAUA HEREVA BADINAIA

15. Dahaka dainai nega haida Iehova ena orea amo hakaua herevadia ita badinaia be auka?

¹⁵ Iehova ese ita ia noia kongrigeisen lalonai, ita ‘idia hakaua taudia do ita kamonai henia.’ (Heb. 13:17) Ena be iseda gunalaia tauna Iesu, be goevadae tauna, to tanobada ai ia abia hidi gunalaia taudia be goevadae lasi taudia. Bema ita idia noia gau ta ita karaia, to unai be ita ura lasi gauna, reana do ia auka edia hereva ita badinaia totona. Nega ta aposetolo Petero dekenai unai ia vara. Aneru ese Petero ia hamaoroa, Mose ena Taravatu hegeregerena idia goeva lasi animal ia ania totona neganai, nega toi unai hereva ia dadaraia! (Kara 10:​9-16) Dahaka dainai? Badina unai hakaua hereva matamatana ia lalopararalaia lasi. Unai be iena mauri ibounai lalonai ia badinaia gauna amo ia idau. Bema Petero ese goevadae aneru ena hereva ia badinaia be ia auka, ita danu nega haida goevadae lasi taudia edia hereva ita badinaia be do ia auka!

16. Ena be aposetolo Paulo ia laloa ia abia hakaua herevana be maoro lasi, to dahaka ia karaia? (Kara 21:​23, 24, 26)

¹⁶ Aposetolo Paulo be ia hegaegae hereva ia “badinaia haraga” totona, ena be unai hakaua herevana ena badina ia lalopararalaia lasi. Iuda Keristani taudia be haida amo hereva koikoi idia kamonai. Idia gwau Paulo be Mose ena Taravatu ia matauraia lasi, bona haida ia hadibaia “Mose ena taravatu idia dadaraia” totona. (Kara 21:21) Ierusalema dekenai idia noho Keristani tatau badadia ese Paulo idia hamaoroa tatau 4 ida do ia lao dubu helaga dekenai bona sibona do ia hagoevaia, unai amo do ia hahedinaraia Taravatu ia badinaia noho. To, Paulo ia diba Keristani taudia be Taravatu henunai idia noho lasi. Bona ia be kerere ta ia karaia lasi. To, Paulo be edia hereva ia badinaia haraga. “Murina dinana ai, Paulo be unai tatau ida ia lao bona taravatu hegeregerena idia sibona idia hagoevaia.” (Kara 21:​23, 24, 26 duahia.) Paulo ena kamonai karana ese lalotamona ia havaraia.—Roma 14:​19, 21.

17. Stephanie ena ekspiriens amo dahaka oi dibaia?

¹⁷ Taihu ta ladana Stephanie be ena tano ai brens ofesi ese ia karaia disisen ia abia dae be auka. Ia bona ena adavana be mai moale ida idau gado grup idia durua. Bena brens ofesi ese unai grup idia koua, bona idia siaidia giroa edia gado kongrigeisen dekenai. Stephanie ia gwau: “Lau lalohisihisi, badina lau abia dae lasi emai gado kongrigeisen be heduru idia abia be namo.” To, unai hakaua hereva matamatana ia badinaia. Ia gwau: “Gabeai lau laloparara tadikaka edia disisen be maoro. Kongrigeisen lalonai ai be tama sina bamona ai lao, badina haida edia famili be hereva momokani lalonai lasi. Ia goada lou taihu matamata ida lau stadi. Bona nega ia noho sibona egu stadi lau karaia totona.” Ma ia gwau: “Egu lalomamina ia goeva, badina lau diba lau gaukara goada hereva lau badinaia totona.”

18. Hereva ita badinaia karana ese ita dekenai dahaka namo ia havaraia?

¹⁸ Hereva badinaia karana ita dibaia diba. Iesu be ia “hisihisilaia gaudia amo kamonai karana ia dibaia.” (Heb. 5:8) Iesu bamona, ita danu be nega aukadia ai hereva badinaia karana ita dibaia. Hegeregere, COVID-19 pendemik matamanai, ita idia hadibaia Kingdom Hall ai do ita hebou lasi, bona ruma-ta-ruma-ta haroro gaukara do ita karaia lasi neganai, unai hereva oi badinaia be auka, a? To, hereva oi badinaia karana ese oi ia gimaia, tadikaka taihu ida mai lalotamona ida oi noho, bona Iehova oi hamoalea. Hari ita ibounai ita hegaegae vadaeni, hisihisi badana negana ai hakaua herevadia ita badinaia totona. Unai ese ita do ia hamauria!—Iobu 36:11.

19. Dahaka dainai oi ura hereva oi badinaia?

¹⁹ Inai stadi ai ita dibaia gauna be hereva badinaia karana ese hahenamo momo ia mailaia. To ita ura Iehova ena hereva ita badinaia ena badina be ia ita lalokau henia bona ita ura ia ita hamoalea. (1 Ioa. 5:3) Iehova be ita totona ia karaia gau namodia edia davana ita henia lou diba lasi. (Sal. 116:12) To, ia bona siahu taudia edia hereva ita badinaia diba. Bema unai ita karaia, ita hahedinaraia ita aonega. Bona aonega taudia ese Iehova ena kudouna idia hamoalea.—Aon. 27:11.