Hahine Edia Seifti—Baibel Ena Lalohadai

“Lau maragi neganai, dina ta ta ai egu kakana mero ese lau ia dadabaia bona hereva dika henia. Lau headava murinai, egu ravana tau bona hahine ese lau ia hahisia bona hesiai hahine bamona lau idia kara henia. Unai dainai sibona hamasea lalohadaina lau abia.”—Madhu,a India.

World Health Organization ese ia hamomokania, “hahine dagedage henia karadia be tanobada ibounai ai ia vara noho.” WHO ena ripoti ese ia hahedinaraia kahirakahira hahine toi amo ta be ena mauri dekenai dagedage ia davaria o idia reipia.

Bema oi dekenai unai ia vara, oi lao gabudia ai, reana gari hemamina oi abia badina oi laloa haida be edia hereva amo oi do idia hadikaia o do idia dagedage henia eiava reipia. Unai bamona dagedage bona kara gageva dainai reana oi laloa taunimanima momo dekenai ‘hahine be anina lasi.’ To Dirava ese hahine taudia be edena bamona ia laloa?

Dirava ena lalohadai hahine taudia dekenai be dahaka?

Baibel Siri: “Tau bona hahine [Dirava ese] ia karaia.” —Genese 1:27.

Siri Ena Anina: Dirava ese tau bona hahine ia karaia. Dirava dekenai tau bona hahine matauraia karana be mai anina bada. Danu, ia ura headava tau ese ena ‘hahine do ia lalokau henia, sibona ia lalokau henia hegeregerena.’ Namo lasi hahine ia hereva auka henia o dagedage dalanai ia biagua. (Efeso 5:33; Kolose 3:19) Unai amo ia hedinarai, Dirava dekenai hahine edia seifti be gau badana.

“Lau maragi neganai, egu varavara ese lau ia reipia. Egu mauri lagani be 17 neganai, egu bosi ese lau ia hagaria, ia gwau bema ia ida lau mahuta hebou lasi, gaukara amo lau do ia hadokoa. Lau bada neganai, egu adavana, tama sina bona neiba taudia ese lau idia laloa maragi. To Iehova,b Havaraia Tauna lau dibaia. Ia ese hahine ia matauraia. Unai amo lau diba, Dirava ese lau ia lalokau henia bona ena matanai lau be mai anina bada.” —Maria, Argentina.

Dahaka ese oi ia durua diba?

Baibel Siri: “Tura haida be tadikaka korikori bamona ta ta idia kara henia.”—Aonega Herevadia 18:24.

Siri Ena Anina: Tura korikori be oi do ia durua. Bema oi mamia ia oi trast henia, ia dekenai emu hemami korikorina oi gwauraia.

“Lagani 20 lalonai ta lau hadibaia lasi, guna ta ese lau ia reipia. Unai dainai, lau tubu daekau neganai lau moale lasi, lau lalohekwarahi bona lalometau. To unai sivarai be ta dekenai lau gwauraia neganai, ia kamonai namonamo bona unai ese egu hemami ia hanamoa momokani.”—Elif, Türkiye.

Baibel Siri: “Emui lalohekwarahi ibounai be [Dirava] dekenai umui negea lao, badina ia be umui ia laloa bada.”—1 Petero 5:7.

Siri Ena Anina: Oi guriguri neganai, Dirava be emu guriguri ia kamonai. (Salamo 55:22; 65:2) Oi ia laloa bada dainai, oi do ia durua unai amo do oi diba oi be mai anina bada.

“Iehova dibaia karana ese lau ia durua lau mamia lalohisihisi lau hanaia totona. Hari guriguri amo Dirava dekenai egu hemami lau gwauraia hedinarai diba. Lau mamia gaudia ibounai ia lalopararalaia ia be turana ta bamona.”—Ana, Belize.

Hahine hahisia karadia be Dirava ese do ia haorea, a?

Baibel Siri: ‘Iehova ese tamana lasi natudia bona idia hisihisi taudia totona kota maoromaoro do ia karaia, unai amo tanobada taudia ese idia do idia hagaria lou lasi.’ —Salamo 10:​17, 18.

Siri Ena Anina: Kahirakahira Dirava ese kara gageva idauidau ibounai, hahine hahisia bona dagedage henia karadia danu do ia haorea.

“Lau diba Iehova ese kahirakahira hahine bona kekeni kara namo henia lasi karadia do ia haorea. Unai be hegeregere egu hemami ia hanamoa muramura namona ta bamona. Unai ese lau dekenai lalomaino ia henia.” —Roberta, Mexico.

Baibel ese helaro ia henia dalana, ena gwauhamata oi trast henia ena badina bona Iehova ena Witnes taudia ese Baibel amo heduru idia henia dalana oi dibaia totona, ta ese oi ia vadivadi henia totona oi noinoi diba, bona unai be davana lasi.

Inai atikol oi printaia totona oi daonloud diba.