Mai Kudouna Ibounai ida Iehova Ita Guriguri Henia Dalana

1-2. (a) Dahaka ese ita ia koua Iehova dekenai iseda hemami ibounai ita gwauraia totona? (b) Edena dala ai ita diba Iehova be mai ura ida iseda guriguri ia kamonai?

OI LALOA emu guriguri ai nega momo gau tamona sibona oi herevalaia loulou eiava Iehova dekenai emu hemami ibounai oi herevalaia lasi, a? Bema unai bamona, oi lalohisihisi lasi, haida danu be unai bamona idia mamia. Ita bisi bada dainai, guriguri kwadogina sibona ita gwauraia. Eiava ita laloa ita hegeregere lasi dainai Iehova dekenai iseda hemami ibounai ita gwauraia lasi.

² Baibel ia hahedinaraia Iehova ia ura mai kudouna ibounai ida ia ita guriguri henia. Ia ese “manau taudia edia noinoi” ia kamonai. (Sal. 10:17) Iseda hereva ibounai ia kamonai namonamo, badina ita ia laloa bada.—Sal. 139:1-3.

3. Inai atikol ai dahaka henanadai do ita herevalaia?

³ Reana oi laloa: Dahaka dainai ita gari lasi iseda hemami ibounai ita gwauraia totona? Edena bamona iseda guriguri amo Iehova kahirakahira ita lao diba? Baibel ai Iehova ena hesiai taudia ese idia gwauraia guriguri laloa dobu karana ese edena dala ai ita ia durua iseda guriguri dalana ita hanamoa totona? Bona dahaka ita karaia, bema ita lalohisihisi dainai, ita diba lasi Iehova dekenai dahaka do ita gwauraia? Unai henanadai edia haere do ita herevalaia.

OI GARI LASI IEHOVA OI GURIGURI HENIA TOTONA

4. Dahaka ese ita ia durua diba, iseda lalona ibounai ita gwauraia hedinarai totona? (Salamo 119:145)

⁴ Bema ita diba Iehova be tura namona ta bamona ia ura ita ia durua ita kwalimu totona, ita ese mai lalona ibounai ida ia do ita hereva henia. Salamo 119 ia torea tauna danu ia ura unai dala ai Iehova ia tura henia. Ena mauri ai hekwakwanai ia davaria danu. Bona taunimanima ese ia idia koia. (Sal. 119:23, 69, 78) Ia be goevadae lasi dainai ia kerere danu. (Sal. 119:5) To, ia be ia gari lasi Iehova dekenai ena hemami ibounai ia gwauraia.—Salamo 119:145 duahia.

5. Dahaka dainai namo lasi ita abia lalohadai kererena ese ita ia koua ita guriguri totona? Haheitalai gwauraia.

⁵ Iehova ia ura kerere badadia idia karaia taudia be ia idia guriguri henia. (Isa. 55:6, 7) Unai dainai namo lasi ita karaia kerere dainai ita gwau ita hegeregere lasi ita guriguri totona. Mani haheitalai ta ita laloa, peleini ena pailot ia diba bema heduru ia ura, peleini ena roho dalana idia naria taudia ia hereva henia diba. To gabu kererena ia lao dainai ia boio neganai, ia hemarai dainai do ia ura lasi unai naria taudia ia hereva henia, a? Lasi! Unai hegeregerena bema nega haida ita manoka eiava kara dika ta ita karaia, namona be Iehova ita guriguri henia totona ita gari lasi.—Sal. 119:25, 176.

EMU GURIGURI KARANA OI HANAMOA DALANA

6-7. Iehova ena kara namodia laloa karana ese edena dala ai iseda guriguri ia hanamoa diba? Haheitalai gwauraia. (Futnout itaia danu.)

⁶ Iehova dekenai iseda lalohadai bona hemami ibounai ita herevalaia neganai, ena turana namona ai ita lao diba. Unai dainai edena dala ai iseda guriguri ita hanamoa diba?

