Niuklia Tuarina Dekenai Baibel Ena Hereva be Dahaka?

Tanobada ena gavamani ese edia niuklia tuari kohu matamatadia idia karaia bona ena siahu idia habadaia noho dainai, iseda tanobada be dika lalonai ia noho. Unai dainai taunimanima idia laloa unai gaudia momo ese niuklia tuarina do ia hamatamaia. Danu taunimanima idia laloa momo badina bema tano ta ese niuklia bomu maragina ta ia gaukaralaia, tanobada ibounai dekenai dika bada do ia havaraia. Bulletin of the Atomic Scientists ia gwau, ita be “hari niuklia tuari ia vara diba” negana ai ita noho.

Oi laloa niuklia tuari do ia vara, a? Bema oibe, tanobada do ia hadikaia lasi, a? Bona edena dala ai unai ena lalohekwarahi karana ita hanaia diba? Baibel be dahaka ia gwau?

Inai atikol lalonai

Baibel ese niuklia tuari ia perovetalaia, a?

Baibel ese niuklia tuari ia herevalaia lasi. To taunimanima edia lalohadai bona hari idia vara noho gaudia ia perovetalaia, unai ese niuklia tuari ia havaraia diba.

Inai Baibel ena siri haida be hari tanobada ai idia vara noho gaudia ida oi hahegeregerea:

Baibel siri: Iesu ena hahediba taudia be ia dekenai idia henanadai: “Do oi noho negana bona inai nega oromana ena dokona ena toana be dahaka?” Iesu ia haere: “Bese ta do ia toreisi bese ta do ia tuari henia, bona basileia ta ese basileia ta do ia tuari henia.”—Mataio 24:3, 7.

Idia vara noho gaudia: Niuklia tuari kohu idia karaia tanodia be nega momo idia tuari.

“Idia hanaia laganidia ai, tanobada ai dagedage karadia be idia bada idia lao: tuari ena namba ia bada daekau danu.”—The Armed Conflict Location & Event Data Project.

Baibel siri: “Nega dokona ai saut kahana ena king be [not kahana ena king] ida do ia doria lao mai.”—Daniela 11:40.

Idia vara noho gaudia: Idia tuari heheni besedia bona edia durua besedia be ma bese ma haida ida idia doria lao mai. Ena be reana hari niuklia tuari kohu badadia idia noho tanodia ese tano ma ta idia tuari henia lasi, to unai tuari kohudia edia siahu idia habadaia noho.

“Idia hanaia vadaeni lagani 10 lalonai, ita itaia bese ta ta huanai tuari idia vara, siahu bada tanodia danu be nega haida unai tuari idia durua.”—The Uppsala Conflict Data Program.

Baibel siri: “Dina gabedia ai nega aukadia do idia vara, unai ese taunimanima do idia hametaua bada. Badina taunimanima be . . . do idia lalotamona lasi, ladana do idia hadikaia, sibona do idia biagua lasi, do idia dagedage.”—2 Timoteo 3:1-3.

Idia vara noho gaudia: Hari inai negai taunimanima momo, bona tanobada ena gunalaia taudia danu idia lalotamona lasi. Bona idia lalotamona lasi gaudia be maino dalana ai idia hamaoromaoroa lasi, to niuklia kohudia amo ta ta idia hagaria.

“Lalotamona ai idia gaukara hebou dalana idia tahua lasi neganai, tuari momo do idia vara.”—S. Saran and J. Harman, World Economic Forum.

Dirava ese niuklia tuari do ia koua lasi, a?

Baibel ese unai ia gwauraia lasi. To ia gwau, “gari do idia havaraia gaudia” be iseda nega ai do idia vara. (Luka 21:11) Hegeregere, Tanobada Tuarina Iharuana ai atom bomu idia gaukaralaia. Dirava ese tuari ia koua lasi ena badina be Baibel ese ia herevalaia. Diba ma haida abia totona, inai vidio ladana, Dahaka Dainai Dirava ese Hisihisi Ia Koua Lasi? oi itaia.

Tanobada be niuklia tuari ese do ia hadikaia, a?

Lasi. Ena be niuklia tuari kohu do idia gaukaralaia, to unai ese tanobada ibounai do ia hadikaia lasi, badina Dirava ese kara ta do ia karaia unai ia koua totona. Baibel ia gwau, iseda tanobada do idia hadikaia ore lasi, bona unai sibona lasi taunimanima be tanobada ai do idia mauri hanaihanai.

“Tanobada be ia noho hanaihanai.”—Hadibaia Tauna 1:4.

“Dirava . . . tanobada ia karaia . . . Diravana, Ia karaia kava lasi, to taunimanima ese idia noholaia totona ia karaia.”—Isaia 45:18.

Haida idia laloa, vaira nega ai taunimanima haida sibona be niuklia tuari ese ia hadikaia gabudia dekenai do idia noho. To Baibel ese ia hahedinaraia tuari ese tanobada ai idia havaraia dika be do ia hanamoa lou.

“Taunimanima lasi gabuna bona ranu lasi tanona do idia moale, bona tano kaukau palakana do ia moale bona flaoaflaoa amo do ia honu.”—Isaia 35:1.

Tanobada paradaiso dekenai taunimanima idia gaukara bona idia moale hebou. — Dirava ia ura tanobada hairaina ai mai moale ida ita noho

Iseda Havaraia Tauna ese tanobada be sibona do ia hanamoa dalana ai ia karaia. Danu ita diba Dirava ese ena siahu do ia gaukaralaia tanobada ia hanamoa totona; taunimanima be tanobada ai do idia noho hanaihanai.—Salamo 37:11, 29; Apokalupo 21:5.

Edena dala ai unai ena lalohekwarahi oi hanaia diba?

