Bema Lau Ura Lasi Lau Mauri Noho be Edena Bamona?

“Lagani haida bamona gunanai, egu lalohekwarahi ia bada herea dainai lau mamia lau be dina ta ta ai lahi lau habodoa bamona. Unai negai sibona hamasea lalohadaina lau abia. To lau ura lasi lau mase. Lau ura egu hisihisi lau hadokoa.”—Jonathan, 17.

Tahua gaukara (survey) ta lalonai, high school stiuden 14,000 idia nanadaia neganai, kahirakahira stiuden 5 edia orea ta ta amo, tamona ia gwau ia be hua 12 gunanai sibona hamasea lalohadai ia abia.a Bema oi mamia oi mauri noho be anina lasi, dahaka oi karaia diba?

• Naria. Abia hidi oi karaia sibona hamasea lalohadai do oi badinaia haraga lasi. Ena be oi mamia oi davaria problem idauidau oi hanaia be auka, to emu problem oi haheaukalaia totona oi ia durua diba daladia idia noho.

Reana do oi mamia emu problem hanaia dalana ta be lasi. To oi abia hemami be hanaihanai idia momokani lasi. Emu hekwakwanai oi hamaoromaoroa daladia idia noho; heduru maorona oi abia neganai, oi davaria hekwakwanai oi hamaoromaoroa haraga diba.

• Baibel ena hakaua herevana: “Kahana ibounai amo metau idauidau ese ai idia koua noho, to ai idia koua momokani lasi, ai laloa daradara, to hanaia dalana ia noho.”—2 Korinto 4:8.

  Heduru herevana: Bema sibona oi ura hamasea lalohadaina ia goada, idia noho vadaeni heduru abia gabudia oi tahua be namo—reana sibona hamasea karana idia koua taudia (suicide-prevention hotline) eiava hospital emergency room oi hadibaia. Unuseniai idia gaukara taudia be heduru do idia henia daladia dekenai treinini idia abia, bona idia ura oi idia durua.

• Ta oi hereva henia. Oi idia laloa bada bona idia ura oi idia durua taudia idia noho. Idia be emu turadia bona ruma bese taudia, bona reana idia oi hadibaia lasi dainai oi dekenai ia vara gauna idia diba lasi.

Taunimanima haida be mata-galasi ese ia durua idia itaia namonamo totona. Unai hegeregerena, turana ta ese oi ia durua diba emu problem oi lalohadailaia namonamo, bona oi ura mauri noho ena lalohadai oi abia lou totona.

• Baibel ena hakaua herevana: “Tura korikori be . . . hekwakwanai negadia ai . . . oi ia durua.”—Aonega Herevadia 17:17.

  Heduru herevana: Herevahereva hamatamaia totona, reana oi gwau: “Vanegai lau be lalohadai kereredia haida lau abia. Ia namo oi dekenai lau herevalaia diba?” Eiava oi gwau diba: “Lau be mai egu problem haida bona lau sibona ese lau hamaoromaoroa be auka. Oi dekenai ia hegeregere lau oi durua totona?”

• Medikol taudia oi itaia. Helt problem haida hegeregere lalohekwarahi eiava lalometau karana dainai taunimanima idia ura lasi do idia mauri noho. To sivarai namona be unai bamona gorere hanamoa daladia idia noho.

Flu gorere ese aniani oi ania urana ia koua hegeregerena, lalometau karana ese do oi mauri noho urana ia kokia diba. To, unai gorere rua oi hanamoa dalana ia noho.

• Baibel ena hakaua herevana: “Gorere lasi taudia be doketa idia tahua lasi, to gorere taudia sibona ese idia tahua.”—Mataio 9:12.

  Heduru herevana: Oi mahuta namonamo bona oi eksasais, bona emu helt ia durua aniani oi ania. Emu helt ese emu hemami dalana ia haidaua diba.

• Guriguri. Baibel ia gwau iseda Havaraia Tauna “be iseda kudouna ia hereaia bona gau ibounai ia diba.” (1 Ioane 3:20) Hari, guriguri amo ia oi hereva henia be namo. Iena ladana, Iehova, oi gaukaralaia bona emu hemami korikori oi herevalaia.

Problem haida be oi sibona ese oi hamaoromaoroa diba lasi. Emu Havaraia Tauna, Iehova, be ia ura oi ia durua.

• Baibel ena hakaua herevana: “Emui noinoi herevadia be Dirava dekenai do umui gwauraia hedinarai. Bona Dirava ena maino, laloparara ibounai ia hereaia gauna . . . ese emui kudouna bona lalona do ia gimaia.”—Filipi 4:6, 7.

  Heduru herevana: Iehova dekenai emu problem oi herevalaia sibona lasi, to oi dekenai ia vara gau namona ta oi laloa bonaia oi tanikiu henia. (Kolose 3:15) Tanikiu karana ese oi ia durua diba emu mauri ai gau namodia oi laloa bada totona.

Bema oi laloa oi mauri noho be anina lasi, heduru oi abia. Matamanai ita herevalaia tauna, Jonathan, be unai bamona ia karaia. Ia gwau: “Lau diba egu tama sina ida gau momo lau herevalaia bona medikol heduru lau abia be namo. To, hari egu hemami ia namo bona lau moale. Ena be nega haida lau lalohisihisi, to hari sibona hamasea lalohadai lau abia lasi.”