ANINA BE DAHAKA?

Tama sina be edia natudia ida edia lalohadai bona hemami idia herevalaia hebou neganai, unai be hereva namonamo karana.

DAHAKA DAINAI HEREVAHEREVA KARANA BE GAU BADANA?

Natuna (teenager) ida herevahereva be ia auka ia lao diba. Reana emu natuna ia maragi neganai, gau ibounai be oi dekenai ia gwauraia hedinarai. To, hari ia bada bona oi ia hereva henia momo lasi dainai, ena lalohadai o hemami be oi diba lasi. Unai be hegeregere oi be sinavai ena right kahanai oi gini bona ia be sinavai ena left kahanai ia gini. Oibe, bema oi itaia emu natuna be oi ia hereva henia momo lasi, maoromaoro natuna ida herevahereva karana oi hamatamaia, herevana emu natuna ia bada noho.

DAHAKA OI KARAIA DIBA?

Emu natuna ia ura hereva dinadia oi badinaia. Emu natuna ida umui herevahereva be namo, herevana ia be hanuaboi momokani.

“Reana oi ura oi gwau, ‘Hari, oi ura ita herevahereva, a? To hari dina ibounai lau be oi badinai lau noho!’ Iseda natudia idia ura ita idia hereva henia neganai, ita komplein be namo lasi. Momokani, tama sina momo idia ura bada edia natudia be unai bamona idia karaia, ani?”​—Lisa.

“Ena be lau ura lau mahuta, to lau itaia hanuaboi (midnight) be nega namona egu natudia ida ai herevahereva namonamo totona.”​—Herbert.

BAIBEL ENA HAKAUA HEREVA: “Namo lasi ta be sibona ena namo ia tahua, to namona be ma ta ena namo ia tahua.”​—1 Korinto 10:24.

Lalona veria gaudia oi dadaraia. Tama ta ia gwau: “Nega haida egu natudia idia hereva noho lalonai, lau be gau idaudia lau laloa. To idia lau koia diba lasi​—unai idia itaia diba.”

Bema TV o mobael fon ese emu lalona idia veria o emu kamonai karana idia hadikaia, oi koua be namo. Emu natuna ena hereva oi kamonai namonamo, bona oi hahedinaraia oi be iena lalohadai oi laloa bada, herevana ia gwauraia gauna be mai anina bada eiava.

“Namona be iseda natudia ita hamaoroa edia lalohadai be mai anina bada ita dekenai. Bema unai ita gwauraia hedinarai lasi, edia lalohadai be ita dekenai do idia gwauraia lasi o ma haida dekenai heduru do idia tahua.”​—Maranda.

“Oi badu haraga lasi, herevana emu natuna ena lalohadai be kerere.”​—Anthony.

BAIBEL ENA HAKAUA HEREVA: “Emui kamonai karana do umui naria namonamo.”​—Luka 8:18.

Nega idauidau ai herevahereva. Nega haida, natudia ese edia lalohadai idia herevalaia neganai, edia tama bona sina edia vairana idia itaia lasi.

“Motuka dekenai ai heau lalonai, emai nega ai gaukaralaia namonamo. Emai saidi dekenai idia helai dainai, ai herevahereva namonamo.”​—Nicole.

Aniani negadiai be nega namodia iseda natudia ida ita herevahereva totona.

“Adorahi o hanuaboi ena aniani negadiai, ai ta ta be unai dina ai idia vara gau dikadia o namodia ai herevalaia. Unai bamona kara ese ai ia hatamonaia bona ai diba hekwakwanai negadiai ai heduru heheni diba.”​—Robin.

BAIBEL ENA HAKAUA HEREVA: “Kamonai haraga, to . . . hereva haraga lasi.”​—Iamesi 1:19.

ANINA BE DAHAKA?

Natuna oi matahakani henia ena anina be, ia oi hakaua o hadibaia. Eiava ena anina ta be, emu natuna ena kerere ta dainai, oi sisiba henia. To nega momo, emu natuna oi hadibaia kara maorona ia badinaia totona, unai amo gabeai disisen maorodia do ia karaia.

DAHAKA DAINAI NATUDIA MATAHAKANI HENIA BE GAU BADANA?

Lagani momo gunanai, tama sina haida be edia natudia idia matahakani henia lasi, badina idia ura lasi edia natudia edia lalohadai idia hadikaia. To, aonega tama sina be taravatu maorodia idia atoa bona edia natudia idia treinia, unai taravatu idia badinaia totona.

“Namona be tama sina ese edia natudia idia hadibaia dahaka idia karaia be namo bona dahaka idia karaia lasi​—idia bada neganai, unai ese idia do ia durua. Bema tama sina ese edia natudia idia matahakani henia lasi, unai natudia be bouti ta bamona, idia diba lasi edeseni idia lao​—daudau lasi murinai, idia be dala kererena do idia badinaia, disisen kererena do idia karaia, bona dika bada do idia davaria.”​—Pamela.

