Pendemik ese Ia Havaraia Hemami Hanaia Dalana

COVID-19 dainai oi mamia emu goada ia ore bona oi gari, a? Bema oibe, ma haida danu be unai idia mamia. Tanobada ibounai dekenai taunimanima be hua momo lalonai, pendemik dainai idia gari. World Health Organization Regional Director for Europe Dr. Hans Kluge ia gwau, taunimanima be “COVID-19 koua totona idia hekwarahi bada. Unai bamona negadia ai vaia ita lalohisihisi bona ita ura lasi gau ta ita karaia, anina be iseda goada ia ore gaukara karaia totona.”

Bema oi be unai hemami oi abia, namo lasi oi lalomanoka. Baibel ese momo ia durua noho inai nega aukana idia haheaukalaia totona. Oi do ia durua danu.

Pendemik ese lalohadai bona tauanina dekenai dahaka ia havaraia?

Pendemik ese taunimanima edia mauri ia haidaua dainai idia daradara vaira nega ai edia mauri dekenai dahaka do ia vara. Pendemik dainai taunimanima ese idia mamia hemami be idauidau, to idia mamia toa haida be inai:

Gau ta idia ura lasi karaia
Edia aniani bona mahuta karana ia senisi
Idia badu
Idia karaia diba gaukarana idia karaia namonamo lasi
Gau idauidau idia laloa
Idia mamia dala ta be lasi gau ta idia karaia totona

Dahaka dainai unai be mai ena dika?

Pendemik ese ia havaraia hemami ese ita bona ma haida edia seifti ia hadikaia diba. Bema ita naria namonamo lasi, metairametaira COVID amo sibona ita gimaia karana do ita badinaia lasi. Nega ia hanaia lalonai, unai virus ena dika do ita laloa maragi, ena be unai virus be ma haida dekenai ia hanaia bona hamasedia noho. Bema taravatu badinaia karana dekenai ita hesiku, iseda ura sibona do ita badinaia, unai ese ita bona ma haida dekenai dika do ia havaraia.

Inai bamona lalohekwarahi negadiai, momo dekenai inai Baibel ena hereva be ia momokani, ia gwau: “Bema hekwakwanai negadia ai oi lalomanoka, emu goada do ia ore.” (Aonega Herevadia 24:10) Baibel ena hakaua hereva ese ita ia durua diba lalomanoka bona pendemik ita haheaukalaia totona.

Dahaka Baibel ena hakaua herevadia ese oi do ia durua unai oi hanaia totona?

Taunimanima kahirakahira oi noho lasi, to idia oi hereva henia diba

Baibel ena hereva: “Tura korikori be . . . hekwakwanai negadia ai . . . oi ia durua.”—Aonega Herevadia 17:17.

Dahaka dainai unai be gau badana: Tura korikoridia ese ita idia hagoadaia. (1 Tesalonika 5:11) To nega daudau ita sibona ita noho karana ese iseda helt ia hadikaia diba.—Aonega Herevadia 18:1.

Inai oi tohoa: Vidio bona fon amo emu turadia oi hereva henia, bona email bona teks mesiji oi siaia danu. Bema emu dina oi moalelaia lasi, emu turadia ida unai oi herevalaia diba bona idia oi sekea danu. Idia oi hamaoroa diba dahaka ese oi ia durua pendemik oi haheaukalaia totona. Dala oi tahua emu turana totona gau namona ta oi karaia, unai amo oi bona emu turana do umui moale.

Haida idia gwau

“Palani lau karaia vidio konferens amo turadia ida lau hereva totona. Nega haida, lau bona ma ta sibona. Bona nega ma ta ai, grup ta ida ai gadara hebou o ai herevahereva sibona. Ena be gabu tamona ai noho lasi, to unai be mai ena heduru bada. Pendemik dainai mauri be auka, to iseda turadia ita hereva henia be gau badana bona mai momokani ida iseda hemami ita gwauraia. Ena be mai ena hekwarahi, to ita ibounai be heduru ita abia be namo.”—Megan, Canada.

