Politikol Heiriheiri Karadia ese Baibel Ena Peroveta Herevadia Ia Hagugurua

Hari inai negai, politikol karadia dekenai taunimanima edia lalohadai be idauidau. Idia ura lasi edia mauri ia herevalaia taravatu idia badinaia bona unai idia hepapahuahulaia. Gavamani siahu taudia huanai taravatu karaia taudia bona gavamani taudia be nega momo idia lalotamona lasi. Unai bamona karadia ese politikol heiriheiri ia havaraia bona unai ese gavamani ena gaukara ia hadikaia diba.

To United States bona Britain (nega momo idia gwauraia United Kingdom) ai idia vara heiriheiri karana ita laloa be namo. Dahaka dainai? Badina Baibel ia peroveta unai bese rua lalonai heiriheiri do ia noho—Unai gaudia idia vara negana ai, Dirava ese guba ai ia haginia gavamanina ese tanobada ai gau ibounai do ia haidaua.

“Dina dokodia ai” idia vara politikol heiriheiri

Baibel ese peroveta hereva ta ia gwauraia, unai be Daniela bukana ai ia noho. Unai peroveta herevana amo Dirava ese “dina dokona ai idia vara gaudia” ia hahedinaraia. Unai nega ai Daniela ese unai hereva ia torea, to unai be vaira nega ai do idia vara senisi badana ia hahedinaraia.​—Daniela 2:28.

Unai peroveta hereva be Dirava ese Babulonia ena king dekenai ia henia nihi amo ia hahedinaraia. Unai nihi ai king ese auri idauidau amo idia karaia kaivakuku badana ta ia itaia. Gabeai peroveta tauna Daniela ese unai kaivakuku ena kahana ta ta ia herevalaia, unai kahana ta ta be tanobada ena basileia badadia ia laulaulaia.a To gabeai unai kaivakuku be nadi ta, Dirava ese ia haginia Basileia eiava Gavamani ia laulaulaia, ese ia botaia bona hadikaia ore.​—Daniela 2:36-45.

Unai peroveta herevana hegeregerena, Dirava ena Basileia ese tanobada gavamani ibounai do ia kokia. Iesu ese ena hahediba taudia ia hadibaia unai Basileia totona do idia guriguri. Iesu ia gwau: “Oiemu Basileia ia mai be namo.”​—Mataio 6:10.

To edena dala ai unai peroveta herevana ese ia hahedinaraia politikol heiriheiri do ia vara? Laloatao, unai kaivakuku “ena aena palapala be auri bona raro.” (Daniela 2:33) Unai be ia idau kaivakuku ena kahana ma haida amo, badina idia be auri goadadia sibona. Unai ese ia hahedinaraia basileia goadana ta be basileia goadadia ma haida amo do ia idau. Edena dala ai? Daniela ese unai peroveta herevana ia gwauraia hedinarai, ia gwau:

Unai peroveta herevana hegeregerena, aena palapalana ese ia laulaulaia tanobada basileia goadana lalonai politikol heiriheiri do ia vara. Taunimanima ese idia karaia karadia dainai unai basileia ena goada do ia ore.

Daniela ena peroveta hereva be hari ia guguru

Unai aena palapalana be United States bona Britain edia gaukara hebou karana ia laulaulaia. Hari idia vara gaudia ese edena dala ai unai ia hamomokania?

Kaivakuku ena aena palapalana be “auri bona raro” amo idia karaia, unai dainai ia goada lasi. (Daniela 2:42) Hari inai nega ai, United States bona Britain ai idia noho taudia be idia parara dainai unai basileia rua be goada lasi. Hegeregere, United States bona Britain lalonai taunimanima idia heiriheiri. Taunimanima be edia maoro totona idia protest. Gavamani ena memba taudia be nega momo gau haida dekenai idia lalotamona lasi. Badina idia ura gau haida idia karaia, to taunimanima be unai dekenai idia lalotamona lasi.

Daniela ena peroveta hereva haida edia anina bona hari idia guguru dalana do ita herevalaia:

Peroveta Herevana: “Basileia be do ia parara, to ena kahana haida ai auri aukadia idia noho.”​—Daniela 2:41.

Anina: Ena be United States bona Britain lalonai taunimanima idia parara, to idia be mai edia tuari orea goadadia. Unai dainai idia be mai edia siahu gau haida idia karaia totona, auri ena goada hegeregerena.

Guguru Dalana

Lagani 2023 ai, tano idauidau ese tuari totona idia gaukaralaia moni ena lista idia karaia neganai, United States bona United Kingdom ese idia gaukaralaia moni oi haboua neganai, unai ese idia murinai idia noho besedia 12 ese idia gaukaralaia moni ibounai ia hereaia.​—Stockholm International Peace Research Institute.

