Emu Daradara Gaudia Oi Hanaia Dalana

1-2. (a) Iehova ena hesiai taudia haida be dahaka gaudia haida dainai idia daradara diba? (b) Inai atikol ai dahaka do ita herevalaia?

ITA IBOUNAI ena be iseda mauri lagani be bada eiava maragi, to nega haida ita daradara.a Hegeregere, mani Witnes mero matamata ta ita laloa, ia daradara bema Iehova ese ia laloa bada. Unai dainai, reana ia daradara bema bapatiso do ia abia. Eiava tadikaka ma ta ita laloa ia matamata neganai, abia hidi ia karaia Iehova do ia hesiai henia bona moni momo tahua karana do ia dadaraia. To hari ia bada bona ena ruma bese naria totona moni be hegeregere lasi, bona ia daradara bema ia karaia abia hidi be maoro. Mani taihu burukana ta ita laloa, ena goada be hegeregere lasi. Reana do ia lalomanoka badina ia mamia, guna ia karaia gaudia be hari ia karaia diba lasi. Nega haida sibona oi nanadaia: ‘Iehova be lau ia laloa bada, a? Iehova totona lau karaia gaudia be mai anina bada, a? Iehova ese lau do ia gaukaralaia noho, a?’

² Bema unai bamona henanadai edia haere ita tahua lasi, unai ese iseda tomadiho karana ia hadikaia diba. Inai atikol ai do ita itaia, Baibel ese ita ia durua diba, bema ita laloa (1) Iehova be ita ia laloa lasi, (2) guna ita karaia abia hidi be namo lasi, eiava (3) Iehova be ita do ia gaukaralaia lasi.

DARADARA GAUDIA HAMAOROMAOROA DALANA

3. Ita daradara neganai, dahaka ita karaia be namo?

³ Gau ta dekenai ita daradara neganai, Baibel amo ena haere ita tahua be gau badana. Unai bamona ita karaia neganai, Iehova ida iseda hetura karana do ia goada bona do ita hegeregere ‘iseda abidadama dekenai ita gini goada totona.’—1 Kor. 16:13.

4. Edena dala ai, ‘gau ibounai ita tahua namonamo’? (1 Tesalonika 5:21)

⁴ 1 Tesalonika Iharuana 5:21 duahia. Baibel ia gwau, “namona be gau ibounai umui tahua namonamo.” Edena dala ai unai ita karaia diba? Bema gau ta dekenai ita daradara, namona be Baibel ena hereva ida ita hahegeregerea. Mani matamata tauna ta ita laloa, ia be ia daradara bema Dirava ese ia laloa bada. Do ia abia dae ena lalohadai be maoro, a? Lasi, ‘namona be gau ibounai ia tahua namonamo’ unai amo Iehova ena lalohadai do ia diba.

5. Edena ai Iehova ese iseda henanadai ia haerelaia diba?

⁵ Baibel ita duahia lalonai, ita “kamonai” Iehova be ita ia hereva henia noho. To iseda daradara gauna ta ena haere ita abia totona, kara ta ita karaia be namo. Bona Baibel ita duahia sibona be hegeregere lasi. Namona be iseda henanadai do ia haerelaia Baibel siridia ita tahua bona stadilaia. Unai ita karaia totona, iseda pablikeisen amo tahua gaukara ita karaia. (Aon. 2:3-6) Guriguri amo Iehova ita noia, iseda henanadai edia haere ita davaria totona. Bena Baibel ena hakaua herevadia bona ita do ia durua daladia haida ita tahua bona badinaia. Danu Baibel ai, abidadama taudia edia sivarai ita duahia, edia lalohadai bona hemami be iseda hegeregerena.

6. Edena dala ai hebou lao henia karana ese iseda daradara gauna ia haerelaia diba?

⁶ Danu, kongrigeisen heboudia ai, Iehova be ita ia hereva henia. Bema hanaihanai hebou ita lao, do ita kamonai tok ta eiava ta ena haere be iseda daradara gauna do ia haerelaia. (Aon. 27:17) Mani iseda daradara gaudia haida ita hamaoromaoroa dalana ta ita herevalaia.

IEHOVA BE OI IA LALOA BADA, A?

7. Haida be dahaka henanadai idia henia?

⁷ Nega ta sibona oi nanadaia, ‘Iehova be lau ia laloa bada, a?’ Bema oi be sibona oi laloa maragi, reana do oi laloa, oi hegeregere lasi Havaraia Tauna ena turana ai oi lao totona. Reana King Davida danu be unai bamona lalohadai ia abia. Ia laloa Iehova ese taunimanima ia laloa bada karana be idau momokani, bona ia gwau: “Iehova e, taunimanima be dahaka bona oi ese idia oi laloa noho? Taunimanima ena natuna be dahaka bona oi ese ia oi naria?” (Sal. 144:3) Unai henanadai ena haere be edeseni do oi davaria?