“Iseda famili bona turadia ita reaia, to dala ia noho idia dekenai iseda lalokau ita hahedinaraia totona. Famili ida kadi mai ena hagoadaia Baibel siridia bona harihari gaudia maragidia ai hegaegaelaia emai turadia totona, bona ai hamaorodia idia ai laloa noho. Unai ese ai ia hamoalea bada! Nega ai atoa ma haida ai durua karana ese ai ia durua emai hekwakwanai ai laloa momo lasi.”—Emma bona ena adavana Nathan, bona edia natudia, Eli bona Hope, United States.

Emu noho dala matamatana oi moalelaia

Baibel ena hereva: “Emui nega do umui gaukaralaia namonamo.”—Efeso 5:16.

Dahaka dainai unai be gau badana: Emu nega oi gaukaralaia namonamo neganai, lalohadai maorona oi abia bona oi laloa momo lasi.—Luka 12:25.

Inai oi tohoa: Oi karaia diba lasi gaudia oi laloa lasi, to unai nega ai do oi karaia diba gau namodia oi laloa. Hegeregere, projek eiava emu ura gauna ta oi karaia diba, a? Emu famili totona nega oi atoa diba, a?

Haida idia gwau

“Emai ruma ai projek idauidau hegeregere, uma gabu ai karaia, art projek, bona ruma ena herahera gaudia ai karaia.”—Evan bona ena adavana, Samantha, bona edia natudia, Eli bona Adam, South Africa.

“Lau bona egu adavana totona nega bada ia noho ai hebamo totona. Lagani 30 lalonai unai bamona ai karaia lasi. Unai ese emai lalokau ta ta totona ia habadaia, emai manoka bona goada gaudia ai lalopararalaia. Hari ai hegeregere vaira negai idia vara hekwakwanai ai haheaukalaia hebou totona.”—Ivan bona ena adavana, Eve, Italy.

Sediual badinaia

Baibel ena hereva: “Namona be gau ibounai . . . dala maorona ai umui karaia.”—1 Korinto 14:40.

Dahaka dainai unai be gau badana: Momo be sediual idia badinaia neganai idia moale.

Inai oi tohoa: Hari emu mauri dala matamatana hegeregerena, sediual oi karaia. Nega oi atoa Sikuli, moni gaukara, ruma gaukara bona tomadiho totona. Emu helt oi durua totona gau haida oi karaia diba hegeregere, famili ida oi noho, gabu ma ta dekenai oi lao, bona oi eksasais. Nega ta ta ai emu sediual oi sekea lou, bona gau haida oi haidaua.

Haida idia gwau

“Pendemik ia do vara lasi neganai, lau karaia vadaeni sediual lau badinaia noho. Guna lau karaia gaudia lau haidaua bona eksasais lau karaia, to daba ai lau toreisi ena nega lau haidaua lasi. Unai sediual ese lau ia durua pendemik lau laloa momo lasi bona egu famili bona turadia lau durua diba.”—Kgaogelo, South Africa.

“Ena be gabu ta do lau lao lasi, to daba ai, nega momo lau ura egu aniani bona kofi lau karaia. Lau hegaegae egu dabua lau atoa. Unai dainai egu hemami ia namo bona lau hesiku lasi.”—Carmel, France.

Sisen ta ta hegeregerena emu noho dalana oi haidaua

Baibel ena hereva: “Aonega tauna ese dika ia itaia bona ia raka siri.”—Aonega Herevadia 22:3.

Dahaka dainai unai be gau badana: Oi noho gabuna hegeregerena, sisen ia idau neganai, reana lai namona bona dina siahu do oi mamia lasi. Tauanina bona hemami dalanai, unai gaudia be mai anina bada.