“UK be US ena tuari orea ida ia gaukara hebou. . . . ai be teknoloji dalanai bona gau idauidau ai karaia dala amo tano haida ai hereaia. . . . Ai gaukara hebou, ai gini hebou, bona ai tuari hebou.”​—Strategic Command, U.K. Ministry of Defence, April 2024.

Peroveta Herevana: “Aena kwakikwaki be auri bona raro, unai dainai basileia be mai ena goada bona mai ena manoka.”​—Daniela 2:42.

Anina: Ena be United States bona Britain be mai edia tuari orea goadadia, to edia gavamani ena heau dalana hegeregerena gau ibounai idia karaia diba lasi. Badina bema idia ura karaia gauna dekenai taunimanima momo idia lalotamona lasi, gau ta do idia karaia diba lasi.

Guguru Dalana

“Diba bada taudia haida idia gwau, America ena gavamani lalonai idia noho orea haida idia lalotamona lasi dainai, tano haida totona gau haida idia karaia totona be ia auka. Hegeregere, tano haida totona maino, noho namo bona bisinesi karadia dekenai ia durua totona.”​—“The Wall Street Journal.”

“Britain ai politikol ena hekwakwanai be momo, guna be unai bamona lasi. Unai dainai gavamani taudia ese taunimanima idia durua totona senisi haida idia karaia diba lasi.”​—Institute for Government.

Peroveta Herevana: “Taunimanima ida do idia [basileia] hakapua, to unai ese idia do ia hatamonaia lasi.”​—Daniela 2:43.

Anina: Taunimanima ese gavamani dekenai edia lalohadai idia gwauraia diba, to nega momo gavamani taudia be edia ura hegeregerena idia karaia lasi.

Guguru Dalana

“Hari inai negai, America taudia ese politik bona gavamani taudia idia abidadama henia lasi.”​—Pew Research Center.

“Taunimanima be gavamani taudia bona edia gavamani ena gaukara dalana idia trast lasi, lagani 50 gunanai be unai bamona lasi.”​—“National Centre for Social Research.”

Vaira nega totona Daniela ena peroveta herevana

Daniela ena peroveta herevana hegeregerena, United States bona Britain be do idia gaukara hebou bona tanobada ena basileia goadana ginigabena. Bena Dirava ena Basileia ese tanobada ibounai do ia hadikaia ore.​—Daniela 2:44.

Danu Baibel lalonai, Apokalupo bukana ai ia noho peroveta herevana ese ia hahedinaraia, “tanobada ibounai edia king taudia” be do idia haboua Iehovab Dirava ida idia tuari totona. Unai be Aramagedono, “Siahu Ibounai Diravana ena dina badana ena tuari.” (Apokalupo 16:14, 16; 19:19-21) Unai tuari ai Iehova ese taunimanima edia gavamani ibounai do ia hadikaia ore, unai nega ai Daniela ese ia gwauraia Basileia goadadia ibounai danu do ia hadikaia ore.

Diba ma haida oi abia totona, atikol ladana “Aramagedono Ena Tuari be Dahaka?” itaia.

Daniela ese ia gwauraia peroveta herevana amo namo ita abia

Hari inai negai, United States bona Britain dekenai idia vara politikol heiriheiri karadia be Baibel ese ia perovetalaia. Bona unai gaudia oi dibaia neganai, hari idia vara noho gaudia do oi lalopararalaia.

• Iesu ia ura ena murinai idia raka taudia be tanobada ena politikol lalonai do idia vareai lasi ena badina ita lalopararalaia. (Ioane 17:16) Danu Dirava ese ia abia hidi Basileia ena lohia tauna Iesu ena hereva do oi lalopararalaia, ia gwau: “Lauegu Basileia be inai tanobada ena lasi.”​—Ioane 18:36.

• Kahirakahira Dirava ena Basileia ese tanobada ai gau ibounai do ia hamaoromaoroa bona Dirava ese taunimanima totona ia gwauhamatalaia hahenamo idauidau ibounai do ia hagugurua.​—Apokalupo 21:3, 4.

• Vaira nega ai do idia vara gaudia oi diba dainai, bese ta ta huanai ia vara heiriheiri karana ese tanobada do ia hadikaia lalohadaina do oi laloa lasi.​—Salamo 37:11, 29.

Daniela ena peroveta herevana ese ia hahedinaraia United States bona Britain, aena ena palapalana ese ia laulaulaia tanobada basileia goadana unai, be ginigabena. Unai murinai Dirava ena Basileia do ia gini, unai be guba amo do ia lohia gavamani goevadaena!

Dirava ena Basileia ese taunimanima totona do ia karaia gauna ena diba ma haida oi abia totona, vidio ladana Dirava Ena Basileia be Dahaka? itaia.