Nega Aukadia ai Moale Abia Daladia—Baibel be Dahaka Ia Gwau?

Inai nega ai, ita dekenai do idia vara gaudia ibounai ita biagua diba lasi. Nega momo iseda noho dalana be do ia auka, to ita abia lalohadai maorona ese ita ia hamoalea diba. Ena be hekwakwanai ita davaria, to Baibel ia gwau, “ia moale tauna be dina ta ta ai mai moale ida ia noho.” (Aonega Herevadia 15:15) Iseda moale ita habadaia totona dahaka do ita karaia? Baibel ena sisiba ese oi ia durua diba dalana mani oi itaia.

Lalohekwarahi hanaia totona

Baibel ia gwau: “Lalohekwarahi ese ta ena lalona ia hametaua, to hereva namona ese ta ena lalona ia hamoalea.”​—Aonega Herevadia 12:25.

• Baibel ese oi ia durua diba lalohekwarahi oi hamaragia totona. Unai karaia dalana oi diba totona, inai atikol duahia, “What the Bible Says About Anxiety.”

Sibona noho ena hemami hanaia totona

Baibel ia gwau: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.”​—Aonega Herevadia 17:17.

• Baibel lalonai idia noho sisiba namodia ese oi ia durua diba sibona noho ena hemami oi hanaia bona ma haida tura henia karana oi hagoadaia. Inai atikol duahia, “Sibona Noho Ena Hemami Hanaia Totona Haida Oi Bamoa—Baibel ese Ia Durua Dalana.”

Dirava bona dekena tauna lalokau henia

Baibel ia gwau: “Namona be Iehova emu Dirava oi lalokau henia mai emu kudouna ibounai, mai emu mauri ibounai, bona mai emu lalona ibounai ida. . . . Namona be emu dekena tauna oi lalokau henia, oi sibona oi lalokau henia hegeregerena.”a—Mataio 22:37-39.

• Guriguri karana ese ita ia durua Dirava lalokau henia karana ita habadaia totona. Diba ma haida abia totona, inai atikol duahia, “Dirava ese Iseda Guriguri Ia Kamonai, A?”

• Ma haida dekenai lalokau ita hahedinaraia totona, namona be Iesu ese ia gwauraia taravatu hegeregerena idia ita kara henia. Diba ma haida abia totona, inai atikol duahia, “What Is the Golden Rule?”

Inai nega aukadia ai oi moale totona Baibel ese oi ia durua diba daladia ma haida oi ura itaia, a? Unai oi karaia totona oi ai invait ta ida Baibel stadi kosi oi tohoa.