Helt Ena Dagi Bada Tauna Ia Gwau Social Media ese Matamata Taudia Dekenai Dika Ia Havaraia Diba—Baibel be Dahaka Ia gwau?

May 23, 2023 ai, United States helt ena dagi bada tauna ese pablik ia hadibaia, social media be matamata taudia momo dekenai dika ia havaraia noho.

• “Ena be social media ese natudia bona matamata taudia dekenai heduru ia henia, to gau haida ese ia hahedinaraia social media be natudia bona matamata taudia edia lalohadai bona tauanina dekenai dika ia havaraia.”​—Social Media and Youth Mental Health: The U.S. Surgeon General’s Advisory, 2023.

Unai tahua gaukarana ese ia hahedinaraia unai ita laloa be gau badana.

• Bema mauri lagani 12 ia lao 15 matamata taudia be “dina ta ta ai hora toi mai kahana social media idia gaukaralaia, idia be mentol helt gorerena idia abia diba, danu idia dekenai lalometau bona lalohekwarahi do idia havaraia.”

• Mauri lagani 14 natudia be “social media idia gaukaralaia momo neganai, edia mahuta ia hadikaia, buli karana ia vara, idia mamia edia toana be namo lasi, idia be anina lasi, bona idia lalometau. Unai be nega momo kekeni taudia dekenai ia vara, to memero be haida sibona.”

Edena dala ai tama sina ese edia natudia be unai dika amo idia gimaia diba? Baibel ese sisiba namona ia henia.

Tama sina ese idia karaia diba gauna

Umui durua dalana. Tama sina e, social media ena dika umui laloa guna bena natudia ese idia gaukaralaia diba eiava lasi umui lalohadailaia.

• Baibel ena hakaua hereva: “Natuna maragina dekenai dala maorona oi hadibaia, ia buruka neganai unai dala do ia rakatania lasi.”​—Aonega Herevadia 22:6, futnout.

• Diba ma haida totona inai atikol “Should My Child Use Social Media?” oi duahia.

Bema oi laloa emu natuna be social media ia gaukaralaia diba, ia dekenai do ia vara dika oi diba be namo, bona onlain ai ia karaia gaudia oi sekea. Edena dala ai?

Emu natuna oi gimaia. Emu natuna oi hadibaia onlain ai ia do idia hadikaia diba dika idauidau ia lalopararalaia bona dadaraia totona.

• Baibel ena hakaua hereva: “Namona be matabodaga karadia, kara miro idauidau bona mataganigani karadia be umui huanai umui herevalaia lasi, . . . hemarai karadia eiava hereva kavakavadia eiava hevaseha mirodia umui herevalaia lasi.”​—Efeso 5:3, 4.

• Heduru haida totona, inai atikol duahia “Teaching Your Teenager Social Media Safety.”

Taravatu atoa. Hegeregere, edena negai bona do ia gaukaralaia ena daudau totona taravatu umui atoa.

• Baibel ena hakaua hereva: “Emui raka dalana do umui naria namonamo, . . . aonega taudia bamona do umui raka. Emui nega do umui gaukaralaia namonamo.”​—Efeso 5:15, 16.

• Inai katun vidio oi gaukaralaia Mai Aonega ida Intanet Gaukaralaia emu natuna oi durua taravatu oi atoa ena badina ia lalopararalaia totona.