8. Samuela Ginigunana 16:6, 7, 10-12 hegeregerena, Iehova ese taunimanima dekenai dahaka ia itaia?

⁸ Baibel amo ita dibaia, ma haida ese idia laloa maragi taudia be Iehova ese ia laloa bada. Hegeregere, Iehova ese Samuela be Iese ena ruma dekenai ia siaia, unai amo ena natuna mero ta do ia horoa Israela ena king ai ia lao totona. Iese be ena natuna memero 8 amo 7 ia boiria mai Samuela idia hedavari henia totona, to ena mero dokona Davida be ia noho lasi.b To, Iehova ese Davida ia abia hidi. (1 Samuela 16:6, 7, 10-12 duahia.) Iehova ese Davida ena kudouna ia itaia bona unai mero matamata be Iehova ia lalokau henia bada.

9. Dahaka dainai oi abia dae Iehova be oi ia laloa bada? (Laulau itaia danu.)

⁹ Mani oi laloa, Iehova ese ia hahedinaraia vadaeni oi ia laloa bada. Ia ese oi davaria hekwakwanai totona, sisiba namodia ia henia. (Sal. 32:8) Unai ese ia hamomokania ia be oi do ia durua gauna ia diba. (Sal. 139:1) Iehova ena sisiba oi badinaia bona oi itaia unai ese oi ia durua neganai, do oi abia dae momokani Iehova be oi ia laloa bada. (1 Siv. 28:9; Kara 17:26, 27) Iehova be ia totona oi karaia gaudia ibounai ia itaia. Danu ia ese emu kara namodia ia itaia bona ia ura emu turana ai ia lao. (Ier. 17:10) Bona do ia moale bada, bema oi ura ia oi tura henia danu.—1 Ioa. 4:19.

GUNA OI KARAIA ABIA HIDI DAINAI OI DARADARA, A?

10. Guna ita karaia abia hidi ita laloa neganai, dahaka henanadai do ita abia?

¹⁰ Haida be guna abia hidi idia karaia, bona gabeai idia laloa bema idia karaia abia hidi be maoro. Reana abia hidi idia karaia, edia moni gaukara namona bona bisinesi idia rakatania, Iehova ena hesiai gaukara idia karaia totona. To unai abia hidi be reana lagani momo gunanai idia karaia. Reana edia turadia haida be moni gaukara namona idia karaia, bona hari taga maurina idia noholaia. Unai dainai, reana do idia laloa: ‘Iehova totona egu ura gaudia lau dadaraia be maoro, a? Eiava Iehova lau hesiai henia dainai, gau momo lau reaia noho, a?’

11. Dahaka dainai Salamo 73 ia torea tauna be lalohadai kererena ia abia?

¹¹ Bema oi danu be sibona dekenai unai bamona henanadai oi henia, mani Salamo 73 ia torea tauna ena hemami oi laloa. Ia itaia, haida be Iehova idia hesiai henia lasi, to edia helt ia namo, taga maurina idia noholaia, bona hekwakwanai momo idia davaria lasi. (Sal. 73:3-5, 12) Ia itaia, edia mauri be ia namo dainai, ia mamia Iehova ena hesiai gaukara lalonai ena hekwarahi be anina lasi. Unai lalohadai kererena ia abia dainai, “dina ibounai ena lalona ia hisihisi noho.” (Sal. 73:13, 14) Unai dainai dahaka ia karaia?

12. Salamo 73:16-18 hegeregerena, salamo torea tauna be dahaka ese ia durua lalohadai kererena ia dadaraia totona?

¹² Salamo 73:16-18 duahia. Salamo torea tauna be Iehova ena dubu helaga dekenai ia lao. Unuseniai, Iehova ena taunimanima huanai lalomaino ia abia. Ia laloparara ena be haida be mauri namona idia noholaia, to idia dekenai vaira nega ena helaro be lasi. Unai dainai, ia abia lalohadai kererena ia dadaraia bona ia abia dae, Iehova hesiai henia karana be abia hidi hereadaena. Bona ena lalona ia hadaia Iehova ia hesiai henia noho totona.—Sal. 73:23-28.

