MATAMATA TAUDIA EDIA HENANADAI

Edena Dala ai Baibel ese Lau Ia Durua Diba?—Kahana 3: Emu Baibel Duahiduahi amo Namo Oi Abia

Baibel oi kehoa neganai, toretore momo do oi itaia. Namona be oi hesiku lasi! To, Baibel be teibolo ta mai ena aniani momo bamona oi laloa. Oi itaia gaudia ibounai oi ania diba lasi. To oi ura henia gaudia sibona oi abia hidi diba bona oi moalelaia.

Baibel “duahiduahi” amo namo oi abia totona, oi duahia gaudia oi laloa bada be namo. Inai atikol ese oi do ia durua unai oi karaia totona.

Inai atikol ai

Dahaka dainai Baibel amo oi duahia gaudia oi laloa bada?

Baibel duahia karana oi goadalaia neganai, namo do oi davaria. Mani inai oi laloa: tea bag ta be ranu siahu lalonai oi udaia bona oi kokia haraga neganai flavor haida sibona oi abia diba. To ena flavor momo oi abia diba bema ranu siahu lalonai ia noho daudau.

Ti kapusi ta mai ena laini. Ti kapusi ena kahana ta be ia korema momokani lasi. Ena kahana ma ta be ia korema momokani badina tea bag ia noho daudau.

Baibel duahiduahi karana danu be unai bamona. Namo lasi oi duahia haragaharaga, to nega oi atoa oi duahia gauna oi laloa totona. Salamo 119 ia torea tauna be unai ia karaia. Dirava ena taravatu be inai bamona ia gwauraia: “Dina ibounai lalonai unai taravatu lau laloa dobu.”—Salamo 119:97.

Momokani, unai ese ia hahedinaraia lasi dina ta ena hora ibounai lalonai Baibel do oi duahia bona lalohadailaia. To ena anina be: Salamo torea tauna be nega ia atoa Dirava ena Hereva ia lalohadailaia totona. Unai ese ia durua disisen maorodia ia karaia totona.—Salamo 119:98-100.

“Egu sinana be nega ta lau ia hamaoroa, ‘Wiki ta lalonai oi totona dina 7 idia noho, bona unai wiki lalonai oi be oi sibona totona gau momo oi karaia. Ia namo Iehova totona nega oi henia danu? Unai be kara maorona!’”—Melanie.

Baibel ena hakaua herevadia oi laloa neganai, disisen namodia oi karaia diba—hegeregere, bema turadia oi ura abia hidi eiava kerere ta karaia ena hahetoho oi davaria.

Edena dala ai Baibel duahiduahi amo namo oi abia diba?

Palani ta oi karaia. Mero matamata ta ladana Julia ia gwau: “Baibel duahiduahi ena sediual ta oi karaia. Do oi duahia gauna oi diba, edena negai do oi duahia, bona edeseni do oi duahia.”

Kekeni matamata ta be kalenda ai ena Baibel duahiduahi sediual ia torea.

Gabu maorona abia hidi. Kekeni matamata ta ladana Gianna ia gwau: “Regerege lasi gabuna ta oi tahua. Danu, emu ruma bese taudia dekenai emu Baibel duahiduahi ena sediual oi hadibaia, unai amo oi do idia disteb lasi.”

Bema oi be electronic devise ta oi gaukaralaia, notification ibounai oi koua. Eiava idia printaia Baibel ta oi gaukaralaia diba. Momokani, tahua gaukara ese ia hahedinaraia idia printaia pablikeisen amo duahiduahi karana ese oi ia durua diba oi duahia gauna oi lalopararalaia totona. To, do ia auka oi laloa dobu totona bema screen o electronic devise amo oi duahia.

“Lau davaria screen amo duahiduahi karana ese lau ia durua lasi. Egu fon dekenai notification momo idia vareai, batere ena goada ia ore eiava Intanet ia gaukara lasi. Idia printaia bukana duahia totona, lau laloa momo gauna be diari o lait sibona.”—Elena.

Oi guriguri guna. Iehova oi noia oi ia durua, Baibel amo oi ura duahia kahana oi lalopararalaia, laloatao, bona namo oi davaria.—Iamesi 1:5.

Emu guriguri hegeregerena oi karaia totona, oi duahia gauna oi tahua dobu. Edena bamona unai oi karaia diba? Bema oi be JW Library app oi gaukaralaia o onlain amo Baibel oi duahia, siri ta oi klik diba ena research haida bona atikol ma haida oi davaria totona.

Henanadai gaukaralaia. Hegeregere: ‘Inai sivarai amo Iehova dekenai dahaka lau dibaia? Iena kara ta ia hahedinaraia do lau tohotohoa totona?’ (Efeso 5:1) ‘Inai sivarai amo dahaka lau dibaia egu mauri ai lau badinaia totona?’ (Salamo 119:105) ‘Lau duahia gauna lau gaukaralaia diba ma haida lau durua totona?’—Roma 1:11.

Sibona oi nanadaia, ‘Edena dala ai lau duahia gauna be Baibel ena hereva badana ida ia hegeregere?’ Unai henanadai be mai anina bada. Dahaka dainai? Badina Baibel ai idia noho gaudia ibounai—Genese amo ia lao Apokalupo—be hereva badana tamona idia herevalaia: Unai be Iehova ese ena guba Basileia amo ena ladana do ia hahelagaia bona do ia hamomokania ia lohia be maoro bona iena lohia dalana be hereadae.

Emu turadia be dahaka idia gwau

“Bema oi be histori oi ura henia, taim laini eiava Baibel ai idia noho bese ta ta edia akioleji oi stadilaia. Bema oi be taunimanima edia kara oi ura diba, Davida ena sivarai oi stadilaia. Gau momo idia noho. Namona be oi ura stadilaia gauna oi laloa.”—Judah.

“Baibel ai sivarai ta lau duahia neganai, lau ura sivarai lalonai idia noho taudia ta ta edia kara lau laloa—namo eiava dika—bona lau henanadai, ‘Inai tauna dekenai dahaka ia vara? Unai tau eiava hahine ena kara be edena bamona, bona dahaka ia vara?’ Bena sibona lau nanadaia, ‘Inai sivarai ese edena bamona lau ia durua diba?’”—Mackenzie.

“Baibel sivarai ta ena anina lalopararalaia totona tahua gaukara lau karaia. Hegeregere, edena negai idia torea? Daika ese ia torea, bona unai Baibel buka be dahaka ia ura hahedinaraia? Sivarai momo be hari iseda nega ida ia hegeregere, to tahua dobu karana ese lau ia durua unai sivarai ese Baibel negadiai idia noho taudia ia durua dalana lau laloa totona.”—Elle.

“Baibel lau duahia neganai, ta dekenai unai sivarai do lau gwauraia hedinarai dalana lau laloa. Edena dala ai lau durua ia laloparara totona? Edena haheitalai do lau gaukaralaia point badana lau hahedinaraia totona? Unai henanadai edia haere lau laloa karana ese lau ia durua lau duahia gauna lau lalopararalaia namonamo totona. Momokani, ‘Gau ta oi dibaia totona ma haida dekenai oi hadibaia be namo.’”—Owen.