Taunimanima haida be niuklia tuari bona unai ese do ia havaraia dika dainai idia lalohekwarahi. Baibel ai idia noho gwauhamata bona sisiba ese idia ia durua diba edia lalohekwarahi bona gari karana idia hamaragia totona. Edena dala ai?

Baibel ese tanobada bona taunimanima totona helaro namona ia herevalaia. Unai helaro dibaia karana be “iseda mauri ena dogo bamona,” iseda lalohekwarahi ia hamaragia. (Heberu 6:19) Danu dina ta ta ai ita karaia gaudia sibona ita laloa, to namo lasi vaira nega ai do idia vara dika ita laloa. Iesu ia gwau, “hari dina sibona ena lalohekwarahi gaudia umui laloa.”—Mataio 6:34.

Iseda hemami bona lalohadai ita naria namonamo be gau badana. Lalohekwarahi ia havaraia gaudia hegeregere, niuklia ena sivarai ita duahia, itaia bona kamonai momo lasi. Ita diba unai bamona gaudia idia vara noho. To unai ita biaguna diba lasi dainai, ita karaia noho gaudia ese ita ia durua, unai amo ita lalohekwarahi momo lasi bona reana unai gaudia do idia vara lasi.

“Lalohekwarahi ese ta ena lalona ia hametaua, to hereva namona ese ta ena lalona ia hamoalea.”—Aonega Herevadia 12:25.

Nega oi atoa emu mauri ai idia vara gau namodia oi lalohadailaia totona.

“Namona be helaro ia henia Diravana ese emui abidadama dainai, umui be moale bona maino bada amo ia hahonua.”—Roma 15:13.

Laulau: Tau ta be mai gari lasi ida vaira kahana ia itaia. 1. Iena murinai dekenai be tuari ia vara noho, tuari peleini, niuklia bomu, bona kwalahu be mushroom ta bamona. 2. Iena vaira kahana ai, maino tanobada goevana mai ena ororo, koura ai rei namodia, sinavai ia aru, bona manu idauidau. — Baibel ese ita abidadama henia diba vaira nega namona ena helaro ia herevalaia

Dirava ena gwauhamata oi dibaia noho karana ese oi dekenai helaro, moale bona lalomaino ia henia diba.

Baibel ese niuklia Aramagedono ia perovetalaia, a?

Haida dekenai Aramagedono be niuklia tuarina. Unai dainai idia be niuklia tuari ese ia havaraia dika idia lalohadailaia.

To Baibel ese inai hereva “Aramagedono” ia gaukaralaia “tanobada ibounai edia king taudia” eiava taunimanima edia gavamani bona Dirava huanai do ia vara tuarina ia herevalaia totona.a (Apokalupo 16:14, 16) Aramagedono be tanobada bona taunimanima dekenai dika do ia havaraia kava lasi, to taunimanima ese idia karaia niuklia bomu ese dika bada ia havaraia. Aramagedono ai, Dirava ese kara dika taudia sibona do ia hadikaia, unai amo maino korikori bona noho namo do ia havaraia diba.—Salamo 37:9, 10; Isaia 32:17, 18; Mataio 6:10.

Baibel ese edena dala ai tuari do ia ore dalana ia herevalaia?

“Ia ese tanobada ibounai lalonai tuari ia haorea. Ia ese peva ia hamakohia bona io ia hakwaidua, ia ese tuari kariota be lahi dekenai ia gabudia.”—Salamo 46:9.

Iehovab Dirava ese ena siahu do ia gaukaralaia, bese ta ta edia tuari karana do ia hadokoa bona tuari kohudia do ia hadikaia ore. Ia ese ena Basileia, guba gavamanina amo unai do ia karaia. Unai guba gavamani ese tanobada ibounai do ia lohiaia.—Daniela 2:44.

Dirava ena Basileia ese taunimanima dekenai maino bona lalotamona ai noho dalana do ia hadibaia. Gavamani tamona sibona ese tanobada ibounai ia lohiaia dainai, gavamani idauidau huanai idia noho lalotamona lasi karana do ia ore; taunimanima be tuari dalana do idia dibaia lou lasi! (Mika 4:1-3) Dahaka do ia vara? “Taunimanima ibounai be maino ai edia vain bona fig au huanai do idia noho, bona tau ta ese idia do ia hagaria lasi.”—Mika 4:4, Today’s English Version.

a Inai atikol itaia “Aramagedono Ena Tuari be Dahaka?”

b Iehova be Dirava ena ladana korikorina. (Salamo 83:18) Inai atikol itaia “Iehova be Daika?”

Baibel ai Apokalupo bukana ese niuklia tuari ia herevalaia, a?

Haida idia laloa Apokalupo bukana be niuklia tuari ese do ia havaraia dika ia herevalaia. (Apokalupo 6:14; 8:7-12; 16:1-21) Hegeregere ia gwau, “lahi be guba amo tanobada dekenai ia hadihoa.” (Apokalupo 13:11-13) Iehova ena Witnes taudia idia laloparara, unai siri ese niuklia tuari ia herevalaia lasi, to Tanobada Tuarina Iharuana ai atom bomu idia gaukaralaia karana ia herevalaia.

Ena be Apokalupo bukana ese unai bamona niuklia tuari ia herevalaia, to unai buka ese ia herevalaia gaudia be ita hagaria totona lasi. Apokalupo bukana oi duahia neganai, inai oi laloatao:

Unai buka ese ia herevalaia gaudia momo be toa, o laulau herevadia sibona.—Apokalupo 1:1.
Unai buka be duahia tauna hagaria totona idia torea lasi. To ena hereva idia lalopararalaia bona badinaia taudia dekenai moale ia henia.—Apokalupo 1:3.

Diba ma haida abia totona inai atikol itaia, “The Book of Revelation—What Does It Mean?”