Inai oi tohoa: Bema keru negana ia kahirakahira, emu gaukara gabuna eiava noho daiutuna oi haidaua, unai amo dina ena siahu oi abia diba. Ena be keru negana, to palani oi karaia murimuri ai gau haida oi karaia totona. Bema hegeregere, keru dabua oi abia, murimuri ai oi noho diba.

Bema siahu negana be kahirakahira, taunimanima momo be murimuri ai do idia noho dainai oi naria namonamo. Palani oi karaia edeseni do oi lao, bona hutuma idia noho lasi negana oi abia hidi.

Haida idia gwau

“Lau be medu momo gabuna dekenai lau noho dainai, egu sediual dekenai gau haida lau haidaua diba. Dina ia hedinarai neganai, maoromaoro murimuri dekenai lau lao. Ena be nega kwadogi sibona lau raka o basikele amo lau loaloa, to dina ena siahu dainai egu hemami ia hanamoa.”—Sameena, France.

“Siahu negana be namo badina nega momo murimuri ai gaukara momo lau karaia diba, to keru negana be kahirakahira dainai ruma lalonai do lau karaia gaudia edia lista lau karaia.”—Tiffany, Canada.

COVID amo sibona gimaia karana ita badinaia noho

Baibel ena hereva: “Kavakava tauna be ia laloa namonamo lasi bona ia hekokoroku.”—Aonega Herevadia 14:16.

Dahaka dainai unai be gau badana: COVID-19 ese mase ia havaraia diba, bema ita naria namonamo lasi, COVID-19 ita abia diba.

Inai oi tohoa: Hanaihanai emu gabu ena COVID hakaua herevadia oi sekea, bema oi naria namonamo eiava lasi. Emu kara ese oi, emu ruma bese bona ma haida do ia hadikaia dalana oi laloa.

Haida idia gwau

“Virus ia bada lasi totona gau haida lau karaia noho. Ena be ma haida ese taravatu idia badinaia lasi, to lau bona egu famili durua gaudia lau laloa. Unai amo gorere ai abia lasi.”—Daryn, South Africa.

Dirava ida emu hetura karana oi hagoadaia

Baibel ena hereva: “Dirava kahirakahira umui lao, bona ia be umui kahirakahira do ia mai.”—Iamesi 4:8.

Dahaka dainai unai be gau badana: Dirava ese oi ia durua hekwakwanai idauidau oi haheaukalaia totona.—Isaia 41:13.

Inai oi tohoa: Dina ta ta ai, Dirava ena Hereva, Baibel, ena kahana ta oi duahia. Unai oi matamaia totona, Baibel Duahiduahi Sediual ese oi ia durua diba.

Namo oi abia totona Iehova ena Witnes taudia oi hereva henia, COVID-19 pendemik lalonai idia karaia hebou dalana oi dibaia. Hegeregere, tanobada ibounai dekenai, vidio konferens amo kongrigeisen hebou, Iesu ena mase laloatao hebouna, bona hebouhebou idia karaia.

Oi ia durua diba Baibel siridia

Isaia 30:15: “Umui manau bona lau umui abidadama henia, do umui goada.”

Anina be: Dirava ena sisiba ita abidadama henia karana ese ita ia durua metau negadiai ita lalohekwarahi lasi totona.

Aonega Herevadia 15:15: “Ia hisihisi noho tauna ena mauri dinadia ibounai be dika, to kudouna ai ia moale tauna be dina ta ta ai mai moale ida ia noho.”

Anina be: Hagoadaia gaudia sibona ita laloa karana ese ita ia durua ita moale totona, ena be nega aukadia ita davaria.

Aonega Herevadia 14:15: “Diba bada lasi tauna ese hereva ibounai ia abia dae, to aonega tauna be do ia karaia gaudia ia laloa namonamo guna.”

Anina be: Helt ena hakaua herevadia oi badinaia, bona namona be unai taravatu edia namo oi laloa bada.

Isaia 33:24: “Unai tano tauna ta do ia gwau lasi: ‘Lau gorere.’”