DAHAKA OI KARAIA DIBA?

Hesiku lasi: Bema emu natuna be emu taravatu ia badinaia lasi, panisi ia abia be namo. To bema taravatu ia badinaia, vadaeni ia oi hanamoa o tanikiu henia.

“Ena be inai tanobada ai momo idia kamonai lasi, to nega momo egu natudia lau hanamoa o tanikiu henia badina egu hereva idia kamonai. Unai bamona hanamoa herevadia dainai, idia kerere neganai, iseda matahakani do idia abia dae.”​—Christine.

BAIBEL ENA HAKAUA HEREVA: “Tau ta ese ia hadoa gauna, unai gauna sibona do ia abia.”​—Galatia 6:7.

Laloa maoromaoro. Emu natuna oi matahakani henia neganai, ena mauri lagani, diba, bona iena kerere ese ia havaraia dika oi laloa be namo. Namona be natuna ese ia karaia kerere hegeregerena panisi oi henia​—hegeregere, bema mobael fon ia gaukaralaia kerere, vadaeni fon be ia amo oi kokia, bona oi henia lou haraga lasi. To, namo lasi gau maragidia dekenai oi badu kava, bona namo lasi gau maragidia be gau badadia ai oi halaoa.

“Lau tahua namonamo gauna be, egu natuna be ia laloa maoromaoro lasi dainai kerere ia karaia eiava mai ena ura ida kerere ia karaia. Bema ta be kerere badana ta ia karaia loulou, vadaeni matahakani ia abia be namo, to bema ta be kerere maragina ta ia karaia, vadaeni oi hadibaia sibona ia karaia karana be kerere.”​—Wendell.

BAIBEL ENA HAKAUA HEREVA: “Umui tamadia e, emui natudia do umui habadua lasi, dika idia lalohisihisi.”​—Kolose 3:21.

Lalokau hahedinaraia. Bema natuna ia itaia tama sina be ia idia lalokau henia dainai matahakani idia henia, vadaeni natuna be matahakani do ia abia dae bona badinaia.

“Emai natuna merona be ia kerere neganai, ia ai hamaoroa, ‘Oi ese gunaguna oi karaia disisen namodia ibounai be ai moalelaia. Hari, oi karaia kererena be emu ladana namona do ia hadikaia lasi bema matahakani oi abia dae, bona ai ese oi do ai durua unai bamona oi karaia totona.’ ”​—Daniel.

BAIBEL ENA HAKAUA HEREVA: “Lalokau be ia boga-auka, bona ia hebogahisi.”​—1 Korinto 13:4.

ANINA BE DAHAKA?

Oi, tama eiava sina, be taravatu haida oi haginia bona oi badinaia noho. Hegeregere, nega ibounai oi ura mai momokani ida gau ibounai oi karaia, a? Vadaeni, reana oi ura unai kara be emu natuna dekenai oi hadibaia.

Danu, oi ura emu natuna oi hadibaia ia gaukara goada, taunimanima ibounai ia kara namo henia, bona ma haida edia namo ia laloa bada​—unai kara namodia be ta ia maragi negana amo ia dibaia be namo.

BAIBEL ENA HAKAUA HEREVA: “Mero dekenai mauri dala maorona do oi hadibaia, vadaeni ia buruka neganai, unai dala do ia rakatania lasi.”​—Aonega Herevadia 22:6.b

DAHAKA DAINAI KARA NAMODIA BE GAU BADANA?

Inai teknoloji negana lalonai, kara namodia be mai anina bada. Sina ta ladana Karyn ia gwau: “Nega idauidau ai bona mobael fon idauidau ai, natudia be hebamo dikadia idia davaria diba. Reana iseda natuna be eda badinai ia helai noho to laulau dikana ta ia itaia noho!”

BAIBEL ENA HAKAUA HEREVA: “Taunimanima badadia . . . ese edia darana idia gaukaralaia karana amo, sibodia idia hadibaia, unai amo maoro bona kerere edia idau idia dibaia diba.”​—Heberu 5:14.

Ma haida ita laloa be gau badana. Anina be, gau maragidia (hegeregere “plis” bona “tanikiu”) ita gwauraia bona ita hahedinaraia haida edia namo ita laloa bada​—momo be hari unai bamona idia karaia lasi badina be reana mobael fon idia laloa bada bona taunimanima idia laloa maragi.

BAIBEL ENA HAKAUA HEREVA: “Umui ura taunimanima ese umui dekenai idia karaia hegeregerena, idia dekenai danu unai bamona do umui karaia.”​—Luka 6:31.

DAHAKA OI KARAIA DIBA?