⁷ Iehova ena kara namodia laloa.a Iehova ena kara namodia ita laloa dobu neganai, unai ese ita do ia durua iseda lalohadai ibounai ita gwauraia totona. (Sal. 145:8, 9, 18) Taihu ta ladana Kristine, mani ita laloa. Iena tamana be dagedage tauna. Ia gwau: “Unai dainai Iehova be tamana ta bamona lau hereva henia be auka. Lau mamia lau be goevadae lasi dainai, ia ese lau do ia abia dae lasi.” Dahaka ese Kristine ia durua? Ia gwau: “Iehova ena lalokau karana lau laloa neganai, lau mamia Iehova ese lau ia lalokau henia. Lau diba ia ese lau do ia rakatania lasi. Ena be nega haida do lau kerere, to mai lalokau ida lau do ia durua. Unai ese lau ia durua egu moale bona lalometau ibounai lau gwauraia totona.”

8-9. Oi do guriguri lasi neganai, oi gwauraia gaudia oi laloa guna karana ena namo haida be dahaka? Haheitalai gwauraia.

⁸ Do oi gwauraia gaudia oi laloa guna. Oi do guriguri lasi neganai, sibona dekenai henanadai haida oi henia diba. Hegeregere: ‘Hari egu hekwakwanai be dahaka? Ta ena kerere lau gwauatao be namo, a? Egu mauri ai gau haida idia idau dainai Iehova ena heduru lau abia be namo, a?’ (2 Ki. 19:15-19) Danu Iesu ese ia hadibaia guriguri dalana ita laloatao bona Iehova ena ladana, ena Basileia bona ena ura do ita gwauraia dalana ita laloa.—Mat. 6:9, 10.

⁹ Taihu ta ladana Aliska be ia diba ena adavana be kwarana ena kensa gorere ia abia neganai, ia auka ia guriguri totona. Ia gwau: “Lau lalometau bada dainai, lau laloa momo bona ia auka lau guriguri totona.” Dahaka ese ia ia durua? Ia gwau: “Lau do guriguri lasi neganai, lau laloa guna dahaka do lau gurigurilaia, bona unai ese lau ia durua dainai egu guriguri ai lau sibona bona egu adavana ena gorere sibona lau herevalaia lasi. Unai ese lau ia durua lalomaino lau abia totona bona Iehova dekenai gau ma haida lau herevalaia diba.”

10. Dahaka dainai guriguri oi gwauraia haragaharaga lasi? (Laulau itaia danu.)

¹⁰ Guriguri oi halataia diba. Ena be guriguri kwadogina lalonai mai anina bada gaudia ita gwauraia, to iseda guriguri ia lata neganai, iseda lalohadai bona hemami ibounai ita gwauraia namonamo diba.b Aliska ena adavana Elijah, ia gwau: “Dina tamona lalonai, nega momo lau guriguri. Bona egu guriguri lau halataia dainai, unai ese egu hetura karana Iehova ida ia hagoadaia. Iehova be do ia hesiku lasi egu guriguri ia kamonai totona, unai dainai nega bada lalonai ia lau hereva henia.” Nega bona gabu namona ta oi abia hidi, unai amo gau ta ese emu guriguri karana do ia koua lasi. Bona guriguri latana oi gwauraia neganai, mai gado bada ida oi gwauraia. Bona nega momo unai bamona oi karaia.

BAIBEL LALONAI IDIA TOREA GURIGURI OI LALOA

11. Baibel lalonai mai kudouna ibounai ida idia gwauraia guriguri ita laloa neganai, edena dala ai ita ia durua diba? (Maua ladana “Edia Hemami Oi Lalopararalaia, A?” itaia danu.)

¹¹ Baibel lalonai idia noho guriguri bona ane oi laloa dobu neganai, oi idia durua diba. Dirava ena hesiai taudia ese edia guriguri ai edia hemami idia gwauraia dalana oi laloa neganai, unai ese oi do ia hagoadaia Iehova dekenai emu hemami ibounai oi gwauraia totona. Danu hereva namodia haida do oi davaria, emu guriguri lalonai oi gwauraia totona. Bona do oi itaia Dirava ena hesiai taudia ese idia gwauraia guriguri haida be oi davaria hemami hegeregerena.

12. Baibel lalonai ia noho guriguri ta ita laloa neganai, ita sibona dekenai dahaka henanadai ita henia diba?

¹² Baibel lalonai ia noho guriguri ta ita laloa neganai, sibona ita nanadaia: ‘Daika ese unai hereva ia gwauraia bona ena noho dalana be edena bamona? Unai guriguri be lauegu hemami bona lalohadai ia hahedinaraia, a? Unai guriguri amo dahaka lau dibaia?’ Unai henanadai edia haere abia totona, tahua gaukara haida oi karaia diba, bona ia be mai ena namo. Mani haheitalai haida ita laloa.

