Lagani 2023: Lalohekwarahi Laganina​—Baibel be Dahaka Ia Gwau?

Lagani 2023 lalonai, idia vara gaudia ese idia hamomokania ita be Baibel ese ia gwauraia “dina gabedia ai” ita noho. (2 Timoteo 3:1) Mani oi laloa hari idia vara noho gaudia be Baibel ena peroveta herevadia ida ia hegeregere.

Baibel bona tanobada ai idia vara gaudia

“Tuari sivaraidia do umui kamonai.”​—Mataio 24:6.

• “Tanobada ena kahana momo ai tuari badadia idia vara noho.”a

“Gabu momo ai tano mareremarere.”​—Mareko 13:8.

• “Lagani 2023 ia matamaia negana amo, tanobada ibounai ai tano mareremarere 13 be magnitude 7 ia hanaia, idia rekodia negana amo, unai be bada herea.”b

“Gari do idia havaraia gaudia.”​—Luka 21:11.

• “Guna tanobada be ia siahu bada: hari tanobada be ia boila bamona.”​—António Guterres, UN secretary-general.c

“Hitolo bada.”​—Mataio 24:7.

• “Lagani 2023: Famili ubua totona idia hekwarahi taudia dekenai dika bada ia havaraia.”d

“Nega aukadia do idia vara, unai ese taunimanima do idia hametaua bada.”​—2 Timoteo 3:1.

• “Tanobada ibounai ai taunimanima 8 amo tamona be mentol helt gorerena ia abia.”e

Lagani 2024 ai dahaka do ia vara?

Ta ia diba lasi lagani 2024 ai dahaka do ia vara. To tanobada ai idia vara gaudia ese idia hahedinaraia daudau lasi Dirava ena Basileia, eiava guba gavamani ese taunimanima edia gavamani edia gabu do ia abia bona hisihisi bona lalohekwarahi idia havaraia gaudia ibounai do ia haorea.​—Daniela 2:44; Apokalupo 21:4.

Unai ita naria noho lalonai, bema ita lalohekwarahi, Dirava dekenai heduru ita noia diba. Baibel ia gwau:

“Lau gari neganai, lau ese oi lau abidadama henia.”​—Salamo 56:3.

Edena dala ai ita hahedinaraia diba Dirava ita trast henia? Oi ai invait Baibel ese ia gwauhamatalaia hisihisi lasi vaira nega oi dibaia totona. Davana lasi Baibel kosi oi tohoa, unai amo do oi itaia edena dala ai oi bona emu famili be Baibel ena gwauhamata ese umui ia durua diba.