Oi ura badinaia kara namodia oi hahedinaraia. Hegeregere ripoti ese idia hahedinaraia, natudia momo (teenagers) be sihari kava karana idia dadaraia diba bema tama o sina ese idia hadibaia sihari kava karana be kara dikana.

DALA MA HAIDA: Hari inai negai ia vara gauna ta oi laloa bena kara namodia oi herevalaia. Hegeregere, bema TV niusi ese ala-ala karana ta ia sivarailaia, reana oi gwau: “Taunimanima haida ese ma haida dekenai unai bamona badu karadia idia karaia be dika momokani. Dahaka dainai taunimanima be unai bamona kara dikadia idia karaia?”

“Bema natudia be kara maorona bona kara kererena idia diba lasi, gabeai do idia hekwarahi.”​—Brandon.

Natudia hadibaia ma haida idia laloa bada totona. Namona be natudia oi hadibaia “plis” bona “tanikiu” hereva idia gwauraia, bona idia hahedinaraia idia be ma haida idia matauraia. Buka ta ladana Parenting Without Borders ia gwau: “Bema nega ibounai natudia idia itaia idia be sibona idia noho lasi to idia be grup ta​—famili ta, sikuli ta, komiuniti ta​—lalonai idia noho, vadaeni idia be taunimanima ibounai do idia kara namo henia, bona idia sibona edia namo do idia laloa bada lasi.”

DALA MA HAIDA: Emu natudia dekenai ruma ena gaukara idauidau oi henia, unai amo ma haida durua daladia do idia dibaia.

“Bema hari eda natudia dekenai ruma ena gaukara idauidau ita henia, gabeai idia sibona idia noho neganai, do idia lalohekwarahi lasi. Idia sibona be gaukara ibounai do idia karaia namonamo.”​—Tara.

ANINA BE DAHAKA?

Tama bona sina edia haheitalai ta be, idia hadibaia gaudia idia badinaia. Hegeregere, nega ta reana tau ta be emu ruma ena iduara dekenai ia pidipidi to emu natuna dekenai oi gwau, ‘Oi hamaoroa lau be ruma ai lau noho lasi,’​—emu natuna be emu hereva ia kamonai neganai, gabeai ia danu be do ia koikoi.

“Nega momo inai hereva ita kamonai, ‘Egu hereva oi kamonai, to egu kara oi tohotohoa lasi.’ To unai bamona lalohadai be natudia ia durua lasi. Natudia be spansi bamona, ita gwauraia bona karaia gaudia ibounai idia laloatao, bona gabeai ita do idia hamaoroa ita be ita hadibaia gaudia ita badinaia lasi.”​—David.

BAIBEL ENA HAKAUA HEREVA: “Oi haroro oi gwau, ‘henaohenao lasi,’ to oi henaohenao, a?”​—Roma 2:21.

DAHAKA DAINAI HAHEITALAI BE GAU BADANA?

Nega momo natudia ibounai be edia turadia idia tohotohoa badabada lasi to edia tama sina edia haheitalai idia tohotohoa badabada. Unai dainai, gau badana be emu haheitalai namona amo emu natudia oi hakaua namonamo​—⁠oibe, namona be tama sina be natudia dekenai idia hadibaia gaudia idia badinaia.

“Gau ta be nega handred ita gwauraia loulou diba bona reana ita laloa eda natuna be ia kamonai lasi, to ita gwauraia gauna be nega ta ai ita ese ita karaia lasi neganai, eda natuna ese unai do ia gwauraia hedinarai. Natudia be ita karaia gaudia ibounai idia itaia, ena be ita laloa idia be ita idia itaia lasi.”​—Nicole.

BAIBEL ENA HAKAUA HEREVA: “Atai amo ia mai aonegana ia abia tauna ena kara . . . be inai: Ia . . . koikoi lasi.”​—Iamesi. 3:17.

DAHAKA OI KARAIA DIBA?

Oi abia hidi gaudia oi laloa namonamo. Edena bamona muvi o program oi itaia? Emu adavana bona natudia be edena bamona oi kara henidia? Edena bamona taudia oi tura henidia? Haida edia namo oi laloa bada, a? Ita gwau diba, oi ura emu natudia ese emu kara idia tohotohoa be namo, ani?

“Lau bona egu tau ai ura lasi emai natudia ai doria ai karaia diba lasi gaudia idia karaia totona.”​—Christine.

Oi karaia kereredia dainai oi sori. Emu natudia idia diba vadaeni oi be goevadae lasi. Unai dainai, nega maorona ai sori hereva be emu adavana bona natudia dekenai oi gwauraia neganai, idia oi hadibaia kara maoromaoro bona manau karana idia hahedinaraia be namo.

“Ita kerere neganai, iseda natudia dekenai unai ita gwauraia hedinarai bona eda sori hereva idia kamonai danu be namo. Bema unai bamona ita karaia lasi, gabeai idia be edia kerere do idia hunia.”​—Robin.