13. Hana ena guriguri amo dahaka ita dibaia? (1 Samuela 1:10, 11) (Laulau itaia danu.)

¹³ Samuela Ginigunana 1:10, 11 duahia. Hana be unai guriguri ia gwauraia neganai, ia be hekwakwanai badadia rua ia haheaukalaia noho. Ia be natuna ia havaraia diba lasi, bona ena tau ena adavana ma ta ese ia hahisia noho. (1 Sam. 1:4-7) Bema oi be hekwakwanai ta oi haheaukalaia noho, Hana ena guriguri amo dahaka oi dibaia? Ia be nega bada ia atoa Iehova dekenai ena lalohekwarahi ibounai ia gwauraia totona, bena lalomaino ia abia. (1 Sam. 1:12, 18) Ita danu lalomaino ita abia diba bema iseda “metau be Iehova dekenai [ita] negea lao,” anina be, Iehova dekenai iseda lalohekwarahi bona iseda hemami ibounai ita gwauraia.—Sal. 55:22.

14. (a) Hana ena haheitalai amo dahaka gau ma haida ita dibaia? (b) Baibel ena hereva ita duahia bona laloa dobu neganai, edena dala ai iseda guriguri karana ita hanamoa diba? (Futnout itaia.)

¹⁴ Hana ena natuna mero, Samuela, ia vara bona lagani haida murinai, Hana ese Samuela be Hahelaga Tauna Badana Eli dekenai ia henia. (1 Sam. 1:24-28) Hana ena guriguri lalonai, Iehova ia noia ena kamonai hesiai taudia ia gimaia bona naria totona.c (1 Sam. 2:1, 8, 9) Ruma ai Hana ena hekwakwanai be ia ore lasi, to ia be Iehova ese ia hanamoa dalana ia laloa bada. Unai amo dahaka ita dibaia? Ita davaria noho hekwakwanai ita haheaukalaia diba bema Iehova ese ita ia hanamoa noho dalana ita laloa bada.

15. Kara gageva ita davaria neganai, peroveta tauna Ieremia ena guriguri amo dahaka ita dibaia? (Ieremia 12:1)

¹⁵ Ieremia 12:1 duahia. Peroveta tauna Ieremia be nega ta kara dika taudia edia mauri namona ia itaia dainai ia lalohisihisi. Bona Israela taudia ese ia idia hevaseha henia dainai, ia lalohisihisi danu. (Ier. 20:7, 8) Ieremia bamona, ita danu be koikoi taudia edia mauri namona ita itaia eiava ita idia hevaseha henia neganai, ita lalohisihisi. Ena be Ieremia be Dirava dekenai ena lalohisihisi ia gwauraia, to ia gwau lasi Dirava ia kara maoromaoro lasi. Ia itaia Iehova ese gwau-edeede taudia ia matahakani henia, unai dainai Dirava ena hahemaoro maoromaoro karana dekenai ena abidadama ia habadaia. (Ier. 32:19) Ita danu Iehova dekenai iseda lalohisihisi gaudia ita gwauraia diba, to ita diba Iehova be ena nega maorona ai kara gageva karadia ibounai do ia hamaoromaoroa.

16. Bema ita hegeregere lasi gau haida ita karaia totona, igui hesiai Levi tauna amo dahaka ita dibaia? (Salamo 42:1-4) (Laulau itaia danu.)

¹⁶ Salamo 42:1-4 duahia. Unai ane be sibona ia noho igui hesiai Levi tauna ese ia torea. Ena ane ese ena hemami ia hahedinaraia. Bema gorere eiava gau ma haida dainai ruma sibona ai oi noho eiava dibura ruma ai oi noho, Levi tauna ese ia abia hemami oi mamia diba. Nega haida iseda hemami do ia namo, ma nega haida iseda hemami do ia dika, to namona be guriguri ai unai ita gwauraia hedinarai. Unai ese ita do ia durua iseda lalohadai ita sekea bona lalohadai maorona ita abia totona. Hegeregere, Levi tauna ia laloparara ia be mai ena dala haida Iehova ia hanamoa totona. (Sal. 42:5) Danu Iehova ese ia naria dalana ia laloa. (Sal. 42:8) Hanaihanai Dirava ita guriguri henia karana ese ita do ia durua iseda hemami ita sekea totona, lalohadai maorona ita abia, bona goada ita abia ita haheauka totona.

