Moni be Dika Ibounai Edia Badina, A?

Baibel ena haere

Lasi. Baibel ia gwau lasi moni be dika, o ia be kara dika ibounai ena badina. Momo idia gwau “moni be dika ibounai edia badina,” to unai be Baibel ena hereva hegeregerena lasi. Baibel ia gwau “moni ura henia bada karana be dika idauidau ibounai edia badina.”—1 Timoteo 6:10.

Baibel ese moni be edena bamona ia herevalaia?

Baibel ia gwau moni ita gaukaralaia namonamo neganai, ita ia durua bona “gimaia” diba. (Hadibaia Tauna 7:12) Danu, Baibel ese hariharibada karana idia hahedinaraia taudia ia hanamoa, moni dalanai heduru idia henia taudia danu.—Aonega Herevadia 11:25.

To danu, Baibel be moni laloa bada karana ia sisibalaia. Ia gwau: “Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere.” (Heberu 13:5) Anina be moni ita gaukaralaia namonamo bona taga ita tahua goadagoada lasi. To, namona be ita abia dae ita dekenai idia noho gaudia hegeregere, aniani, dabua, bona noho gabuna be hegeregere.—1 Timoteo 6:8.

**Dahaka dainai Baibel ese moni ura henia bada karana ia sisibalaia?**

Mataganigani taudia be mauri hanaihanai do idia abia lasi. (Efeso 5:5) Badina mataganigani be kaivakuku tomadiho henia karana o tomadiho koikoina. (Kolose 3:5) Badina ma ta be, mataganigani taudia be sibona edia ura hagugurua totona, nega momo hakaua hereva namodia idia badinaia lasi. Aonega Herevadia 28:20 ia gwau: “Ia ura kohu momo ia abia haraga tauna be kerere do ia davaria.” Unai ura goadana dainai, reana ma ta do ia blackmail, henaohenao, koikoi, taunimanima ia henaoa, o ala-ala diba.

Ena be moni ura henia bada karana ese ta ia doria lasi kara dikadia ia karaia totona, to dika ma haida ia havaraia diba. Baibel ia gwau: “Idia ura idia taga taudia be hedibagani do idia davaria, tarapu lalonai do idia moru, ura dikadia do idia abia bona kavakava karadia do idia karaia.”—1 Timoteo 6:9.

Baibel ena sisiba moni dekenai ese edena bamona ita ia durua diba?

Bema kara maoromaoro taravatudia ita badinaia bona iseda hetura karana Dirava ida ia goada, sibona do ita matauraia bona Dirava ena lalonamo bona heduru do ita abia. Dirava be ia idia ura hamoalea taudia dekenai ia gwauhamata: “Lau ese umui do lau negea lasi, bona umui do lau rakatania lasi.” (Heberu 13:5, 6) Danu, ia gwauhamata “abidadama tauna be hahenamo momo do ia abia.”—Aonega Herevadia 28:20.

Moni Idia Herevalaia Baibel Siridia

Hadibaia Tauna 7:12: “Moni ese oi ia gimaia.”

Anina: Moni ita gaukaralaia namonamo neganai, ita ia durua diba, badina iseda noho dalana ia hanamoa.

Luka 12:15: “Ena be tau ta ena kohu be momo, to ena kohu ese ia dekenai mauri do ia henia lasi.”

Anina: Mauri lalonai moni be mai anina bada gauna lasi, bona ita do ia hamauria lasi.

1 Timoteo 6:10: “Moni ura henia bada karana be dika idauidau ibounai edia badina, bona haida be unai idia ura henia bada dainai, abidadama idia rakatania bona hisihisi momo idia davaria.”

Anina: Moni be dika lasi. To moni idia ura henia bada taudia, be hekwakwanai momo idia davaria, hegeregere edia ruma bese ia parara bona idia gaukara momo dainai idia gorere.

Heberu 13:5: “Namona be emui mauri dalana amo umui hahedinaraia, moni umui ura henia dikadika lasi, to umui dekenai idia noho gaudia be hegeregere.”

Anina: Namo lasi taga ita tahua goadagoada, to ita abia dae ita dekenai idia noho gaudia be hegeregere.

Mataio 19:24: “Kamelo be nila matuna lalonai ia vareai be auka lasi, to taga tauna be Dirava ena Basileia lalonai ia vareai be auka.”

Anina: Iesu ese taga tauna ta ia boiria ia murinai ia raka totona. To unai tau matamata ia ura lasi badina ena kohu ia laloa bada. Unai dainai Iesu be unai sisiba ia henia. Dirava lasi to taga ia atoa guna tauna be mauri hanaihanai helarona ia haboioa diba.