13. Guna oi karaia abia hidi dainai, hari oi lalohekwarahi neganai, dahaka oi karaia be namo? (Laulau itaia danu.)

¹³ Oi danu be Baibel amo emu lalohadai kereredia oi hamaoromaoroa diba. Edena dala ai? Oi dekenai idia noho gau namodia oi laloa, hegeregere, oi be Iehova ena lalonamo oi abia, bona laloatao Iehova idia hesiai henia lasi taudia be ena heduru idia abia lasi. Idia dekenai hari idia noholaia mauri namona be mai anina bada, badina vaira nega ena helaro idia abia lasi. To, oi be Iehova ese hari hahenamo ia henia noho, bona vaira negai danu hahenamo momo do ia henia. (Sal. 145:16) Danu, mani inai oi laloa: Bema oi be guna abia hidi idauna oi karaia, hari emu mauri be edena bamona? To inai oi diba be namo: Iehova bona emu dekena taudia oi lalokau henia dainai, abia hidi oi karaia neganai, emu mauri ai oi abia gaudia ese oi do idia hamoalea.

BEMA OI LALOA IEHOVA ESE OI DO IA GAUKARALAIA LASI

14. Haida dekenai dahaka ia vara, bona sibona dekenai dahaka henanadai idia henia?

¹⁴ Iehova ena hesiai taudia haida be idia buruka bona idia gorere dainai, idia mamia gau momo idia karaia diba lasi. Unai dainai, reana do idia mamia Iehova dekenai idia be anina lasi. Reana sibona do idia nanadaia, ‘Iehova be lau do ia gaukaralaia noho, a?’

15. Salamo 71 ia torea tauna be dahaka ia abia dae?

¹⁵ Salamo 71 ia torea tauna danu be unai bamona ia mamia. Ia guriguri: “Namo lasi egu goada ia ore neganai lau oi rakatania.” (Sal. 71:9, 18) To ia abia dae momokani, bema mai abidadama ida Iehova ia hesiai henia, ia ese do ia hakaua bona durua. Salamo torea tauna ese ia dibaia gauna be, Iehova be edia goada hegeregerena ia idia hesiai henia taudia dekenai ia moale.—Sal. 37:23-25.

16. Edena dala ai Iehova ese buruka taudia ia gaukaralaia diba? (Salamo 92:12-15)

¹⁶ Buruka taudia e, Iehova ese umui ia laloa bada, bona unai umui diba be namo. Ia ese umui ia durua diba, mai abidadama ida ia umui hesiai henia totona, ena be emui goada be hegeregere lasi. (Salamo 92:12-15 duahia.) Namona be hari oi karaia diba lasi gauna dainai oi laloa momo lasi, to oi karaia diba gauna oi laloa bada. Hegeregere, emu abidadama bona ma haida oi laloa bada karana ese ma haida ia hagoadaia diba. Lagani momo lalonai Iehova ese oi ia durua dalana bona vaira nega totona oi naria noho gwauhamata namodia oi herevalaia. Danu laloatao, ma haida totona oi guriguri karana ese idia do ia durua. (1 Pet. 3:12) Ena be iseda noho daladia be idauidau, to ita ibounai ese Iehova bona ma haida totona gau ta ita karaia diba.

17. Dahaka dainai ma haida ida sibona ita hahegeregerea lasi be namo?

¹⁷ Bema hari Iehova ena hesiai gaukara lalonai, gau momo oi karaia diba lasi dainai oi lalohisihisi, namona be oi abia dae Iehova ese oi karaia diba gauna ia laloa bada. Reana oi karaia gaudia, be oi ura ma haida ida oi hahegeregerea. Namo lasi unai bamona oi karaia! Dahaka dainai? Badina Iehova ese ita be ma haida ida ia hahegeregerea lasi. (Gal. 6:4) Haheitalai ta be, Maria ese Iesu dekenai dava bada bonana namo dehoro ia henia. (Ioa. 12:3-5) To, ogogami vabuna ta ese dubu helaga totona koini maragidia rua ia udaia. (Luka 21:1-4) Iesu ese unai hahine rua ia hahegeregerea lasi. Ia itaia Maria bona ogogami vabuna be edia abidadama karana idia hahedinaraia. Iesu be ena Tamana ia tohotohoa goevagoeva. Unai dainai oi abia dae diba, Iehova oi abidadama henia bona mai ura ida ia totona oi karaia gaudia ia laloa bada, ena be oi mamia unai be hegeregere lasi.

18. Dahaka ese ita do ia durua iseda daradara gaudia ita hanaia totona? (Maua itaia danu, “Iehova Ena Hereva ese Oi Ia Durua Diba Daradara Gaudia Oi Hanaia Totona.”)

¹⁸ Nega haida ita daradara. To inai stadi amo ita diba, Baibel ese ita ia durua, iseda daradara gaudia ita hanaia totona. Unai dainai oi gaukara goada emu henanadai edia haere oi tahua, unai amo do oi laloa momo lasi. Iehova be oi ia diba namonamo. Ia totona oi karaia abia hidi ia laloa bada bona ia gwauhamata oi do ia hanamoa. Namona be oi diba, Iehova ese ena abidadama hesiai taudia ta ta ia lalokau henia bona laloa bada.