17. (a) Peroveta tauna Iona ena guriguri amo dahaka ita dibaia? (Iona 2:1, 2) (b) Nega aukadia ita davaria neganai, edena dala ai Salamo bukana ena hereva haida ese ita idia durua diba? (Futnout itaia.)

¹⁷ Iona 2:1, 2 duahia. Peroveta tauna Iona be gwarume badana ena bogana lalonai ia noho neganai, unai guriguri ia gwauraia. Ena be Iehova ena hereva ia badinaia lasi, to ia abia dae Dirava ese ena guriguri do ia kamonai. Iona ena guriguri lalonai, Salamo buka ena hereva momo ia gaukaralaia.d Toana be unai hereva momo ia diba. Unai hereva ia laloa dobu dainai, ia diba momokani Iehova ese ia do ia durua. Unai hegeregerena, bema Baibel ena siri haida ita laloatao, nega aukadia ai Iehova ita guriguri henia neganai, unai siri do ita laloatao lou.

GURIGURI KARANA AMO IEHOVA KAHIRAKAHIRA ITA LAO NOHO

18-19. Nega haida bema ia auka guriguri lalonai iseda hemami ita gwauraia totona, edena dala ai Roma 8:26, 27 ese ita ia durua diba? Haheitalai gwauraia.

¹⁸ Roma 8:26, 27 duahia. Nega haida ia auka guriguri lalonai iseda hemami ita gwauraia totona. To heduru ia noho. Unai bamona negadia ai, Dirava ena lauma helaga be ita totona do ia noinoi eiava ita do ia durua. Edena dala ai? Iehova be ena lauma helaga amo Baibel ai guriguri momo ia torea. Unai dainai bema ita laloa guiguri ai iseda hemami ita gwauraia namonamo diba lasi, Baibel ai idia noho hereva ita gaukaralaia diba, bona Iehova ese do ia abia dae unai be iseda noinoi bona ia ese do ia haerelaia.

¹⁹ Unai ese Russia taihu ta ladana Yelena ia durua. Ena guriguri karana bona Baibel ia duahia dainai, pulisi ese idia arest. Yelena be ia lalohisihisi bada dainai ia auka ia guriguri totona. Ia gwau: “Lau laloatao, lau lalometau bona lau diba lasi egu guriguri ai dahaka do lau gwauraia neganai, Iehova ese ena idaunega hesiai taudia edia guriguri ia abia dae. . . Edia guriguri be lau ura karaia guriguri hegeregerena. . . . Unai ese unai nega aukana lalonai lau ia hagoadaia bada.”

20. Ita lalometau neganai, edena dala ai guriguri totona iseda lalona ita hegaegaelaia diba?

²⁰ Ita lalometau neganai, do ita guriguri to guriguri lalonai lalohadai idauidau ita abia diba. Unai dainai iseda lalona ita hegaegaelaia totona, Salamo bukana ena rekodin ita kamonai. Danu ita lalohekwarahilaia gaudia be noutbuk ta ai ita torea diba, King Davida ia karaia bamona. (Sal. 18, 34, 142; supaskripsen.) Oibe, guriguri totona edena bamona iseda lalona ita hegaegaelaia karana dekenai taravatu ta ia noho lasi. (Sal. 141:2) Oi dekenai ia hegeregere dalana oi badinaia diba.

21. Dahaka dainai mai kudouna ibounai ida ita guriguri diba?

²¹ Ita diba iseda hemami ita do gwauraia lasi neganai, Iehova be unai ia diba. Unai ese ita ia hagoadaia. (Sal. 139:4) To, ita guriguri neganai ita hahedinaraia ia ita abidadama henia, bona unai ese ia do ia hamoalea. Unai dainai emu guba Tamana oi guriguri henia be namo. Baibel lalonai idia torea guriguri herevadia amo heduru oi abia. Mai kudouna ibounai ida oi guriguri. Oi moalelaia gaudia bona oi lalohekwarahilaia gaudia oi gwauraia hedinarai. Iehova be emu Turana namona dainai, hanaihanai ia noho hegaegae oi ia durua totona!